Azizə tolışon, xosə həmvətənon!
I haftə heste ki, çı Tolışi ve ğıryətinə, ruşinfikə zoə Məhərrəməli Nəcəfov bə rəhmət şə!
M.Nəcəfov bəbe ote ki, ıştə umrıj bəştə xalqi – bə Tolışi milli-mənəvi hestemoni nığo doy, rost kardej həsr karde!
Hələ 1990-nə soronədə əv çı Tolış Mədəniyyət Mərkəzi toj-tojə bə məydon omeədə, peşı əçəy Liki şöbə təşkil kardeədə ve yolə zəhmətıj kəşəy! Iştə jiemoni venə hissə Lik rəyonədə dəvonə Məhərrəməli muəllim bə Tolışi ictimoi-siyosi navəşənon həmişə dastəkıj doə, bavonış dıl sutə, koməkıj ka!
Məhərrəməli muəllim 2-3 sorbe ki, bə Binə sovxozıj kuç kabe. Yoən de ictimoi aktiv Tolışə balon rə-rə vindemon əkəy, ıştə çokə məsləhəton ədəy, bəvon duzə ro nışon ədəy!
Hejo ıştə xalqi rostbemoni fiki kardə Məhərrəməli muəllim oxonə zəmonədə bə dılə doji duçor bəbe!
Həyf ki, çəmə xosə boli – Məhərrəməli çı qonə dılə dojonku i haftə bə nav bə rəhmət şe!
Xıdo Bəşmə səbr bıdə, hurmətinə tolışon! Çəmə ğəd zınə xalq!
Çəmə boli çı Binə-sovxozi ğəvıstonədə dəfn be!
Imruj əmə, çı Tolışi i qrup aktivə zon, çı Məhərrəməli muəllimi məzarmon ziyarət karde!
Çı Tolışi ve ğıryətmandə ruşinfik, dıli sıxto ıştə conış bəştə xalqi fədo doə Məhərrəməli muəllimi azizə xotirə hiç zəmon çəmə yodo benibəşe! Xıdo əy rəhmət bıkə!
Vırəj vəşt bıbu! Amin!
Mehdibəy Səfərov, Rafiq Cəlilov, Seyran Rəfiyev, Mirfəyaz Likməkani, Azər Kazımzadə