Ve hürmətinə kolleqon! Şımə çok zındəyon ki, əmə jurnalist, ya qəzetçi ne, riyaziyyat elmi alim və müəllimimon. Çəmə, i milyonisə ve Tolışi xəlği hələm ki, de 500 tiraji beşə yeganə mətbu bə "Tolışi Sədo” qəzeti redaktorə məsuliyəti bəştə qıy peğəte əsas səbəb - oxonə soronədə bə milləti çand ruşonfikon sə vardəbə faciəynə prosesonədə çəmə VİCDONİ SƏDO tələbi, iən rəhmətlığ Nəvuzəli müəllimi vəsiyyəti nəticədə be. Əfsus bıbu ki, sıvoy (ğərəz) çand ğeyrətmandon, əmandə ve-veylə ruşonfikon ım çətinə rujonədə ıştə şəxsi jimoni milləti ümumi dard-səronsə xəyli bəpe qətşone və hələmən çəvon ve poə ıyo-əyo nyon bedən və bə Tolışi harayə Sədo hay doydənin...Həni xəbəşon ni ki, i vaxt oviən de "fü-fü” karde-karde peşomə şəhid Nəvüzəli müəllimi sə omə faciə, i ruj bə çəvonən sə ome bəzne, ım əmonsızə fələk əvoniən nyo bə ha kıçiku bekarde və bə zolımon zülmi məruz karde bəzne. Əğəm bə nəzə bıstənəmon ki, hələm ta ğədimə devronku jıqo milləti sağləm ruhədə oğətəkəson bilavasitə əçey mücahidə ruşonfikon bən və millət bəvədə bə labud marde məhkum bə ki, ım ruşonfikon HƏXƏ royko qardən, bəvədə bəsə dəbəşemon ki, çəmə əncəx, iən əncəx iqlə romon mandə: TOKİədə nyon be ne, bə RUŞNƏ ro beşe lozime! Bənə qıləy müəllim-alimi, çəmənən orzu ıme ki, Tolışon SƏVODİN bıbon, ıştə şəxsi, iən xəlği HƏXİ harco müdafiə karde bıznon. Amma, əğəm çəş vinde-vinde, çəmə ğədimə di-məhəllə nomon bə co zıvoni pegordınedən, nom-fəmilyon dəqiş karde cəhd kardən, de saxtəkorə roon deputaton vijnedən və i.a. mənfurə kon kardən və əmənən – de "onsuzən ıştə vıtəyon bəkan!” kəlmon, bə ım həxsızətion tov vardəmon, bəvədə, lap yolə alim-professor, akademikən bıbamon, de məzlüm, ociz, besəvodə cahilon müqayisədə, çəmə çı fərqmon be bəzne ki?! Əve ki, ey çəmə alim-müəllimon, iən co rüşonfikon, ijən bəşmə, bənə şımə kolleqə müraciət kardəmon: "Tolışi Sədo” – çəmə həmməyni qəzete, oyo ıştə milli problemon, elmi məqalon, müsahibon, müraciəton və i.a. vacibə məsəlon ico mızakirə karde bəznemon. Bovə karde bəznen ki, əğəm ico, de ağli, iən de səbri ko bıkəmon, i ruj bəştə həxi sohib, bə şoyə rujonən ico şohid bəbemon və həni hiç gıləy bədxoxi bəmə züş əvışkni. Çəmə niyyət - "Tolışi Sədo” qəzeti bə Dınyo Demokratikə Medion cərgə bekardeye. Qəzetədə mütəmadi formədə çı dınyo ve məhşurə şəxson müsahibon bəşe, çəmə ğədim, iən muasirə tarıx-mədənyəti ve-veylə sırron obəben, çı dınyo ve-veylə xaricə məmləkətonədə jiə tolışon marağinə sobəton bəməsen və i.a. "Tolışi Sədo” qəzeti internet versiyə iən oyo dərc bə həmmə materialon www.talish.org saytədən hande bəznen. Əzizə kolleqon! Peştepüremon ki, i ruj "Tolışi Sədo” qəzeti de tarsi-larzi, ya de ehyiyati ne, de fəxri, de şoy-voyəti bə dast pebəğaten və qəzeti ha toja nomrə de intizari çəş bəkan...İnşallah, ım nezonədə çı qəzeti müxbir poston və bəy abunə məsəlonən həll karde niyyətədəmon. Xıdo ıştən "Tolışi Sədo” hifz, iən zümand bıkə, inşallah!
Hilal MƏMMƏDOV, Tolışi Sədo yolə redaktor
|