Azərbaycan Respublikası Ali Məhkəmənin barəmdəki qondarma cinayət işinə baxacaq hakim heyətinin sədri İnqlab Nəsirova
Müraciət (açıq məktub)
Möhtərəm Məhkəmə! Möhtərəm sədr!
Barəmdəki Bakı Apellyasiya Məhkəməsinin qərarından şikayətlə bağlı qondarma cinayət işinin baxışı nəhayət 12 iyun 2014-cü tarixində Sizin sədrliyinizlə baxışa təyin edilmişdir. Tamamilə haqsız və əsassız olaraq həbsdə olduğum bu 2 il ərzində keçirilən bütün digər məhkəmə-istintaq proseslərində olduğu kimi, mətni əvvəlcədən tələm-tələsik və şablon ifadələrlə tərtib edilmiş və 5 dəqiqəlik formal məhkəmə məşvərətindən sonra müvafiq məhkəmə qərarınızı elan etməmişdən öncə, Sizin də nəzərinizə bəzi vacib qeyd və tövsiyələrimi çatdırmaq istərdim.
Əvvəla, şəkk etmirəm ki, heç bir hüquqi, məntiqi və əxlaqi çərçivəyə sığışmayan və söz yığınıyla düz-qoş edilmiş qondarma cinayət işimin inşasında iştirak etmiş əməliyyatçılar, müstəntiqlər, prokurorlar, hakimlər, şahidlər və ekspertlər kimi Siz də həm ölkəmizi, həm də onun hüquq-mühafizə və istintaq-məhkəmə sistemini cəmi dünyada rüsvay etməkdə olan bu qərəzli və biabırçı vəziyyətdən necə çıxmaq barədə heç də az fikirləşməmisiniz...
İkincisi, yalnız 1-2 bədii filmlərdəki səhnələr istisna olmaqla, ömrümdə “narkotika” adlı zəhrimarın heç şəklini belə görməsəm də, yaxın gələcəkdə cəmi bəşəri, o cümlədən, ölkəmizin əhalisini məhvə doğru aparacaq bu murdar maddəni satan, yayan və istifadəçilərinə qarşı barışmaz bir mövqedə olan bir alim, pedaqoq, dindar, hüquq müdafiəçisi və azadfikirli yazarın (məlum bir videorolikə verdiyi şərhdən sonra) cibinə nümayişkarənə surətdə narkotik atdırıb və sonra da heç olmasa görüntü xarakterli sübutlardan ötrü doktiloskopik, psixoloji və i.a. vacib olaraq tələb edilən ekspertizaları təyin etmədən onu “narkobaronluqda” ittiham etmək Sizcə hansı bəşəri əxlaqa sığışır?
Ücüncüsü, 7 saylı CÇM-də 6 ilə yaxın müddət ərzində cəza çəkməkdə olan, 40 ilə yaxın vaxtda KGB – MTN agenti kimi minlərlə günahsız insanların şərlənib həbs olunmasında (o cümlədən “Tolışi Sədo” qəzetinin məndən oncəki redaktoru mərhum prof. N.Məmmədovun) istifadə olunan zombiləşdirilmiş bir ruhi xəstəyə diqtə edilmiş növbəti cəfəngiyyat əsasında barəmdə CM 274 (dövlətə xəyanət), 283.2.2 (milli-dini ayrıseçkilik salma) maddələriylə (guya, 1992-ci ildən İranın XXO tərəfindən ələ alınaraq, onların vasitəçiliylə narkotika alış-verişindən gələn gəlirlə ölkəmizin konstitusiya əsaslarını sarsıtmaqda) ittiham vermək Sizcə hansı elementar hüquqi, mənəvi, əqli məntiqə sığışar?
Dördüncüsü, heç bir ciddi yoxlama ya məhkəmə istintaqı aparılmadan, sadəcə olaraq, “əməliyyat sirridir” deməklə canlarını qurtarmağa cəhd edən ölkənin baş prokuroru (Z.Qaralov) və baş polisinin (R.Usubov) həbsimdən (21.06.2012) 2 həftə sonra, 4 iyul 2012-ci ildə barəmdə yaydıqları (bilavasitə həmin KGB-MTN agentinin sərsəmləmələrinə istinad edərək) cəfəngiyyat açıq-aşkar şəkildə təqsirsizlik prezumpsiyası hüquqlarımın pozulması demək deyildirmi? Görəsən 2 ildən bəri həmin iki orqana qarşı davam etməkdə olan məhkəmə çəkilşmələrimlə bağlı son məhkəmə iclasının da məhz əsas işimizə baxışla bir günə (12.06.2014) və bir saata (11-00) (sadəcə olaraq müxtəlif zallarda) salınması da təsadüfdürmü? Yoxsa vəkillərimin sayının 2 nəfər olduğunu nəzərə alıb məhkəmə vaxtına qənaətdən ötrü belə qərara gəlinib? Bəs, onda biz cismən necə ikiyə bölünək? Yoxsa bizlərə orda iştirak etməyə ehtiyac da yoxdur, - məlum formal “5 dəqiqəlik” məşvərətdən sonra şablon qərarı 1-2 aya poçtla alacağımızı intizarla gözləyək?
Beşincisi, mübaliğəsiz deyirəm ki, zindanda olduğum bu 2 ilin ərzində bəlkəm bircə dəfə də olsa, öz gələcək şəxsi taleyim – azadlığım barədə yox, bilavasitə sizlərin bu haqsızlıq xaosundan qurtuluşuna yardımçı olmaq barədə fikirləşmiş, özümü elə bu zindan həyatımda da azad və xoşbəxt sanmış və tam yəqinliklə (!) əmin olmuşam ki, o mütləq Haqq və Ədalət Sahibi haqqı nahaqa verməz, məni və cəmi haqqsevər bəndələrini haqsızlıq zülmündən tezliklə qurtatar, inşallah...
Altıncısı, bütün yuxarıda deyilənləri nəzərə alaraq cəmi digər istintaq-məhkəmə proseslərinin inşaçılarına tövsiyyə etdiyim kimi, Sizi də vicdanınızın səsini dinləyərək 2х2=4 olduğunu demək haqqınıza sahib çıxmağa və bununla da cismən və ruhən AZAD olmağa çağırıram. Bundan ötrü, ilk addım kimi, vəkillərimin kassasiya şikayətlərini təmin edib bu qondarma “cinayət” işinə bəraətverici əsaslarla xitam verməyinizini xahiş edirəm. İnanın ki, belə bir cəsarətli və şərəfli addımınızla özünüzü xilas etməklə yanaşı, bu kimi qondarma – biabırçı işlərin arxasında duran digərlərini də bu barədə düşünməyə sövq etmiş olarsınız...
Düşünün... Həm özünüzün, həm ailə və yaxınlarınızın, həm ölkəmizin, həm də cəmi bəşəriyyətin xilası naminə düşünün... “Həqiqətən də Allah dərgahında canlıların ən pisi (şərlisi) düşünmədən yaşayan lallar və karlardır” (8: Ənfal: 22).
Hilal Məmmədov,
vicdan məhbusu
