Boçi Xanəli muəllimi çı Tolışi peşt hisob kardəmon? Peşt çoknəy bedə? Çokə ruji - puçə ruji, xəşə ruji – qonə ruji bə odəmi həyon bə kəsi odəm boştə peşt zındə... Bı hisob Xanəli muəllimən çı Tolışi peşte!
Totalitar Sovet İmperiya bə insoniyyəti əleh ən yolə cinayətonədən qıləy əve ki, 20-nə əsri 30-nə soronədə Tolış nomədə dınyo ğədimə xalqış iva bə represiya məruzış karde, əçəy nomış ğəti-ğədəğonış karde! Bə xalqi zıvoni, ədəbiyyati, folklori, adət-ənənonış tabuj noy! Çı xalqi şairon, ənvışton, axunon, ictimai-siyasi xadimon ijən co ruşinfikon i poə dərhol kıştıjone, əmandəyonən bə Sibir, bə Maqadan sırginjon karde. Ənəho dənıvarde ki, əvonən vəğın sardiku, vəşiku ğır ben, mardin! Bə Tolışi peşti nizə ejə kəson jıqo zınəjone, demiyən Tolış marde...
Bə yolə tarixi xəyonəti dıçu bə Tolışi ta dosə 20-nə əsri 80-nə soron oxi sədoş benışe.
Ne.., nımarde, dədə Tolış! Gin nıbe, lələ Tolış! Boçi nımarde, dədə Tolış? Bə çı kion hisob gin nıbe, lələ Tolış?
Vaşte, ijənən Tolışi jə dıl! Obəy çəy nəfəs! İjənən, beşen bə məydon, çəy şiri-nəron! Novruzəli Məmmədov, Tofiq İlham, Vəlişah, Huccətullah, Şahan Tolıbi, Əli Nasir, Allahverdi Bayrami, Camal Lələzoə, Bəxtiyar Ruşin ijən çan kəs bənə bəvon bə Tolışi zıvoni, ədəbiyyati sənibəton nəfəs doə, fitri istedadinə şairion, ğələm əhliyon - şiri-nəron beşen bə məydon!
Çə nəhənqə şiri-nəronədə qıləyən, ıştə rufış, ıştə dılış, ıştə jiyemonış bəştə xalqi – bə Tolışi zıvoni, ədəbiyyati, folklori, mədəniyyəti həsrış kardə şair Xanəli Tolışe! Əçəy nıvıştə mukəmmələ poeziya nımunon çı ğədzınə Tolışi xalqi zıvonədə əzbərin! Xanəli muəllimi şeronədə çı Tolışi zıvoni soyəti, ğədiməti, nığıləti, lakonikəti, həzinəti, ahəngdorəti ıştəni ve çok nışo doydə!
Xanəli muəllimi bəştə xalqi – bə Tolışi kardə xidmət i qılə deçəy nıvıştə xosə ədəbi nımunon təmom bedəni! Əv həmən ıştə xalqi mədəniyyəti, tarixi, adət-ənənon, milli-mənəvi dəyəron, çəy mental irsi təbliği, inkişafi, nığo doy roədə sərasər zəhmət kəşə ve yolə ruşinfik, ictimai xadim, bə nımunəvi şəxsiyyəti malik navəşən, mudrikə sıprişe!
Xanəli muəllim çı Tolışi şoyə ruji şo bə kəse! Çəy çətinə ruji ısə boy, ıştə sinə bənə avtomati ambrazura bə nav doə mərdə sıprişe!
Imruj, çı xos-mubarəkə sima movardə ruj – yubileye! Çəy 75 əmijış təmom bedə!
75 əmijə yubileyon xose, mubarəke, xosə şair, ğıryətinə merd, ləyoğətinə tolış - Xanəli Tolış!
Əmə, həm ıştə nomo, həm “Tolısh.org”i kollektivi nomo Şıməni de 75 əmijə yubiley munasibəti dıli sıxto təbrik kardəmon! Bə Şımə xəşəcon, dırozə umur, xeyzonə səadət ijən tojə-tojə ədəbi nailiyyəton orzu kardəmon!
Xıdo Şıməni bə Tolışi xalqi ve nızıno!
Bə Şımə de ve yolə hurməti,
Mehdibəy SƏFƏROV, Əli NASİR, Allahverdi BAYRAMİ, İsmail ŞABANOV, Ataxan ƏBİLOV, Seyran DADAŞOV, ijən “Tolısh.org”i redaksiya kollektiv
