Əzizə tolışon, xosə çımı xalq!

Pidəme, de Şımə tikəy dıldard bıkəm... 

Bə səhe qərar oməm ki, əqəm əmə ıştən boştə zıvoni, mədəniyyəti, folklori, adət-ənənon, tarixi, coğrafi nomon soyb benışəmon, əvoni nığo nıdəmon, təbliğ, inkişaf nıkamon, Vallah.., Billah.., hiç kəs çı kəno bəmə koməkəti əkəni! Yəne, çəmə yeganə umidqo hejo əmə ıştənimon!

Bəpe, əmə hay dasti-dasti bıdəmon, ıştə milləti nomi, şərəfi, ləyoğəti, tarixi, mədəniyyəti, qururi, mentaliteti, ğədiməti.., əçəy ha sərvəti dınyo co xalqon dılədə nımoyiş, təbliğ bıkəmon!

Bomiro, vığın-vəğın emuje, dədurə qəpon jəy lozom ni! Bomiro, yoliku bə ruki, bəpe ha tolış ıştə daston bə pe bıkə, ko bıkə.., ko bıkə!

Çımı şinə millət! Imruj bo çəmə milləti nımarde qorış, çı ha tolışi vədə ve yolə məsuliyyət heste! Əqəm, çı dınyo dəvlətmandə xalqon numayəndon əncəx ıştə xezoni vədə ğarz hestbu, tolışi ısə boy, həm ıştə xeyzoni, həmən ıştə xalqi vədə ğarzış heste! Ə tolış ki, ıştə xalqi vədə bə ğarzi boştəro ğəbul kardəni, de bəboli bayro, əv nimənımrudə şəxsiyyəte! 

Bolion, hovon! Xalqi vədə bə ğarzi məsələ nisbiye! Ha kəs ıştə milləti roysə ıştə zu vışkə koy dəçıko, hınəj bə çiçi rəsdə, dəy məşğul bıbu, vəse!

Xosə tolışə fərzəndon! Əqəm ıştən de Tolışi milli mədəniyyəti kon sahə məşğul be muəyyən karde zıdənijon, bəvədə soax-soax bıkən, de xalqi mədəni təsisaton məşğul bə navəşənon, lideron pəydo bıkən! Xəcolət məkəşən, bəvon nez bıbən, lozim bə məsləhəton bıstənən!

Mınən, deştə ğıəryətmandə, qıləvıjnə tolışə duston ıştə səmon evə jə, be təmənno, dıli sıxto boştə xalqi milli-mənəvi irsi jiye, nığo doy, rosbero bə əlləyəkimon! De hiç kəsi koymon ni. Bə hiç kəsi pearış kardənimon! Ğərəz ıştə vicdani, ıştə milli mənafe bə hiç vırə anqıl nimon! Çəmə ha ko çəmə əmələdə çidə! De ve yolə qururi fəxr kardəmon ki, kam-ve əmənən, bəştə azizə xalqi – bə DƏDƏ TOLIŞi bənə çəy fərzəndi ıştə xıdməti kardəmon! De xidməti fəxr kardəmon, qurur dəvondəmon!

Qıləyən, bəməku tikəy deəro eqnə, kali vətənpərvər, ğıryətmandə Tolışə navəşənonku ve təvəqqe kardəm! Bolion, Şıməku rico kardəm; əqəm bəmə bı muqəddəsə roədə dast zındənijon qəte, komək zındənijon karde, hiç əkəni! Ziyanış ni! İntasi, bəmə mane məbən, bolion! Çəmə kəş-poçə məbastən! Çəmə peçti məsındınən! Vırəj oməy, noməy bəmə pearış məkən! Oxo, Şımə vindəjon ki, be i kupuk koməkəti, de hukməti təzyiqi, de represiv maşini vəbəvə mande-mande, de sa zılmi ıştə xalqi zıvoni, mədəniyyəti əyani təbliğati, inkişafi əmə real məşğulimon! Əy haştənimon marde!..

Ko buni bə çı vırə rəsə ki, mandəmon dı roy cobədə; a) ya bəpe bə hiç qəp-qəpon, təhqiron, təhdidon fik nıdəmon, ıştə səy evə bıjənəmon, de Tolışi conisə bə milli-mənəvi irsi, zıvoni, mədəniyyəti real təbliğati, inkişafi məşğul bıbəmon, b) ya da ki, həmə kon bınəmon bə kəno, əməni çı ruho eğande qorış, ğəsto təhqir, təhdid, exroc kardə, çəmə barədə beəxlağə qəpon, şər-şəbədon votə, çəmə ıştən bolion cəvobi bıdəmon? İ-yəndı təhqir bıkəmon! Dışmenon dıli şo bıkəmon, əvoni bəştə bısırovnəmon?..

Bəşmə rişi ğıbon! Isə, Iştən jı fiki bıkən; kon variant bəmə lozime? 

Çımı ğəromotə xalq, xosə Tolış! Çımı ladico de Şımə kardə ənə dıldardi yeganə məğz ıme: i-yəndı ğədi bıznəmon, bə sə dəşəmon! Bəştə xalqi həm maddi, həm mənəvi dastək bıbəmon (kamən bıbu, hiç əkəni)! Bəştə xalqi navəşənon diqqət, hurmət bıkəmon! Bəvon qayğı nışo doydənimon, hiç nıbu təhqir məkəmon! Imi həməkəs bızno: çı Tolışi problemon ğərəz tolışon hiç kəs həll əkəni! Bo Tolışi ğərəz tolışi hiç kəsi dıl əsutni! Ve-ve səbrin bıbəmon, cırtqoz məbəmon! Səvodin, ağılmand, siyosətin bıbəmon!

Şinə tolışon! Şımə səm dojne, tikəy dıldardım karde, mıni bıbaxşən!

Şıməni ve piyə boli, Mehdibəy.