Главная » 2011 » Сентябрь » 5 » Bakıda fəaliyyət göstərən kürd gənclər təşkilatı bəyanat yayıb
18:52
Bakıda fəaliyyət göstərən kürd gənclər təşkilatı bəyanat yayıb
İyun ayının 29-da mətbuat konfransı keçirərək prezident İlham Əliyevə müraciət ünvanlayan Kürd Gənclər Təşkilatının rəhbəri Nicat Cəbrayılov təşkilatın adından bəyanat verib.
Kürd Gənclər Təşkilatı adından verilən bəyanatda təxminən iki ay öncə - iyunun 29-da keçirilən məlum mətbuat konfransı və ölkə başçısına kürd dilinin tədrisi, kürd mədəniyyətinin təbliğinə nail olmaq üçün edilən müraciət xatırladılır. Sonra bəyanata, orada əksini tapan fikirlərə ayrı-ayrı deputatların, siyasi, ictimai xadimlərin, bəzi jurnalistlərin ortaya qoyduğu münasibətdən söz açılır.
Bəyanatda deyilir ki, kürd gənclər İlham Əliyevə göndərilən müraciətə göstərilən münasibətdən kəskin narazı qalıblar: "Biz təxminən iki ay gözlədik ki, bizim addımımıza həm rəsmilərin, hakimiyyətin, həm də ictimaiyyətdə tanınan şəxslərin necə münasibət göstərdiyi ortaya çıxsın. Hakimiyyət adından hələ ki, rəsmi münasibət bildirilməyib. Ancaq həm hakim partiyanın bəzi təmsilçiləri, həm də digər ictimai-siyasi xadim adı daşıyan bəzi şəxslər mediada bizim qanuni addımımıza öz xislətlərinə uyğun münasibət bildirdilər ”.
Bəyanatda deyilir: "Onları mənəvi cəhətdən kor hesab edirik. Çünki onlar gerçəyi görmürlər və ya görməzlikdən gəlirlər. Biz çox təəssüf edirik ki, Milli Məclisin insan haqları komitəsinin sədri vəzifəsini daşıyan Rəbiyyət Aslanova da bizim kürd xalqının haqlarının bərpa olunması üçün atdığımız xoşməramlı addıma hüququmuzu pozaraq cavab verib. İnsan haqlarının müdafiəsi missiyasını daşıyan komitənin rəhbəri insan haqlarını pozmuş oldu. Rəbiyyət xanımın bizi avantürist, yalançı, araqarışdıran adlandırması hüququmuzu pozmaqdır. O, nə vaxt bizi qəbul edib dinlədi? Nə vaxt maraqlandı ki, bu gənclərin istəyi nədir? Bunu etmədiyi halda hansı haqla, hansı faktla bizi avantüristlikdə, ara qarışdırmaqda ittiham edir?! Əgər bizim əməllərimizdə Azərbaycan dövləti əleyhinə nə isə olsaydı, yəqin ki, çoxdan məsuliyyətə cəlb olunmuşduq. Tələb edirik ki, bizə o cür ittihamları səsləndirən şəxslər dediklərini sübuta yetirsinlər. Sübuta yetirə bilməsələr etiraf etsinlər ki, səhvə yol veriblər. Tələb edirik ki, araşdırma aparsınlar hər yüz kürd gəncdən neçəsinin ana dilini bildiyini ortaya çıxarsınlar. Belə bir araşdırma kürdlərin ana dilinin öyrənməsinə dövlət dəstəyinin zəruri olduğunu ortaya çıxaracaq”.