 "Məbədi və kilsəni deyə bilmərəm, amma məscid səni yüz faiz qəbul etməyəcək!”
Yenicə təsis edilən Azərbaycan Dövlətçiliyi Naminə Demokratik Talış Birliyinin (ADNDTB) sədri Mehdibəy Səfərov son günlər mətbuatda və digər yerlərdə bu quruma qarşı səsləndirilən fikirlərə cavab verib. Qurumun sədri Mehdibəy Səfərov "Qafqazinfo”ya göndərdiyi müraciətinin bütün ölkə ictimaiyyətinə çatdırılmasını istədiyini deyib. Onları separatçılıqda ittiham edənlərə layiq olduqları şəkildə cavab vermək istədiyini bildirib. Biz də heç bir ixtisar etmədən M. Səfərovun müraciətini dərc edirik.
Yenicə təsis edilmiş Azərbaycan Dövlətçilyi Naminə Demokratik Talış Birliyinin sədri olaraq, ölkə ictimaiyyətinə bildirmək istəyirəm: Birliyimiz hələ fəaliyyətə başlamamış bir neçə iqtidaryönümlü Milli Məclis üzvü, eləcə də özlərini güya tərəfsiz ictimai-siyasi xadim, mətbuat nümayəndələri kimi təqdim edən bir neçə şəxs mətbuatda və sosial şəbəkələrdə çıxışlar edirlər. Onlar barəmizdə formalaşmaqda olan müsbət fikirləri çaşdırmaq niyyəti ilə ədalətsiz, qərəzli mülahizələr söyləyirlər. Birliyin təşkilatçılarını təhqir edib, hədə-qorxu gəlməkdən belə çəkinmirlər.
Təəssüf hissi ilə qeyd edirəm ki, daha çox ADN DTB-nin təsisçilərindən biri olan Azərbaycanın mütərəqqi fikirli ziyalısı, səmimiyyəti və əqidə prinsipiallığı ilə cəmiyyətimizdə özünəməxsus rolu olan ictimai xadim, ölkədə baş verən haqsızlıqların əlehinə mübarizliyi ilə seçilən, istedadlı kinodramaturqumuz Eldəniz Quliyevə qarşı çirkin niyyətli piar kompaniyasına başlanmışdır. Maraqlısı odur ki, bu sayaq total hücumların başlanmasına talışların kompakt yaşadığı Lənkəran rayonundan Milli Məclisdə deputat təyin olunan Hadı Rəcəbli start vermişdir. Kompetensiyasına aid və əslində həlli asanlıqla mümkün ola bilən bu problemlərə cavabdeh deputat onları aradan qaldırmağa heç bir səy göstərməmişdir. Xəcalət çəkiləsi odur ki, H. Rəcəbli yaratdığı problemlərə görə mənsub olduğu Talış xalqından üzr istəmək əvəzinə o hücüma keçir və üst-üstə qalaqlanmış həmin problemləri həll etməyə çalışan insanlara qara yaxmağa çalışır. Öz şəxsi maddi vəziyyəti və keçirdiyi həyat tərzi ilə öyünən deputat ona etibar olunmuş tribunadan sui istifadə edərək, dövlətimizin Ali İdarəetmə institutlarını və müvafiq olaraq ictimaiyyətimizi azdırmaq istiqamətində fəaliyyət göstərir. O, talışların bir etnos kimi milli varlığını sual altına qoyaraq, bu barədə kosmopolit və mürtəce fikirlər ifadə etməkdən çəkinmir. Belə olan halda, sual olunur: Təklifin nədir, Hadı müəllim? Talış övladları da Ç. Aytmatovun qələmə aldığı Jolamanmı olsunlar, Nayman analarınımı öldürsünlər? Nə edək? Bəlkə, bəşər sivilizasiyasının arxaik və fundamental dillərindən birini, eləcə də bütün maddi-mənəvi dəyərlərimizi özünüzlə bağlı elan etdiyiniz "gözəl həyatınıza”mı qurban verək? Ciddi səhvə yol verirsiniz! Talışlar düşündüyünüz təki dondurma və ya buz deyillər ki, bir "istidən” əriyib yox olsunlar! Barı, azca insafınız olsun!
MM-in deputatı kimi fəaliyyətinə və şəxsiyyətinə həmişə dəyər verdiyim Aydın Mirzəzadə! Axı, biz Sizdən ölkə etnopolyasında milli azlıqların özünü ifadə imkanları ilə bağlı daha müdrik, daha ədalətli və daha proqmatik addımlar gözləyirik. Lakin Siz, işıqlı bir yol göstərmək əvəzinə, Azərbaycan ictimaiyyətinə dağıdıcı, avantürüst fikirləri ilə bəlli olan bir neçə adama qoşularaq, ağına-bozuna baxmadan Birliyimizin təşkilatçılarını əsassız iddialarla günahlandırır, təhqir edir və hətta barəmizdə "haralarasa” məkrli ehyamlar vurursunuz. Aydın müəllim, bumudur demokratik yönümdə inkişaf etdirmək istədiyimiz Azərbaycan Respublikasında milli münasibətlərin konstruktiv tənzimlənməsində məntiqli və yeganə təklifiniz? Bu yollamı Avropaya inteqrasiya etməyi tövsiyə edirsiniz? Təəssüf ki, bu nəinki yol, heç cığır da deyil!
Hacıbaba Əzimov – "Assimlyator” aparatının cəngindən xilas ola bilmədiyi üçün milli mənliyini yadırğamış, artıq qocalmış bu talışa və köhnə böhtançıya düşdüyü psixoloji ekstazasiyaya görə halına acıyaraq, demək istəyirəm: - Məndən qat-qat yaşlı olduğun üçün tərbiyyəm təhqiramiz ifadələr işlətməyə yol vermir. Ömrünün ahıl çağında bu cür araqarışdıran yalanlarla nəyə nail olmaq istəyirsən? Axı, heç kimə sirr deyil ki, vaxtı ilə azərbaycanlıların qanını axıdanlardan biri olan erməni Stepan Şaumyanı hər iki elmi dissertasiyanda özünə ideal seçmisən! Axı, lənkəranlılar sənin rektorluqdan qovulmamaq üçün Əlikram Hümbətova necə yararlanmaq istədiyin haqda indi də lətifələr söyləyirlər. Uydurduğun cəfəngiyyatlara heç olmasa özün inanırsanmı, ay yazıq?
Hacıbaba, düşünürəm ki, sənin vəziyyətində olan adamın bircə nicat yolu qalıb. Məbədə, kilsəyə, ya da məscidə gedib, oradan bir daha çıxmamaq şərti ilə ömrünün sonuna qədər dua edib, Böyük Yaradandan bağışlanmağın üçün imdad diləmək!
Məbədi və kilsəni deyə bilmərəm, amma məscid səni yüz faiz qəbul etməyəcək!
Haqqımızda ölkə ictimaiyyətinə, yumşaq desək, dürüst olmayan məlumatlar verməklə, vətəndaşlarımızı yersiz şübhəyə salmaq istəyən insanlara demək istəyirik ki, ADN DTB Məramnaməsində açıq-aydın qeyd etdiyi kimi ölkəmizin bərabərhüquqlu vətəndaşları olan Talış xalqının dili, ədəbiyyatı, tarixi, etnoqrafiyası, toponomikası, musiqisi, xalq mahnıları, əmək nəğmələri, ana laylaları və digər maddi-mənəvi irsinin tədqiqi, təbliği və inkişafı ilə məşğul olmaqla fəaliyyətinə başlamışdır. Eyni zamanda, bir daha qətiyyətlə bildiririk: doğma vətənimiz olan Azərbaycanın dövlətçiliyinə, onun ərazi bütövlüyünə xələl gətirə bilən istənilən separatçı qüvvələrə qarşı mübariz olacağıq. Fəaliyyətimizə başlamamış barəmizdə nalayiq fikirlər səsləndirən insanlara isə "İnsafınız olsun, daha yetər ki, ölkə ictimaiyyətini bu qədər aldatdınız. Durun!” deyirik.
Yenicə doğulan körpə kimi saf niyyətli, kövrək bir Birliyi beşiyindəcə boğmaq istəyənlərə üz tuturuq: keçirtdiyiniz "ciddi narahatçılıqlara” baxmayaraq, ADN DTB faliyyətinə son qoymağı o zaman lazım biləcək ki, Azərbaycan dövləti Talış xalqının, o cümlədən bütün Azərbaycan vətəndaşlarının milli-mədəni və mənəvi irsinin qorunması və inkişafı ilə bağlı olan taleyüklü məsələləri öhtəsinə götürüb, onlarla məşğul olmağa güc və istək tapsın.
Bütün bunlara baxmayaraq Biz, dop-doğma vətənimiz saydığımız Azərbaycanı ürəkdən sevir, onun azadlığı və müstəqilliyi uğrunda canımızı fəda verməyə hazırıq. Azərbaycanlı olmağımızla qürur duyur və fəxr edirik! Hamınız Allah amanında!
Mehdibəy Səfərov
Azərbaycan Dövlətçiliyi Naminə Demokratik Talış Birliyinin sədri |
