Главная » 2012 » Декабрь » 22 » Azərbaycan həbsxanalardakı dəhşətli işgəncə faktlarına ictimaiyyət etiraz edir
00:33
Azərbaycan həbsxanalardakı dəhşətli işgəncə faktlarına ictimaiyyət etiraz edir
Dekabrın 21-də Reportyorların Azadlıq və Təhlükəsizlik İnstitutunun Media Mərkəzində məhbusların hüquq və azadlıqlarını müdafiə etmək üçün hüquq müdafiəçiləri, vəkillər, hüquqşünaslar, ictimaiyyət nümayəndərləri, jurnalistlər, o cümlədən cəzaçəkmə müəssisələrində işgəncələrə və təzyiqlərə məruz qalan məhbusların yaxınlarının qatıldığı dəyirmi masa keçirilib. Gozetci.az portalının məlumatına görə, Hüquq və Azadlıqların Müdafiə İnstitutu, "Siyasi Məhbuslarsız Azərbaycan” İctimai Alyansı, Siyasi Azadlıqları Müdafiə Alyansı və İnsan Haqları Klubunun birgə təşkil etdiyi tədbirin yekununda tədbir iştirakçıları bəyanat qəbul ediblər. 30 nəfərin imzaladığı bəyanatda türmələrdə baş verən özbaşınalıqların araşdırılması, həmçinin cəzaçəkmə yerlərində monitorinqlərin aparılması üçün müstəqil hüquq müdafiəçilərinə şəraitin yaradılması tələb olunub. Bəyanatda deyilir:
"Son vaxtlar həbsdə saxlama yerlərindən gələn acı xəbərlər və ölüm halları barədə açıqlanan statistik məlumatlar Azərbaycan ictimaiyyətinin fəal hissəsi olaraq bizlərin narahatlığına səbəb olmuşdur. Bu məlumatlardan görünür ki, həbsdə saxlama yerlərində islahatların aparılması barədə hökumətin verdiyi açıqlamalar həqiqəti əks etdirmir. Beləki, əvvəlki illərdə olduğu kimi yenə də məhbuslar işgəncələrə məruz qalır, intihara sövq edilir, xəstəliklərə düçar edilirlər. Bunun təsdiqi kimi bir neçə gün bundan əvvəl 17 saylı cəzaçəkmə müəssisəsində saxlanılan Nemət Pənahlının ictimaiyyətə müraciət məktubuna baxmaq kifayətdir. Həmin məktubda məhbusların hansı şərtlər altında saxlandığı ətraflı formada təsvir olunmuşdur. Bundan başqa cəsədi bu günlərdə ailəsinə təhvil verilən məhbus Pərviz Mikayılovun intihar etdiyi bildirilsə də, onun üzərində fiziki zorakılıq əlamətlərinin olduğu müəyyən edilmişdir. Həmin zorakılıq əlamətlərinin müəyyən edilməsi insanlarda haqlı olaraq Pərviz Mikayılovun intihara sövq edilməsi, yaxud da öldürüldüyü barədə ehtimallar yaratmışdır. Qeyd olunanlarla yanaşı xatırlatmaq istərdik ki, ötən ay Bakı İstintaq Təcridxanasında saxlanılan Hilal Məmmədovun da fiziki zorakılığa məruz qoyulması barədə məlumatlar verilmişdir. Bu günlərdə həmçinin məlum olmuşdur ki, təkcə ötən il Qobustan Həbsxanasında ən azı 3 nəfər ölmüşdür. Bütün bunlarla yanaşı o da narahatlıq yaradır ki, bəzi ölüm halları nəinki həbsdə saxlama yerlərində, bir sıra hallarda tibb müəssisələrində baş verir. 2012-ci ildə Penitensiar Xidmətin tabeliyində olan müalicə müəssilərində çoxlu sayda məhkum vəfat etmişdir. Onlardan yalnız Seymur Mikayılov, Murad Şükürov və Əmrəli Babayev barədə məlumatlar açıqlanmışdır. Ümumiyyətlə Penitensiar Xidmət ölüm faktları barədə ictimaiyyətə bir dəfə də olsun məlumat verməmişdir. Eyni zamanda bu kimi halların ört-basdır edilməsi məqsədilə müstəqil QHT-lərin və hüquq müdafiəçilərinin həbsdə saxlama yerlərində monitorinq aparması, neqativ faktları araşdırması imkanları tamamilə məhdudlaşdırılmışdır. Prokurorluq tərəfindən aparılan araşdırmalar da bir qayda olaraq günahkarların müəyyən edilib cəzalandırılmasına xidmət etməmişdir. Bu orqanın ölüm və işgəncələr barədə apardığı araşdırmalar bir dəfə də olsun kiminsə cəzalandırılması ilə nəticələnməmişdir. Biz vətəndaş cəmiyyətinin fəalları, hüquq müdafiəçiləri və məhbus yaxınları həbsdə saxlama yerlərindəki vəziyyətdən narahatlığımızı ifadə edir və bununla bağlı ciddi addımların atılmasını tələb edirik! Tələb edirik ki, həbsdə saxlama yerlərindəki vəziyyəti monitorinq etmək məqsədilə müstəqil QHT-lərə, hüquq müdafiəçilərinə bərabər şərait yaradılsın və aşkarlanmış neqativ hallara görə günahkarlar müəyyən edilərək, cəzalandırılsın! Bəyan edirik ki, cəmiyyətdən təcrid olunmuş məhkumların acınacaqlı taleyinə biganə qalmayacaq, onlara qarşı yol verilən hər bir neqativ hərəkətin araşdırılması və günahkarların cəzalandırılması üçün səylərimizi bunda sonra da səfərbər edəcəyik!"
Bəyanatı aşağıdakı şəxslər imzalayıblar:
1.Oqtay Gülalıyev - Siyasi Məhbuslarsız Azərbaycan” İctimai Alyansı 2. Mehriban Vəzir - İctimai Palata 3. Əli Kərimli - AXCP 4.Ənnağı Hacıbəyli - Azərbaycan Hüquqçular Assosiasiyası 5. Rövşən Hacıbəyli - "Azadlıq" qəzeti 6. Şahvələd Çobanoğlu - "Azadlıq" qəzeti 7. Arzu Abdullayeva - Helsinki Vətəndaş Assambleyasının Azərbaycan Milli Komitəsi 8. Abuzər Cəfərli - keçmiş siyasi məhbus, jurnalist 9. Rəhim Qazıyev - keçmiş siyasi məhbus 10. Rafiq Cəlilov - Tolışi sədo” qəzeti, Hilal Məmmədovun Hüquqlarını Müdafiə Komitəsi 11. Səbahəddin Məmmədov - Hilal Məmmədovun Hüquqlarını Müdafiə Komitəsi 12. Mehman Əliyev - Turan İnformasiya Agentliyi 13.Fəxrəddin Mehdiyev - vəkil 14. Müslümat Rzaxanova - Ömürlük Azadlıqdan Məhrum Edilən Məhbusların Müdafiə Komitəsi 15. Sədaqət Paşayeva - Dilarə Əliyeva adına Qadın Hüquqları Müdafiə Cəmiyyəti 16. Fatma Əliyeva - həbsdə müəmmalı şəkildə ölən məhkum Pərviz Mikayılovun anası 17. Həcər Pənahlı - siyasi məhbus Nemət Pənahlının həyat yoldaşı 18. Əsabəli Mustafayev - vəkil 19. Nəsrulla Nurullayev - "Kür" Vətəndaş Qərargahı 20. Namizəd Səfərov - hüquqşünas 21. Qurban Məmmədov - "Qalxan" hüquq firması 22. Elşən Həsənov - Siyasi Məhbuslarsız Azərbaycan” İctimai Alyansı 23. İradə Cavadova - İnsan Hüquqları üzrə Maarifləndirmə İctimai Birliyi 24. Məlahət Zeynallı - "Xural" qəzeti 25. "Said Dadaşbəylinin dəstəsinin" Hüquqlarını Müdafiə Komitəsinin üzvləri 26. Qətibə Qarayeva - siyasi məhbus Said Dadaşbəylinin anası 27. Elçin Namazov - Hüquq və Azadlıqların Müdafiə İnstitutu 28. Rəsul Cəfərov - İnsan Hüquqları Klubu 29. Samir Kazımlı - Siyasi Azadlıqları Müdafiə Alyansı 30. Bəşir Süleymanlı - Seçkilərin Monitorinqi və Demokratiyanın Tədrisi Mərkəzi