Главная » 2012 » Июнь » 1 » Azərbaycan yəhudi dövləti ilə daha bir iri silah müqaviləsi bağlayıb
17:07
Azərbaycan yəhudi dövləti ilə daha bir iri silah müqaviləsi bağlayıb
Bakı İsraildən 300 milyon dollarlıq pilotsuz təyyarələr alır
Azərbaycan İsraillə daha bir iri silah müqaviləsi imzalayıb. İsrailin "ZMAN.com” portalının xarici mənbələrə istinadən yaydığı xəbərə görə, müqavilə "İsraeli Aerospace İndustries” konserni ilə imzalanıb və Azərbaycana onlarla pilotsuz kəşfiyyat təyyarələrinin satılmasını nəzərdə tutur. Bildirilir ki, tərəflər arasında bu müqavilə ilə bağlı danışıqlar uzun müddətdir davam edirdi və nəhayət, danışıqlar uğurla yekunlaşıb. Hərbi mütəxəssislər müqavilənin dəyərinin 300 milyon dollar olduğunu təxmin edirlər, bu pilotsuz kəşfiyyat təyyarələrinin satışına dair İsrailin əvvəllər Türkiyə ilə bağladığı müqavilənin həcmindən çoxdur.
Müqaviləyə əsasən, İsrailin Azərbaycana hansı tip pilotsuz kəşfiyyat təyyarələri satacağı göstərilmir, ancaq məlumdur ki, "İsraeli Aerospace İndustries” konserni kifayət qədər uzaq məsafələrdə uça bilən və hədəfi dəqiq vuran raketlərlə təchiz olunmuş pilotsuz kəşfiyyat təyyarələri istehsal edir.
Azərbaycan bundan əvvəl də İsraildən pilotsuz kəşfiyyat təyyarələrini alıb. Əvvəllər İsraildən "Orbiter” və "Aerostar” tipli nisbətən kiçik pilotsuz təyyarələr alınıb, daha sonra İsrailin bu təyyarələri istehsal edən "Elbit Systems” konserni ilə Azərbaycanın Müdafiə Sənayesi Nazirliyi arasında bağlanmış müqaviləyə əsasən təyyarələr Bakıda yaradılmış birgə müəssisədə istehsal edilməyə başladı. Bu ilin fevralında isə məlum olmuşdu ki, Azərbaycan İsraillə 1.6 milyard dollarlıq silah müqaviləsi bağlayıb və ora iri pilotsuz təyyarələrin satışı da daxildir. Həmin müqavilə regionda ciddi narahatlıq doğurmuşdu və Qərb mənbələrinin xəbərlərinə görə, İranla yanaşı, Rusiya və hətta Türkiyə də İsrailin Azərbaycana bu həcmdə müasir silahlar satmasından narazı qalmışdı.
Əvvəlcə silah müqaviləsinin detalları məlum deyildi, lakin Qərb qaynaqları detalları mətbuata sızdırdılar və məlum oldu ki, alınan silahlar arasında gəmi əleyhinə hərəkət məsafəsi 36 km olan Gabriel-522-x raketləri, beş ədəd "Heron” və beş ədəd "Searcher” pilotsuz təyyarələri də yer alır. "Heron” - 4,6 tonluq pilotsuz uçuş aparatı (PUA) 14000 metr yüksəklikdə işləmək iqtidarındadır. Heron bir ton faydalı yük daşıya bilir və yerdə olanlar haqqında müfəssəl təsəvvür yarada bilən cihazlar yerləşdirməyə imkan verir. Bu pilotsuz təyyarənin uçuş müddəti 36 saatdır ki, bu da "Heron”u Amerikanın MQ-9 Reaper təyyarəsinin rəqibinə çevirir. "Searcher” isə 2,5 ton ağırlığındadır və 20 saat havada qala bilər. Maksimal uçuş yüksəkliyi 7500 metr, uçuş məsafəsi isə operatordan 300 km. təşkil edir. 120 kq. faydalı yük daşıya bilir. Müqaviləyə həmçinin "Barak-8" raketdən müdafiə sistemləri və bu sistemin tərkib hissəsi olan ”Green Pine" radar kompleksi də daxildir.
İsrailin "İzRus” portalı yazır ki, Israeli Aerospace Industries (IAI) korporasiyası məhz Azərbaycanla imzaladığı son silah müqavilələri sayəsində ziyana düşməkdən qurtulub. Bildirilir ki, Qərb ölkələrindəki iqtisadi böhranla bağlı şirkətə silah sifarişləri son zamanlar azalmışdı və konsern ziyanla işləməyə başlamışdı. Ancaq Azərbaycanla bu ilin əvvəllərində bağlanan 1.6 milyardlıq müqavilə şirkətin bu ilin birinci kvartalını 54 milyon dollar təmiz gəlirlə başa vurub. IAI Azərbaycanla yanaşı Rusiyaya da pilotsuz kəşfiyyat təyyarələri satır. Xəbərə görə, şirkət pilotsuz kəşfiyyat təyyarələrini idarə edən operatorlar üçün akademiya da yaradıb və orada Azərbaycanla Rusiyadan olan hərbçilər də təhsil alır. Qeyd edək ki, Azərbaycan İsraillə bağladığı son müqavilədən sonra regionda ən çox pilotsuz kəşfiyyat təyyarəsinə malik olan ölkəyə çevriləcək və belə görünür ki, bu hərbi texnika növü üzrə hətta Türkiyə ilə Rusiyanı da qabaqlayacaq.
Bəzi hərbi ekspertlərə görə, "Heron” və "Seacher” pilotsuz təyyarələrinin göstəriciləri onların mümkün İran təhlükəsinə qarşı alındığını göstərir. Şübhə yoxdur ki, İsraillə son silah müqaviləsi İranla Azərbaycan arasında qarşıdurmanın yüksək həddə olduğu bir vaxtda Tehranla münasibətləri bir az da kəskinləşdirıcık.
