MTN və ifrat türkçülər "Tolışi sədo” qəzetinin məhbus təsisçisi və baş redaktoruna qarşı səlib yürüşünə çıxıblar
"Yeni Müsavat" qəzeti MTN tərəfindən verilən filmləri əsas götürərək, iddia edib ki, "Tolışi sədo” qəzetinin təsisçisi və baş redaktoru, hazırda dövlətə xəyanət və digər ağır ittihamlarla həbsdə olan Hilal Məmmədovun sensassion videogörüntüləri yayılıb.
MTN-in "Azpolitika" və "Yeni Müsavat" qəzeti vasitəsi ilə yaydığı 58 dəqiqəlik kadrlarda iddia olunur ki, Hilal Məmmədov "Talış-Muğan Respublikası” adlandırılmış respublikanın təsisi yığıncağında sədarətdə - Əlikram Hümbətovun solunda əyləşib!
"Tolışi Sədo" qəzetinin məhbus baş redaktoruna separatçılıq ittihamına əsas olan eyni videoda başqa bir maraqlı məqama - Əlikram Hümbətovun Heydər Əliyev, Surət Hüseynov və Rəhim Qazıyevlə keçirdiyi görüşlərlə bağlı verdiyi məlumatlara isə bilərəkdən diqqət yeririlmir... Məlum olur ki, Surət Hüseynov, Rəhim Qazıyev və Əlikram Hümbətovun üçlükdə danışıqları da olub. Daha sonra Surət Hüseynov Heydər Əliyevlə görüşüb və Əlikram Hümbətovun onunla görüşünü təşkil edib. Əlikram Hümbətov deyir ki, o və Rəhim Qazıyev Heydər Əliyevlə görüşdə irəli sürüləcək tələbləri də razılaşdırıblarmış. Amma görüş onların istədikləri kimi keçmir. Kabinetə daxil olan kimi Heydər Əliyev Rəhim Qazıyevi qovur və söhbətin məcrası dəyişir.
Hilal Məmmədova qarşı təbliğatda "Yeni Müsavat" qəzeti hökumətin mövqeyi və istintaq tərəfindən qaldırılmış dövlətə xəyanət ittihamını dəstəkləyib.
Hilal Məmmədov fizika-riyaziyyat elmləri namizədidir. O, ötən əsrin 90-cı illərinin əvvəllərində Azərbaycan Xalqların Bərabərliyi Partiyasının sədri olub. Partiyanın fəaliyyəti qadağan edildikdən sonra Azərbaycanı tərk edib və 12 il Rusiyada yaşadıqdan sonra 2005-ci ildə Azərbaycana qayıdıb. 2007-ci ildə "Tolışi Sədo” qəzetinin əvvəlki redaktoru- Novruzəli Məmmədov həbs edildikdən sonra onun hüquqlarının müdafiəsi komitəsini yaradıb və ona rəhbərlik edib. Novruzəli Məmmədov həbsdə vəfat etdikdən sonra "Tolışi Sədo” qəzetinin baş redaktoru Hilal Məmmədov olub. O, ötən il iyunun 21-də həbs edilib.
