HURMƏTİNƏ TOLIŞON, XOSƏ ÇIMI XALQ!
Oktyabra manqi 9-də Azərbayconi Respublikada tojə Prezident vıjnə ruje! Bı vıjınədə 10 kəs namizəd bo vətəndaşon sədo səyro bə yarış beşən!
Bo manqi 9-i ısə boy, aşmardə rujon mandən. Əmə, tolışon bı vıjınədə bə kon namizədi sədo bıdəmon? Bı barədə xəyli nopeqət kardəbəpeşt, mılxəs, bə qıləy qərar oməym! Pidəme bı barədə ıştə fiki bəşmə bırosnım, ovardımon bıkəm!
Hol-hozə Prezidenti komanda bı 10 sori dılədə bəbe ote ki, bə Tolışi ğərəz ziyani, hiç xəy doəş ni! Yəne, çımon idarə kardə hukməti bo Tolışi zıvoni, mədəniyyəti, adət-ənənon, umumən çəy milli-mənəvi hestemoni nığo doyro hiç kojon nıkarde! Əksinə, bı roədə zəhmət kəşə qıləvıjnə ruşinfikon çaşonjon torsıne, çəvon venijon de nohəxə şəron bə turməjon dənoy! Imon pidəjone ki, sənibəton bə hukmət bon! Çəvon bardə təbliğatikuən zıne bedə ki, çımon bə ölkə bınəynə xalqon zıvoni, mədəniyyəti munasibət hiç dəqiş bə ni!
Mande nəv kəs namizədi Platforma?
XOSƏ TOLIŞON!
Ğərəz Cəmil Həsənli, çə həşt kəsi barədə söhbət kay pidəmni!
Bəşmə nəzə bırosnım ki, mı Milli Şura yeganə uzvim ki, bə C. Həsənli əleh sədom doy! Boçi? Çumçıko, bəvədə əçəy ölkə bınəynə xalqon həxon barədə bə çımı doə suali cəvobış mınış tam qane nıkarde!
İntasi, çəybəpeşt de professor Cəmil Həsənli dıbədı çımı vindemon be! Əmə çı Azərbayconi bınəynə xalqon ımrujnə və navomə tale barədə xəylimon söhbət karde. Mı çı ölkə kamə xalqon zıvoni, mədəniyyəti, adət-ənənon, tarixi, ijən co mental xususiyəton inkişaf karde barədə ıştə konsepsiyam bə Cəmil muəllimi nəzə rosnıme. Əv de çımı təklifon tanış be. Çəğın bı barədə ıştə Proqramiku bəmıj mufəssəl məlumat doy. Mılxəs, bənem ki, C. Həsənli çı Azərbayconi bınəynə xalqon nığo doy, çəvon inkişaf karde həxədə mukəmməl Proqramış heste! Həmən ki, C. Həsənli ve demokratik fikrinə yolə alime! Çətiniədə bəmə komək bə! Əve, bo C.Həsənli Prezident be qorış vəkiləti karde rozi bem!
ÇIMI AZİZƏ XALQ!
Şıməku xahiş kardəm, boən ımruj ıştə tale tamşo əkəku bəçəy iştirak bıkə peqardəmon! Qıyəjənəti məkəmon! Şamon bə vıjınə məntəqə!
Bə professor Cəmil Həsənli SƏDO Bidəmon!.. Çumçıko, Əv Çəmə Namizəde!
Bəşmə de ve yolə hurməti, Şımə boli,
Mehdibəy Səfərov
Azəri – Tolış İctimoi İbemoni sədr
