 Bə "Toloşon sədo” qəzeti redaktori
Vey hurmətinə Rafiq muəllim. Qəzeti beşe qoroşoğ şıməni təbrik kardedəm. Im yolə koe. Əncəx bəzi məsəlon hıstin ki, qəzet hozo kardəkəson bəpe əvoni bə nəzər bısənon. Mı jurnalistr nim, ıştə fikron bənıvoştem. Çiç bəşmə xoş nı bıme, əv şımə koe.
I. Bəpe qəzet ıştə funksiyə bə vırə bırosno, yəni har çiku bınıvışto. Qəzeti iminə funksiyə əve ki, əv informasiya bırosno. Əncəx şımə qəzetədə i qılən xəbə bedəni. Dərəsdəm ki, qəzet haftədə i kərə beşedə, əncəx ujənən bəpe dınyo iən Azərbaycandə şə proseson xulasə bıbo. Kon hadison bən, ki çıçış kardə. Im həmən çı ədəbi zıvoni inkişafi qoroş vey vacibe. Əncəx dı ədəbiyyati, dı şeri vey bə nav şe əbıni. Çoko çimisə bə nav beşə qəzeton nışin. Əncəx i səhifə bə ədəbiyyati co karde bəbe. Bəsə dəşdəm ki şımə coyliyon, ənə materiali nıvışte çətine. Hiç nıbu müəyyən saytondə şə çokə məqalon bə toloşi peqordone bəbe.
II. Qəzetədə bə idmaniən vırə doe lozime. Çan vaxte "Xəzər–Lənkəran”i ətrofədə har curə hənəkon şedən. Çəmə zonə əhali bı dəğə har da kəsədə həşt kəs bı barədə qəp jedə. Qəzetədə bı həxədə i kərə tırkiədə qıle məqalə şə. Millət oxo həmə siyasətçi ni, bəlkəm i kəsi co fikrış handeş pidə, qəzetdə bəpe har çi bıbo, har qəzet handəkəs çəyo boştəno jəçi peqəto.
III. Nıvıştəyon ki, qəzeti səkəs kame, har çi ujənən əyo beşedə ki, qəzeti bəvədə həməkəs bəse ki, bo insonon marağ jə çi bıbo, çəvondə qıle az, çıl kubuq bo kisə pul ni, əncəx bo Akademiya işçion yolə pule. Puli doədə odəmi pidəşe çey dəyəri muqabildə informasiya bısəno. Əqər ın informasiyə nıbo, az ə qəzeti əsənim. Mande ki bə tarsi məsələ, ımon həmə boşə şeyonin. Kişon de tobə ısət qəzet hande kutisə qətə, qəzet beşdəbu, qeydiyyatədə davardəbu, oşko havatə bedəbu bəvədə problem çiçe ki?
Bəsə dəşdəm ki, hələ tojə-tojəe, har çi çok bəbe. Əncəx joqo karde lozime ki, har kəs ıştə pie qəzetiku se bızno bəvədə qəzeti tirajşən bəbe, co koonən ışdə vırə bəsen.
Orzum əve ki, ın qəzet ıştə sələfonku çokə mənadə fərqlənmış bıbu. Iştə funksiya bə vırə rosne bızno. Mande ki bəmə, əmənən şımə ğolloğədə hozo. Çəmə dastə çim omeydə koməq bakamon. Handəkəsi dasədə qıle qəzet se omeydə, eyən kardəmon, lozim biədə bə co handəkəsonən məsləhət zınedəmon.
Bənə toloşi zıvonşunasə alimiən bəştə ğarz zınedəm ki, toloşi tədqiq bıkəm deyən ki, bə xıdo şukur məşğulim. Çı hukumətikuən noroziətim ni, bə mənadə ki, bəmı votdəni tı dı zıvoni boçi məşğul bedəş, əksinə, ha sornə planədə bı problemi yəni, bə toloşi zıvoni umute pul co kardə bedə, ım pulən, bo co tədqiqatçion co kardə pulisən nə kame, nəən ki, vey. Əv co məsələe ki, dovlətədə bə alimi maaş kam dodən. Hələ heç kəsikuməm məsə ni ki tı boçı Azərbaycandə nıştəş, toloşi zıvoni tədqiq kardəş. Hiç kiən votəş ni ki, ıştı ın məqalə çap kardedənimon, ya rəy dodənimom, bəçı qoroşoğ ki ti toloşi zıvoni tədqiq kardedəş. Imon həmə boşə şeyonin.
Çı Tolışi zıvoni həxədə kali fikronım heste ki, əvoni boşməro vığandedəm. Əğəm lozim zındəyonbu çap bıkənən.
Rasim Heydərov,
Filologiya elmləri namizədi,
"Tolışon Sədo”, N: 02 (14) 14 yanvar 2012
|
