21 iyun 2012-ci ildə nümayişanə surətdə şərlənərək həbs edilən riyaziyyatçı alim, hüquq müdafiəçisi, "Tolışi Sədo" qəzetinin baş redaktoru Hilal Əlif oğlu Məmmədovun hüquqlarının müdafiə Komitəsi Azərbaycan Respublikasının Prezidenti İlham Əliyevə müracıət ünvanlamışdır.
Müraciətdə deyilir: "Hilal Əlif oğlu Məmmədov yaşadığı evin yaxınlığında 7 nəfər mülki geyimli şəxslər tərəfindən saxlanılmış, ona güc tətbiq edilməklə cibinə narkotik vasitə atlıaraq Narkotiklərə qarşı Mübarizə İdarəsinə aparılmışdır. Daha sonra H.Məmmədovun vəkilinin iştirakı olmadan onun evində axtarış aparılmış, guya oradan da narkotik vasitə tapılmışdır. Bundan sonra o, polis bölməsinə aparılmış, orada milli mənsubiyyəti ağır formada təhqir edilməklə döyülmüş, 22 iyun 2012-ci il tarixdə isə Nizami rayon məhkəməsi tərəfindən H.Məmmədova 3 aylıq həbs qətimkan tədbiri seçilmişdir. Beləliklə də H.Məmmədovun şərlənərək əsassız həbs edilməsi tam qanun pozulması ilə müşayət olunmuşdur. Bununla kifayətlənməyən hüquq mühafizə orqanları: Baş Prokurorluq və Daxili İşlər Nazirliyi 4 iyul 2012-ci il tarixdə Kütləvi İnformasiya Vasitələrində H.Məmmədovu Cinayətkar elan edən məlumatlar dərc etdirmişdir. Məlumatda düzgün olmayaraq H.Məmmədov "Tolişi Sədo” qəzetinin təsisçisi kimi göstərilmiş, xarici dövlətlərdən birinə casusluqda günahlandırılmış, dövlətə xəyanətdə ittiham edilmişdir. Beləliklə də Respublika Baş Prokurorluğu və Daxili İşlər Nazirliyinin rəhbərliyi tərəfindən H.Məmmədovun konstitusion hüquqları pozulmuş, məhkəmənin hökmü olmadan cinayətkar elan edilmiş, təqsirsizlik prezumsiyası prinsipi pozulmaqla kobud qanun pozuntusuna yol verilmişdir.
H.Məmmədovu uzun illər yaxından tanıyan şəxslər kimi Sizə müraciət edərək tam məsuliyyəti ilə bildiririk ki, onun şərlənərək həbs edilməsi haqqında həqiqətə uyğun olmayan məlumatın yayılması Azərbaycan dövlətçiliyinə zidd olmaqla bərabər, həm də ölkəmizin imicinə ciddi kölgə salacaqdır.
Nəzərinizə çatdırırıq ki, Hilal Məmmədov astma xəstəliyinin ağır formasından əziyyət çəkir və qapalı şərait onun xəstəliyini kritik həddə çatdırmaqla, həyatına ciddi təhlükə yaradır. Cənab Prezident! İctimaiyyətin ciddi narahatçılığına səbəb olmuş, işgəncələrə məruz qalıb, şərlənərək həbs olunmuş riyaziyyatçı alim, hüquq müdafiəçisi, "Tolışi Sədo” qəzetinin baş redaktoru Hilal Məmmədovun dərhal azad olunması ilə bağlı göstəriş verməyinizi xahiş edirik".
Hilal Məmmədovun hüquqlarının müdafiə Komitəsi hüquq müdafiəçisinin həbsindən dərhal sonra yaranmış, tərkibinə aşağıdakı şəxslər daxildir:
1. Arzu Abdullayeva, hüquq müdafiəçisi, həmsədr 2. Rafiq Cəlilov, "Tolışo sədo” qəzetinin baş redaktoru, həmsədr 3. Mehdibəy Səfərov, RTMM-nin sədr müavini, koordinator 4. Əli Nasir, RTMM-nin sədri, üzv 5. Eldəniz Quliyev, Ziyalılar Birliyinin sədri, üzv 6. Mətləb Mütəllimli, hüquqşünas, üzv 7. Qurban Məmmədov, hüquqşünas, üzv 8. Cəmil Həsənli, Ziyalılar Forumu, üzv 9. Sevinc Hüseynova, Müsavat Partiyası, üzv 10. Arzuman Məcidli, AXCP, üzv 11. Hacı Cahangir Suvarov, geologiya-minerologiya elmləri doktoru, üzv 12. Mehman Əliyev, "Turan” İnformasiya Agentliyi, üzv 13. Məşədi Anar Sadıxov, Ziyalılar Birliyi, üzv 14. İdrak Abbasov, jurnalist, üzv 15. Elnur Astanbəyli, jurnalist, üzv 16. Elnur Məlikov, Avropa dəyərlərinə inteqrasiya ictimai birliyi, sədr üzv 17. Xalid Bağırov, hüquqşünas, üzv 18. Elçin Namazov, Hüquq və Azadlıqların müdafiəsi İnstitutunun rəhbəri, üzv 19. Namizəd Səfərov, hüquqşünas, üzv 20. Samir Kazımlı, Siyasi Azadlıqların Müdafiə Alyansının Koordinatoru, üzv 21. Ərəstun Oruclu, Şərq – Qərb Araşdırmalar Mərkəzinin Direktoru, politoloq, üzv 22. Xədicə İsmayılova, jurnalist, üzv 23. Ağasif Şakiroğli, Açıq Cəmiyyət Partiyası, üzv 24. Ramin Hüseynov, Vətəndaş və İnkişaf Partiyası, üzv 25. Şahvələd Çobanoğlu, jurnalist, üzv 26. Zərdüşt Əlizadə, Bakı Jurnalistika Məktəbi, direktor, politoloq, üzv 27. İradə Cavadova, İnsan Hüquqları üzrə Maarifləndirmə İctimai Birliyi, hüquq elmləri namizədi, üzv 28. Əlimərdan Şükürzadə, Azərbaycan Dövlət Dəniz Akademiyası, üzv
TALISH.ORG
|