Müxalifət qəzetləri indi də hakimiyyətin "Siyasi partiyalar haqqında” qanuna dəyişiklik etmək arzusundan yazır. Bu da nədi? Hakim partiya istəyir qanunu elə fırlatsın ki, ortalıqda təkcə özü qalsın. Yəni hakimiyyət təkpartiyalı siyasi sistem qurmaq əzmindədir.
İndi əyri oturaq, düz danışaq, nə fərqi var, lap istəyirsən, düz oturub əyri danışaq. Ölkədə bir partiya var, o da hakimiyyətdədir, Yeni Azərbaycan Partiyasıdır. Elə bu, bircəciyi bəsimizdir, bunun öhdəsindən güclə gəlirik.
Sən bunun adındakı birinci sözə fikir ver: Yeni! Yəni həmişə yeni olacaq, həmişə hakimiyyətdə qalacaq, köhnəlmə söhbəti yoxdu, daim parlayacaq! Bu partiya üzvlərinin köhnə şeylərlə arası yoxdu. Yaşadıqları mənzil yeni tikilən binalarda olmalıdı. Hər il yeni malikanə tikdirməlidirlər. Onlarda bir dənə də olsun köhnə maşın tapa bilməzsən. Əvvəldən necə deyiblər, eləcə də eləyirlər, hər şeyləri yenidi. Bunlarda köhnə paltar görə bilməzsən. Evlərində vaxtı keçmiş kolbasa, sosiska, pivə, yumurta, ananas görməzsən, hər şeyləri svejidi. Yeni!
Keçək ikinci sözə: Azərbaycan! Can Azərbaycan! Sənə can qurban, ay Azərbaycan! Fəxrimsən, canımsan, qanımsan! Sən doğma diyarsan! Ayrı ölkələrdə bir-iki iqlim qurşağı varsa, səndə ondan doqquz dənədi! Sinən üstü yaşıl zəmi, buruqların gəlməz saya, qartalların zirvələrdə qıy vurar, bol pambıqlı gen tarlaların var, ey Azərbaycan! İnsanların evlərində can verəndə boruların neft-qazla çoxlu ölkələrə qan verir. Uşaqpulu verməsən də işıqpulunu yaxşı yığırsan. Qocalara qocalıqpulu verməsən də qazpulunu yaxşı yığırsan. Tələbəyə təqaüd verməsən də təhsilpulunu yaxşı yığırsan!
Vətəndaşa pasportu da od qiymətinə verirsən, can Azərbaycan! Çinin dermantin, rezin paltarları olmasaydı, insanların lüt gəzərdi, Azərbaycan! Limonsatan, trusiksatan, qarınsatan, piraşkisatan igidlərin, qarıların, qocaların gəlməz saya, bənzəyirsən Günə, Aya! Kəmaləddinin, Bəylərin var, Azərbaycan! Rövnəqin də milyonerdi, Abutalıbovun da milyonerdi, Azərbaycan, Azərbaycan!
Çox keçmişəm bu dağlardan, mən gəlmişəm o dağlardan, Ziyan çoxdan milyarderdi, Kəmaləddin də milyarderdi, can, can, can ay can, ey Azərbaycan! Cahangirin pullarına azal dedim, azalmadı, Allahşükürün pullarına qəzəl dedim, qəzəlmədi, Tağı məllimin pullarına jeton dedim, jetonmadı, Misir məllimin pullarına utan dedim, utanmadı! Dediyinə görə, sən xalq artisti Faiq Ağayevin namususan, qeyrətisən, Azərbaycan!
Ziyanın təzə gətirdiyi taksilərin rəngi badımcan, can Azərbaycan! "Şahdəniz”dən qaz çıxar, fikirdən adamın başı səhərə daz çıxar, Azərbaycan! O tayda qalıbdı Vasif Talıbov, bu tayda qalıbdı Abutalıbov, ey Azərbaycan! Milli Elmlər Akademiyan var, Milli Məclisin var, külli universitetlərin var, ey şanlı Azərbaycan! Döyülmüş, ağzı-burnu qanlı Azərbaycan!
Keçək üçüncü sözə, burda böyük hikmət var: Partiya! Sən hələ sözün kökünə, özülünə, dibinə bax: "Part”! Gurultuya, əzəmətə fikir verdinmi?! Beşaçılan kimi açılır, paaaaart!!! YAP-çılar uşaq deyil ki, oturub günlərini ucuz siyasətlə yola versinlər. Elə şey yoxdu! Partiya sözünün içində hazırca ayrı məqsədlər də durur. Alver üçün ən əlverişli sözdü. Məsələn, ölkəyə banan vurursan, gömrüyə zəng eləyirsən ki, banan partiyası mənimdi, onlar da rüsum almırlar. Gördün, partiya sözü harda lazım oldu?
Yaxud İrandan kartof-soğan vurdun, zəng eləyib deyirsən ki, bu partiya mənimdi. Deyək ki, Qazaxstandan taxıl, Dağıstandan guya rus arağı vuranda da ortaya partiya söhbəti gəlməlidi. Yoxsa bütün günü oturasan ofisdə, nə var-nə var, siyasi partiyadı, nə bilim, yığıncağımız var, əl çalmaq lazımdı. Yeri gələndə əl də çalırıq. Ancaq siyasət olan yerdə ticarət də lazımdı, ticarət olan yerdə cinayət də lazımdı!
İndi deyin, bizim YAP-dan özgə siyasi partiyaya ehtiyacımız varmı?
Murad KOHNƏQALA