Taleh Qaraşov bazardakı yerlərin hər kvadratmetrini 1500 manata satır, rayondakı tikinti işlərini isə bacısı oğlanlarına həvalə edib
Son günlər Lənkəran rayonu və onun icra başçısı Taleh Qaraşov dillər əzbəri olub. Bunun başlıca səbəbləri sırasında isə rayonda cərəyan edən proseslər, açıq şəkildə təzahür edən korrupsiya halları və Müsavatla AXCP rəhbərliyinin Lənkəranda öyrədilmiş adamlar tərəfindən təxribata məruz qalmalarıdır. Rayondan JAM.AZ-a gələn xəbərlər isə digər maraqlı məqamları üzə çıxarmağa başlayıb.
Lənkəran satışa çıxarılıb
Taleh Qaraşov icra başçısı təyin olunandan sonra rəhbəri olduğu digər rayonlardakı kimi burada da eyni qaydada qaydalar tətbiq edib. Vəziyyət belədir ki, artıq şəhərdəki əksər gəlirli sahələri ələ keçirməyə nail olmuş icra başçısı mərkəzdəki torpaq sahələrindən tutmuş, dəniz kənarında fəaliyyət göstərən iaşə obyektlərinə qədər hər yerə əl uzatmaqdadır.
Son məlumatlara görə, Qaraşovun son «əl işlərindən» biri də Lənkəran bazarı ilə bağlıdır. Belə ki, hal hazırda şəhərin mərkəzində yeni bazar inşa olunur. Oradakı dükanlar isə satışa çıxarılıb. Amma buradakı qiymətlərə diqqət yetirdikdə məlum olur ki, rəqəmlər heç də Bakıdan fərqlənmir. Məsələn, Lənkəran bazarında inşa edilmiş dükanların hər kvadratmetri 1500 manatdan satışa çıxarılıb. Və bütün bu pullar da hamısı icra başçısının cibinə axır.
Hal hazırda qeyd olunan rayonda təkcə bazar əməliyyatından 1 milyon manatdan çox vəsait əldə olunub. Ancaq buna rəğmən alıcılar üçün bazarda nəzərdə tutulmuş yollar həddindən artıq dardır. Elə əlimizdə olan fotoşəkillərdən də bunu aydın görmək mümkündür. Taleh Qaraşovun gözünü tutan pul qazanmaq hirsindən doğan bu vəziyyət Allah eləməmiş ekstremal halları yaddan çıxarıb. Çünki sabah burada hər hansı bir yanğın baş verərsə, yanğınsöndürənlərin bazara girişi qeyri-mümkün olacaq.
İcra başçısı tikinti işlərini bacısı oğlanlarına tapşırıb
Amma işin ilginc tərəfləri, daha doğrusu, Taleh Qaraşovun pul qazanmaq həvəsi başqa məqamları da ortaya çıxarıb. JAM.AZ-ın əldə etdiyi məlumatlarda vurğulanır ki, hal hazırda Lənkəranda həyata keçirilən abadlıq və tikinti işləri icra başçısının bacısı oğlanlarına həvalə edilib.
Belə ki, dövlət büdcəsindən ayrılmış pulları mənimsəmək üçün ən optimal yollardan biri də bu addım sayılır. Çünki bacıoğlanları dayılarının əm rvə tapşırıqlarını yerinə yetirirlər. Əvəzində isə əldə olunan gəlirlərin böyük bir qismi Qaraşovun nəzarətinə keçir.
Ən dəhşətli məqam isə odur ki, Lənkəranda aparılan tikinti işlərində çalışan yerli sakinlər isə bu pulların yalnız cüzi hissəsini ala bilirlər. Yəni, sənədləşdirmədə görülən işlərin dəyərləri şişirdilmiş rəqəmlərlə ifadə olunduğu halda, orada işləyən fəhlələrə bunun 10-da biri verilir. Hətta rayon sakinləri deyirlər ki, Taleh Qaraşovun bu hərəkəti onları qul yerinə qoymaqdır.
Özünə umac ova bilməyən bələdiyyə
Azərbaycanda fəaliyyət göstərən bələdiyyələrin səlahiyyətlərinin azlığı və bacarıqsızlığı nəticə etibarə ilə əhaliyə göstərilən xidməti də aşağı səviyyəyə endirib. Bu gün bələdiyyələrin torpaq satan, büdcədən ayrılmış pulları mənimsəyən bir seçkili orqandan olmasından başqa bir «üstünlüyü» də qalmayıb.
Bəzi şəhər və rayonlardakı bələdiyyələr isə bacarıqsızlıqlarını o qədər irəli aparıblar ki, oturduqları binanın qarşısında yaşanan biabırçı mənzərəni belə düzəltmək gücündə deyillər. Məsələn, Lənkəran şəhər Bələdiyyəsinin binasının qarşısında illərdən bəri göz çıxaran gölməçələrdə kanalizasiya natəmizliyi «çığlıq» atır. Və həmin bələdiyyədə əyləşən şəxslər isə 5-10 manat vəsait taparaq, həmin natəmizliyi aradan qaldırmır və ərazini də təmir etdirmirlər. Görünür, ya buna vaxtları yoxdur, ya da pulu boş yerə göyə sovurmaq istəmirlər. Hər necə olsa rəsmi statistikalarda və «möhtəşəm» toplantılarda Lənkəranın uğurla inkişaf etdiyi vurğulanır. Bizə isə statistika lazımdır, reallıq yox. Görəsən, özünə umac ova bilməyən Lənkəran bələdiyyəsi hansı haqla camaata əriştə kəsmək istəyir?
