 Noyabrın 12-də Helsinki Vətəndaş Assambleyasının Azərbaycan Milli Komitəsinin ofisində hüquq müdafiəçisi, "Tolışi Sədo" qəzetinin baş redaktoru Hilal Məmmədovun Hüquqlarının Müdafiə Komitəsinin növbəti iclası keçirilib. İclasda H.Məmmədovun vəkili Xalid Bağırov çıxış edərək bildirib ki, təxminən 2 aya yaxındır ki, H.Məmmədovun işi ilə bağlı istintaqda heç bir irəlləyiş yoxdur. Vəkil deyib ki, H.Məmmədovun işində baş verən qanun pozuntuları haqda məhkəmələrə şikayətlər etsələr də, şikayətləri ya təmin olunmur, ya da ki, rədd edilir. O, əlavə edib ki, məhkəmələrin həmin qərarlarından apeliyasiya şikayəti versələr də, Apeliyasiya məhkəməsi birinci instansiya məhkəməsinin qərarını qüvvədə saxlayır: "Tutulan zaman Hilal Məmmədova xəsarət yetirilməsi ilə bağlı Baş prokurorun birinci müavini Rüstəm Usubovun nəzarətində araşdırma aparıldı və cinayət işinin başlanılması rədd edildi. Amma ekspertiza xəsarət haqda rəy vermişdi. Həmin qərarı qanunsuz hesab edərək məhkəməyə müraciət etdik. Məhkəmə iddiamızı qəbul etmədi. Məhkəmənin bu qərarından apeliyasiya şikayəti verəcəyik”, - deyə vəkil qeyd edib.
H.Məmmədovun istintaqa ifadə vermədiyini xatırladan X.Bağırov bildirdi ki, son 2 ayda istintaq H.Məmmədovdan ifadə almaq üçün ona müraciət etməyib: "İstintaqın hansı iş aparması haqda heç bir məlumatımız yoxdur”.
H.Məmmədova qarşı irəli sürülən ittiham haqqında söz açan vəkil əlavə etdi ki, ittihamda H.Məmmədovun İranın "Səhər-2” telekanalına, İranda çap olunan jurnala verdiyi müsahibələr, hüquq müdafiəçisi kimi beynəlxalq təşkilatlara göndərdiyi hesabatlar, tələbələrinə etdiyi müraciət yer alıb. Bundan əlavə ittihamda H.Məmmədovun tərcümə etdiyi kitab və mətbuat konfranslarında etdiyi çıxışlar da əks olunub. Vəkil qeyd etdi ki, H.Məmmədov heç bir kitabı tərcümə etməyib.
Komitə üzvü, politoloq Zərdüşt Əlizadə bildirdi ki, H.Məmmədovu ictimai-siyasi və aktiv hüquq müdafiəçiliyi ilə məşğul olduğu üçün həbs ediblər. Komitə üzvü, Azadlığın və Sülhün Müdafiəsi Beynəlxalq Hüquq Təşkilatının sədri Mətləb Mütəllimli təklif etdi ki, istintaq zamanı baş verən qanun pozuntuları sənəd şəkilində hüquq müdafiəçilərinə təqdim edilsin və hüquq müdafiəçiləri də həmin pozuntularla bağlı prezidentə, baş prokurora müraciət etsinlər.
Komitə üzvü, Hüquq Müdafiəçilərinin Monitorinq Qrupunun üzvü Novella Cəfəroğlu əlavə etdi ki, istintaqdakı həmin pozuntularla bağlı Avropa Şurasına da məlumat göndərmək lazımdır. Komitənin həmsədri, Helsinki Vətəndaş Assambleyasının Azərbaycan Milli Komitəsinin rəhbəri Arzu Abdullayeva isə dedi ki, H.Məmmədovun həbsinin arxasında hələ ki başa düşünülməyən siyasi məqsəd durub.
Komitə üzvü, Azərbaycan Dövlətçiliyi Naminə Demokratik Talış Birliyinin rəhbəri Mehdibəy Səfərov hesab edir ki, H.Məmmədovu həbs etməkdə kimlərinsə böyük bir təhlükə yaratmaq məqsədi var: "Buna görə də Hilal Məmmədovun həbsdən tez azad edilməsinə çalışmaq lazımdır”.
X.Bağırov onu da bildirdi ki, H.Məmmədovun işində İnsan hüquqlarının və əsas azadlıqların müdafiəsi haqqında Avropa Konvensiyasın maddələri üzrə baş verən qanun pozuntuları haqda Avropa İnsan Haqları Məhkəməsinə, Avropa Şurası Parlament Assambleyasının Azərbaycanda siyasi məhbuslar üzrə xüsusi məruzəçisi Kristof Ştrasserə, Amnesty İnternational təşkilatına məlumatlar göndərilib.
A.Abdullayeva dedi ki, Bakıda səfərdə olan Avropa Komissiyasının vitse-prezidenti Nilie Kroes görüş zamanı H.Məmmədovun işi ilə maraqlanıb və onun həbsi haqda xanım Kroesə ətraflı məlumat verilib.
Sonda komitə üzvləri H.Məmmədovla bağlı prezident İlham Əliyevə, Prezident Administrasiyasının hüquq mühafizə orqanları ilə iş şöbəsinin müdiri Fuad Ələsgərov, ədliyyə naziri Fikrət Məmmədova, Penitensiar Xidmətin rəisi Mədət Quliyevə müraciət etmək qərarına gəldilər.
Müraciətdə deyilir: "Hilal Məmmədovun Hüquqlarının Müdafiə Komitəsi Sizə müraciət edərək bildirir ki, hazırda həbsdə olan və istintaqı davam edən Hilal Məmmədov ağır astma xəstəliyindən əziyyət çəkir. Həbsxana şəraitində onun xəstəliyi daha da kəskinləşmiş və təhlükəli həddə çatmışdır. Həbsxanada ona müalicə aparılsa da belə, qapalı, havasız şəraitdə xəstəliyi tüğyan edir və onun ciddi müalicəyə ehtiyacı var. Hilal Məmmədovun həbsxanada ağır fəsadlarla nəticələnə bilən taleyi bizi narahat etməyə bilər.
Biz Sizə müraciət edərək xahish edirik, Hilal Məmmədovun ağır xəstəlik durumunu nəzərə alaraq, qəti imkan tədbirinin ev dustaqlığı ilə əvəz edilməsi üçün yardım edəsiniz”.
Müraciəti Helsinki Vətəndaş Assambleyasının Azərbaycan Milli Komitəsinin rəhbəri Arzu Abdullayeva, Respublika Talış Mədəniyyət Mərkəzinin rəhbəri Əli Nəsirov, Ziyalılar Forumunun üzvü Eldəniz Quliyev, Azərbaycan Dövlətçiliyi Naminə Demokratik Talış Birliyinin rəhbəri Mehdibəy Səfərov, İnsan Haqları Monitorinq Qrupunun üzvü Novella Cəfəroğlu, Beynəlxalq İnsan Hüquqları Cəmiyyətinin Azərbaycan Milli bölməsinin rəhbəri Səadət Bənənyarlı, İnsan Hüquqları və Qanunçuluğun Müdafiəsi Bürosunun rəhbəri Səidə Qocamanlı, Respublika Talış Mədəniyyət Mərkəzinin rəhbərinin müavini Rafiq Cəlilov, vəkil Xalid Bağırov, politoloq Zərdüşt Əlizadə, Avropa Dəyərlərinə İnteqrasiya İctimai Birliyinin rəhbəri Elnur Məlikov, Azadlığın və Sülhün Müdafiəsi Beynəlxalq Hüquq Təşkilatının sədri Mətləb Mütəllimli, Siyasi Azadlıqları Müdafiə Alyansının koordinatoru Samir Kazımlı, jurnalist İlham Rəsulzadə, fəal Təvəkkül Şərifov imzalayıblar.
Gozetci.az
|
