Главная » 2013 » Январь » 11 » Beynəlxalq təşkilatdan hakimiyyətə qəzəb dolu müraciət
10:40
Beynəlxalq təşkilatdan hakimiyyətə qəzəb dolu müraciət
"Azərbaycanda bütün hüquq müdafiəçilərinin fiziki və psixoloji toxunulmazlığına zəmanət verin”
Beynəlxalq İnsan Haqları Federasiyası və İşgəncələr Əleyhinə Beynəlxalq Təşkilatın birgə layihəsi olan İnsan Haqları Müdafiəçilərinin Qorunması üzrə Müçahidə Qrupu "Tolişi Sado” qəzetinin baş redaktoru Hilal Məmmədovun həbsi və işgəncəyə məruz qalması ilə bağlı müraciət yayıb. Qurum müraciəti president İlham Əliyev, baş prokuror Zakir Qaralov, daxili işlər naziri Ramil Usubov, ədliyyə naziri Fikrət Məmmədov, Azərbaycanın BMT-dəki Daimi Nümayəndəliyi və Azərbaycanın Brüseseldəki səfirliyinə ünvanlayıb.
"Bizimyolinfo.com" müraciətin tərcüməsini təqdim edir: "Müşahidə Qrupuna məlumat daxil olb ki, etnik azlığın hüquqlarının müdafiəçisi və "Tolişi-Sado” ("Talığın Səsi”) qəzetinin baş redaktoru Hilal Məmmədov ötən il noyabrın 26-da Kürdəxanı həbsxanasında kamera yoldaşı tərəfindən döyülüb və xəsarət alıb. Onun kamera yoldaşı ruhi xəstəlikdən əziyyət çəkir. Hilal Məmmədov bu hadisədən iki həftə əvvəl o kameraya yerləşdirilib. Onun kamera yoldaşının davranışı aqressiv olub və hətta onun gecələr yatmasına da mane olub, amma onun vəkillərinin kameranın dəyişdirilməsi ilə bağlı bir neçə müraciəti qulaqardına vurulub. Nəhayət, ötən il noyabrın 29-da onun kamera yoldaşı müalicə üçün həbsxananın xəstəxanasına köçürülüb.
Bundan başqa, noyabrın 8-də Səbail Məhkəməsi Hilal Məmmədovun saxlanma zamanı işgəncələrə məruz qalması ilə bağlı verdiyi şikayəti rədd edib. Bu şikayət H.Məmmədovun ayaqlarında olan xəsarətlərlə bağlı ekspertiza rəyinə əsaslanıb. Cənab Məmmədovun vəkilləri bildiriblər ki, işi Avropa İnsan Haqları Məhkəməsinə çıxaracaqlar.
Ötən il noyabrın 28-də istintaq yekunlaşıb və H.Məmmədova qarşı "dövlət xəyanəti”, "milli, irqi və dini təfriqə törətmək” və "narkotik maddələrin istehsalı, saxlanması və daşınması” ittihamları elan edilib. İş üzrə birinci məhkəmə dinləməsi bu il yanvarın 9-da keçirilib. Prosesdə Cənab Məmmədovun vəkilləri iki vəsatət qaldırıblar. Biri prosesdə audio və video çəkilişlərin aparılmasına icazə verilməsi, digəri isə onun dəmir qəfəsdən kənarda oturmasına icazə verilməsinə dair olub. Hər iki vəsatət məhkəmə tərəfindən rədd edilib.
Xatırladaq ki, Hilal Məmmədov 5 aydan çoxdur həbsdədir. Ona elan olunmuş ittihamlar üzrə Hilal Məmmədovu ömürlük həbsə qədər cəza gözləyir.
Müşahidə Qrupu Hilal Məmmədova qarşı təqibi kəskin şəkildə qınayır və hesab edir ki, bu, onun insan haqlarının pozulmasına dair hesabatlarının qarşısını almağa yönəlib. Qrup həmçinin H.Məmmədovun saxlanma şəraiti ilə bağlı olaraq getdikcə daha çox narahatlıq keçirir - belə ki, "Tolişi Sado” qəzetinin sabiq baş redaktoru Novrizəli Məmmədov da bu şəkildə təqiblərə və qanunsuz həbsə məruz qalıb və sonradan 2009-cu il avqustun 17-də həbsxanada həyatını itirib.
Müşahidə Qrupu bir daha Azərbaycan hakimiyyətini Hilal Məmmədova qarşı bütün ittihamları dərhal və qeyd-şərtsiz ləğv etməyə çağırır - belə ki, bu proses onun insan haqları ilə bağlı fəaliyyətinin qarşısını almağa hesablanıb”.
Müşahidə Qrupu Beynəlxalq İnsan Haqları Federasiyası və İşgəncələr Əleyhinə Beynəlxalq Təşkilat qarşısında məsələ qaldıraraq Azərbaycan hakimiyyətindən aşağıdakıları tələb etmələrini istəyib:
- Hilal Məmmədovun və eləcə də Azərbaycanda bütün hüquq müdafiəçilərinin fiziki və psixoloji toxunulmazlığına zəmanət verilsin.
- Hilal Məmmədovun həbsi qanunsuz olduğuna və onun insan haqlarının müdafiəsi sahəsində fəaliyyətinin qarşısına almağa yönəldiyinə görə o, dərhal və qeyd-şərtsiz azad edilsin.
- Hilal Məmmədova qarşı işgəncə və qanunsuz davranış halları ilə bağlı bütün iddialar dərhal, hərtərəfli və şəffaf şəkildə araşdırılsın, məsuliyyət daşıyanlar aşkarlansın, müstəqil məhkəmə qarşısında qanunla nəzərdə tutulduğu qaydada cəzalandırılsınlar.
- Hilal Məmmədova və eləcə də Azərbaycanda bütün insan haqları müdafiəçilərinə qarşı hüquqi təzyiqlər də daxil olmaqla istənilən təqib formasına son qoyulsun.
- BMT-nin Baş Assambleyası tərəfindən 1998-ci il dekabrın 9-da qəbul edilmiş "BMT İnsan Haqları Bəyannaməsi”nin tələblərinə, xüsusən Maddə 1 ("Hər bir şəxs fərdi qaydada və ya başqaları ilə əməkdaşlıq formasında milli və beynəlxalq səviyyədə insan haqlarının qorunması və reallaşdırılmasını həyata keçirmək və ya buna can atmaq hüququna sahibdir”) və Maddə 12.2-yə ("Dövlət kompetent səlahiyyətlərlə hər kəsin zorakılığa, hədələrə, repressiyaya, de-fakto və ya de-yure qərəzli diskriminasiyaya, təzyiqlərə və istənilən qanunsuz hərəkətə qarşı müdafiəsini fərdi qaydada və ya başqaları ilə əməkdaşlıq şəraitində təmin etməlidir”) əməl edilsin.
- Azərbaycan tərəfindən ratifikasiya edilmiş beynəlxalq insan haqları standartları və beynəlxalq qanunvericilik alətlərinə uyğun olaraq istənilən şəraitdə insan haqlarına və fundamental azadlıqlara hörmət təmin edilsin. Tərcümə "Bizimyolinfo.com"dur
