Biz, Azəri-Talış milli-mənəvi dəyərlər İctimai Birliyinin təsisçiləri olaraq, Azərbaycan Respublikasının Prezidenti cənab İlham Əliyevə Birliyin Ədliyyə Nazirliyi tərəfindən Dövlət qeydiyyatına alınması problemilə bağlı açıq məktubla müraciət etmişik. Bildirmişik ki, bu məsələ ilə əlaqədar ƏN tərəfindən süni əngəllər yaradılır və biz bunu Konstitusiyada təsbit olunmuş hüquqlarımızın pozulması kimi dəyərləndiririk. Açıq məktubun tərəfimizdən ictimailəşdirilməsinin əsas səbəbi isə, müraciətimizin cənab Prezidentə çatmdırılacağına inamsızlığımızdır.
Belə ki, 13 dekabr 2012-ci il tarixdə Lənkəranda CTV kimi fəaliyyət göstərən regional televiziya kanalının orada kompakt yaşayan talışların dilində verilişlər yayımlanmasına Dövlət dəstəyi ilə bağlı, ölkə başçısı cənab İlham Əliyevə məktub ünvanlamışdıq. Lakin təəssüflər ki, bu günə kimi müraciətimizə heç bir rəsmi və ya qeyri rəsmi cavab verilməmişdir. Yalnız öz səylərimiz nəticəsində Prezident Administrasiyasının azsaylı xalqlar üzrə sektor müdiri Müzəffər Talıblı ilə telefon əlaqəsi qura bildik; o isə öz növbəsində, kobud ifadələrlə xahişimizin yerinə yetirilməsinin qeyri-mümkünlüyünü bildirib, bizimlə danışmaqdan imtina etdi.
Azəri – Talış İctimai Birliyi bu və digər problemlərlə bağlı daha ətraflı məlumatları 4 aprel 2013-cü il tarixdə saat 12:00-da RATİ-də keçiriləcək mətbuat konfransında açıqlayacaqdır. KİV nümayəndələrini dəvət edirik.
Azərbaycan Respublikasının Prezidenti
cənab İlham Əliyevə
Açıq məktub
(Surəti: Azərbaycan Respublikası Ədliyyə Naziri cənab Fikrət Məmmədova)
Möhtərəm Prezident!
14 noyabr 2012-ci il tarixdən Azəri – Talış milli-mənəvi dəyərlər İctimai Birliyi fəaliyyətə başlaması barədə Bəyanatla çıxış etmişdir. Birlik dövlət qeydiyyatından keçmək üçün qanunçuluğun bütün müddəalarına riayət edərək, tələb olunan sənədləri Azərbaycan Respublikası Ədliyyə Nazirliyinə təqdim etmişdir. Lakin ƏN İctimai birliklərin Dövlət qeydiyyatına alınmasını ehtiva edən müvafiq Qanunun tələblərinə əməl etmədən və tutarlı bir səbəb gətirmədən Birliyin Dövlət qeydiyyatından keçməsi ilə əlaqədar müraciətinə imtina cavabı vermişdir.
Cənab Prezident! Azəri – Talış milli-mənəvi dəyərlər İctimai Birliyi yarandığı 5 ay ərzində ölkəmizin ictimai həyatında obyektiv mövqe tutmağa və özünəməxsus dəsd-xətti ilə seçilməyə cəhd göstərmişdir. Belə ki, bir neşə ay ərzində Birlik milli-mənəvi və dini dəyərlərimizi əks etdirən "Haqqın Şairi” mini film çəkmiş, "Yeni il, yeni arzular”, "20 Yanvar - Şəhidlərin ruhu yaşayır”, "Xocalı soyqırımı – dərdimiz, mübarizəmiz”, "Novruz Bayramı”, eləcə də vətənpərvərlik ruhunda digər tədbirlər keçirmişdir. Biz, həmçinin, ölkəmizin qədim etnoslarından biri olan talışların dilinin, adət-ənənələrinin, folkloru və digər mədəniyyət nümunələrinin öyrənilməsi və təbliği yönündə lazımi işlər görməyi planlaşdırırıq. Eyni zamanda, gənclərimizin Azərbaycanın dövlətçiliyinə, milli rəmzlərinə və ərazi bütövlüyünə məhəbbət ruhunda tərbiyyə olunması istiqamətində diskusiyalar, müzakirələr, görüşlər, dəyirmi masalar və s. keçirməklə, təbliğat və təşviqat işləri aparmağa prioritet veririk.
Ancaq təəssüf ki, bütün bunlara baxmayaraq, ƏN heç bir məntiqi əsas gətirmədən Birliyi dövlət qeydiyyatına almır və bununla AR Konstitusiyasında təsbit olunmuş hüquqlarımızın pozulmasına rəvac verir. Belə münasibət təbii ki, bizləri təəcübləndirməklə yanaşı, ruhdan da salır.
Cənab Prezident! Ümidimiz Sizədir. Xahiş edirik ki, Azəri – Talış milli-mənəvi dəyərlər İctimai Birliyinin Dövlət qeydiyyatına alınmasına süni əngəllər yaradan Azərbaycan Respublikası Ədliyyə Nazirliyinə müvafiq göstəriş verəsiniz.
Əvvəlcədən öz təşəkkürümüzü bildiririk.
Dərin hörmətlə,
Eldəniz Quliyev,
Mehdibəy Səfərov,
Azəri – Talış milli-mənəvi dəyərlər İctimai Birliyinin təsisçiləri
