 Bu Mirələmlidi, Əlidi, Pirəlidi bilmirəm, bunlar öz məddahlığı ilə Azərbaycana baş ucalığı gətirmirlər
YAP-çı deputat, yazıçı-dramaturq Hüseynbala Mirələmov Rusiyada yaşayan bir qrup Azərbaycan əsilli oliqarx tərəfindən yaradılan "Milyarderlər İttifaqı” və qarşıdan gələn prezident seçkisi ilə bağlı fikirlərini gün.az saytına verdiyi müsahibədə açıqlayıb. Deputat belə bir təşkilatın yaranmasını kökündən pisləyib:
"Mərhum dövlət başçımız Heydər Əliyevin gözəl, müdrik bir kəlamı var: hamımızın bir vətəni var - o da, Azərbaycandır. Kürdlərin də, talışların da, ləzgilərin də, avarların da, ümumiyyətlə, Azərbaycanda yaşayan bütün xalqların vətəni Azərbaycandır və bunlar birlikdə azərbaycanlılardır, azərbaycanlılar adlanır. Bu kəlamı xatırlatmaqla demək istəyirəm ki, Azərbaycanda başqa heç bir şeyə ehtiyac, əsas yoxdur. Sadəcə, bunlar separatizmdir və mən də bir azərbaycanlı kimi bunları pisləyirəm”.
O, bu yaxınlarda təsis olunan Talış Birliyi ilə bağlı da danışıb: "Hansısa bir Eldəniz (tanınmış kino-ssenarist Eldəniz Quliyev tərəfindən yaradılan Azərbaycan Dövlətçiliyi Naminə Demokratik Talış Birliyini (ADNDTB) nəzərdə tutur. G.M.), hansısa bir Həsən, hansısa bir Hüseyn etnik zəmində hər hansı bir cəmiyyət, təşkilat yaradırsa, bu, sadəcə olaraq, vicdansızlığın, qədirbilməzliyin, dönüklüyün əlamətidir, yediyin çörəyə qiymət verməməyin göstəricisidir. Hesab edin ki, bir ailədə on uşaq olur - ancaq görürsən ki, sonradan onun 7-8-i çox təmiz, ağıllı, vicdanlı, 1-2-si isə əksinə, vicdansız, namərd, dönük çıxır. Ona görə mən inanmıram ki, o boyda Rusiya - böyük bir imperiya hansısa bir Eldənizdən, Həsən-Hüseyndən istifadə edib Azərbaycanda qarışıqlıq yaratmaq istəsin...”
H.Mirələmov Azərbaycanda yaşayan azsaylı xalqlara qarşı hər hansı ayrı-seçkilik olmadığını da bəyan edib.
Eldəniz Quliyev "Yeni Müsavat”a verdiyi açıqlamada H.Mirələmovun ittihamlarına münasibət bildirib. "Nə deyirlər-desinlər, elə şeylərə çox da fikir vermirəm. Əsas odur ki, öz ziyalı missiyamızı yerinə yetiririk və o zonadan olan mütərəqqi fikirli ziyalılarla, alimlərlə və din xadimləri ilə bir araya gəlib dağınıq olan talış təşkilatlarını bir araya gətirmişik”, -deyə o bildirib. E. Quliyev deyib ki, etnik azlıqlara qarşı sayğısızlıq dövlətçiliyimizə təhlükədir və təşkilat bunun qarşısını almaq məqsədi güdür: "Burada əsas məqsəd talışların mədəni irsini, milli-mənəvi dəyərlər sistemini, dilini qorumaqdır. Eyni zamanda bərabərhüquqlu Azərbaycan vətəndaşları olmaqlarını dərk etdirməkdir. Çünki Azərbaycan təkcə azəri türklərindən ibarət deyil. Çoxsaylı millətik, hamımız eyniyik və Azərbaycan vətəndaşıyıq. Son zamanlar baş verən hadisələr, bəzi məmurların özbaşınalığı dövlətçiliyə təhlükə yaradır. Ziyalılar Birliyi yaranandan bu təzyiqlərin içindəyəm. İstiqlaliyyət, demokratiya, mənəviyyat, milli-mənəvi dəyərlər uğrunda mübarizə aparırıqsa, təzyiqlər həmişə olacaq”.
E.Quliyev H.Mirələmovu zavallı adlandırıb: "Siyavuş Novruzov, Mübariz Qurbanlı da onun kimi danışdı və cavabını aldı. Mənimçün Hüseynbala Mirələmovun deputat olmağı ilə hansısa bir kələmin o kresloda oturmağı eyni bir şeydir. Bu Mirələmlidi, Əlidi, Pirəlidi bilmirəm, bunlar öz məddahlığı ilə Azərbaycana baş ucalığı gətirmirlər. Bu deyilənlərə oğrunun qışqırtısı kontekstindən baxıram. Onun kimiləri mərdi qovmaq səriştəsinə malik olan insanlardır. Hüseynbala Mirələmovu hər yerdə yazıçı-dramaturq kimi təqdim edirlər. Ancaq mən elə bir yazıçı-filan tanımıram. Onun savadı heç bir imla yazmağa da bəs eləməz”.
E.Quliyev Prezident Administrasiyasının rəhbəri Ramiz Mehdiyevin ziyalılar barədə dediyi fikirlərə də münasibət bildirib: "Ramiz Mehdiyev deyir ki, Azərbaycanda yüz minlərlə ziyalı var. Əgər o, Hüseynbala Mirələmov kimi adamları ziyalı sayırsa, onda mümkün deyil ki, yüz min ziyalı olsun. Yüz min siğə ola bilər. Qoy onlar bu məsələyə ciddi yanaşsınlar. Ziyalı öz xalqının, vətəninin heykəlini qoyan insana deyirlər. Əgər ölkənin yüz min ziyalısı varsa, onda niyə Azərbaycan bu gündədir? Əgər bunlar Ziyalılar Forumunun bostanına daş atırsa, bu onların sonunun başlanğıcı deməkdir” (Yeni Musavat). |
