 Hər bir insanın bəsirət gözü var. Bu bəsirət gözünün tam açıqlamasını verə bilmərəm, ola bilsin ki, hansısa bir yanlışlıqa yol verim, ancaq onu bilirəm ki, bu bəsirət gözü bağlananda aləm dəyir biri-birinə....
Hilal Məmmədova Azadlıq! Bunu mən demirəm, mən nə karəyəm ki, Hilal Məmmədovu tu(tdur)anlardan bunu tələb edim, bunu bütün dünya ictimaiyyəti deyir, Hilal müəllimin dərhal azad edilməsini tələb edirlər. Amma onlar başa düşmürlər ki, Azərbaycan Avropa Şurasının üzvü olsa da, Avropa ola bilmir. O bədbəxtlər hələm də Azərbaycanda hökm edən rejimin idarə üsulunun adını tapa bilmirlər, gah "diktatura” deyirlər, gah "monarxiya” deyirlər, gah "anarxiya” deyirlər və sairə və sairə... Hə, indi bu beynəlxalq təşkilatlar təpki göstərirlər ki, Hilal Məmmədov günahsız yerə həbs olunub, onu azad edin, bir Əli Həsənovumuz var, o, dirəniş göstərir ki, olmaz! "Niyə olmaz?” sualının cavabını bilmir, bircə onu bilir ki, OLMAZ! Olmaz, olmaz da, o Hilal müəllim, o da siz, Azərbaycanın "demokratik və tolerant” adlı ağacına (oxu: imicinə) nə qədər istəyirsiz balta çalın, onsuz da o ağacın təkcə kötüyü qalıb, qalanını doğrayıb qurtarmısız. Artıq sizlərin "toleranTİZm” nağılınıza heç aparıcı etnos olan türklər də inanmırlar, necə inansınlar ki, Talış Mədəniyyəti Mərkəzinin konfransı keçirilən çayçının müdürini "ora” çağırıb, "qudurmusan, Talış separatçıları (?) üçün şərait yaradırsan?” hədə-qorxusun gəliblər, iki min manat da cəriMƏLƏDİBLƏR! Necə inansınlar ki, Bakıdakı köşklərdə "Tolışon Sədo” qəzeti gizlədilir, qəzetin yazarları incidilirlər! Necə inansınlar ki, Avropaya təmənnasız olaraq milyonlar yatızdıran, orada kilsələr tikdirən Azərbaycan hökuməti Talış Mədəniyyəti Mərkəzinə 20 kv.m sahəsi olan bir ofis vermir! Necə inansınlar ki, 20 il bundan əvvəl çap olunmuş "Talış Dili” dərslikləri bu 20 ildə bir dəfə də olsun yenilənməyib! Və s. və i.a. İndi bu "tolerant” ölkə dünyanı və Azərbaycanı inandırmağa çalışır ki, Hilal Məmmədov narkobaron imiş! (puluna minnət) İnandıracaq da! Hilal Məmmədovun bankda bir neçə milyonluq hesab nömrəsi aşkarlanacaq, hər bir məmur yüzlərlə villalarından bir-ikisini dərhal Hilal Məmmədovun adına keçirdib, onu Azərbaycanda ən çox villası olan kimi təqdim edəcəklər, İran hökumətindən "iltizam” alacaqlar ki, Hilal Məmmədov onlara 7 ədəd qırıcı təyyarə və iki ədəd sualtı qayıq icarəyə verib, Ermənistandan iltizam alacaqlar ki, "Karmen” ununu və "AzərSun” məhsullarını Ermənistana təmannasız Hilal Məmmədov göndərir, Rusiyanın Dumasında Putin qardaşa "davay, dosvidaniya” deyən deputatlardan iltizam alacaqlar ki, bunu onlara deməyi Hilal Məmmədov tapşırıb və buna görə hərəsinə 1 milyon pul ödəyib, Əliağa Vahiddən iltizam alacaqlar ki, ona I katibə "bəs sən kimsən?” deməyi də Hilal müəllim tapşırıb və buna görə ona bir "SovTransAvto” gürcü çaxırı verib, Don Karleonedən iltizam alacaqlar ki, Hilal Məmmədovun qorxusundan o narkobizneslə vidalaşıb, Kolumbiyadakı narkotik tarlalarından və zavodlarından canlı yayım təşkil edib, həmin tarlaların və zavodların da Hilal müəllimə məxsus olduğunu göstərib, bizi inandıracaqlar ki, Hilal Məmmədov narkobarondur. Sonra Hilal müəllimə iş kəsib, ona”məhkəmə materiallarına lazım olduğu üçün” icarə verdikləri villaları, bir neçə milyon pulu və ... 34 qrama yaxın (deyilənlərə görə "kassa məxaric orderində” heroinin çəkisi 36 qram göstərilir, dəqiqliyi xoşlayan narkobiznes idarəsinin başı indi həmən çatışmayan 2 qramdan yuxarı heroinin axtarışına qarışıb, molodes, kimsə fərasətli çıxıb, Hilalın cibinə narkotik atılan vaxt "qatma-qarışıqlıqdan” istifadə edib 2 qramdan çox heroini "hettiyə” bilib) heroini müsadirə edib, aralarında böləcəklər, vəssalam, şüt tamam.
Talışlara pay boxçası
Bu pay boxçasını bizə Həzi Aslanovun "idarəsindən” göndəriblər! Həzi Aslanovun əməkdaşları Hilal Məmmədovu döyərkən talışlara heç nə saxlamayıblar, bizi nəyi var təhqir ediblər, düzdür, arada, yəni şillə-təpikdən başı bir az açılan Hilal müəllim "özüvüzsüz” deyirmiş, zatən qolları qandallı bir şəxsin bundan artığına gücü də çatmazmış. Mən bu nömrə bu məsələnin üstündən qismən keçirəm, yəni ki, bir həftə həm Həzi Aslanovun, həm hörmətli Şeyximizin, həm də MM-də, MTN-də, DİN-də oturan talış kökənlilərin reaksiyasını gözləyəcəm, ya həmən insanlar həbs ediləcəklər, ya da mən bunu bütün dünyaya car edəcəm, mən bütün dünyaya car edəcəm ki, tolerant Azərbaycanda gədalar Qafqaz Müsəlmanlarının rühani başçısını ağlagəlməz sözlərlə təhqir edirlər. Hələlik mən bunu Azərbaycanın daxilində car edirəm, nəticəsi olmasa mən bunun sərhəddən "keçirtmə” yollarını bilirəm, sonra nə Şeyx, nə Həzi Aslanov, nə də qeyrisi mənə deməsin ki, bu məsələni burda həll ettmək olardı, bizə niyə deməmisən? Deyirəm: Şeyx, Həzi Aslanovun işçiləri sənin millətin üçün heç nə saxlamayıblar, eşitdinmi????
Meyxanaçı Valeh Likij..
Mən Valehi yaxından tanımırdım, telequtuda "meyxana çempionatında” görmüşdüm, amma ona qarşı bir simpatiyam var idi, lakin bu simpatiyanı Valehin bizim qəzet haqqında yaxşı danışmaması haqqında məlumat pozdu, mən də onun haqqında bir balaca informasiya verdim, daha Valeh adlı adamı tanımayacağımı yazdım, üstündən xeyli keçib, biz bu 4-cü gün Valehlə görüşdük, yazıdan çox narahat olduğunu bildirdi, təkzib verməyimizi istədi, zatən biz onun haqqında alçaldıcı və imicinə xələl gətirə biləcək heç nə yazmadığımız üçün təkzibin hansı formada yazılmasını fikirləşib, tapa bilmədik, qərara gəldik ki, elə Valeh haqqında növbəti saylarımızın birində geniş bir yazı, ola bilsin ki, lap müsahibə verdək, təbii ki, Valehin buna istəyi olarsa, və həmin müsahibədə Valehin bütün iradlarını yazaq, həm təkzib olar, həm də bizi maraqlandıran suallara cavab taparıq. Qayıdaq Valehlə görüşümüzə, onunla təqribən 30-35 dəqiqəlik söhbətimdən sonra bu adamın millətinə necə vurğun olduğunu anladım, başa düşdüm ki, Valeh Likij bizim millətə bu gün çox lazımdır, onun yaşının az olmasına baxmayaraq məntiqi məni heyran etdi, Valeh oxumadığı yazıya görə bizdən inciyib, amma böyüklərimiz "hər br tənqiddə az da olsa hikmət var” deyiblər, şəxsən məni özümün bu qəzetimdə iki dəfə tənqid ediblər, mən həmən tənqidlərin dərcini yasaqlamadım, ictimai müzakirəyə buraxdım, tənqid müəlliflərindən incimədim, ümüdvaram ki, Valehin də incikliyi keçib gedər və o bizə geniş bir müsahibə verər, hazırsanmı Valeh?
Mənə TV verin!!!
Talışlara bir TV kanalı hökmən verilməlidir, mən bunu daima tələb edəcəm, sonra deməsinlər ki, "siz nə vaxt TV istədiz?”, ey, Nuşirəvan Məhərrəmli, biz TV istəyirik, eşidirsən, TV...
Yenə Hilal Məmmədov...
"Siz Moskvada piket etməyin, Hilal Məmmədovun həbsi səhf addımdır və ona qarşı bu şər ittihamları irəli sürənlər öz layiqli cəzalarını alacaqlar!”. Bu cümlə də mənə məxsus deyil, bu cümlə "Heydər Əliyev Fondu”nun Moskva təmsilçiliyinə yaxın olan bir nəfərin dediyi cümlədir və həmən adam bu sözü sıravi bir adama yox, məhz Rusiya Talış Diasporasının sədri İsmayıl Şabanova deyib, nə deyirik ki, təki bu səhf düzəlsin, Hilal Məmmədovun cibinə narkotik atanlar, o narkotiki atdıranlar, millətimizi təhqir edənlər cəzalandırılsınlar, biz buna ancaq və ancaq sevinə bilərik! Səhfləri düzəltmək olur, kim səhf etmir ki????
Rafiq CƏLİLOV,
celilovrafiq@mail.ru,
"Tolışon Sədo” qəzeti, nöm: 23(35) 30 iyun 2012
|
