Bu gün forən təbim gəlmiş qələmnən dəftər işdərlər,
Deyim bir-bir bu vilada nə qayda kimlər işdərlər.

Haçan ki müstəqil olduq, deyim əvvəl gələnnərdən,
Dilənçi sözdü, bunlar lap yer üstə çömbələnnərdən,
Qucağında tifil lüm-lüt, o qarnı gömbələnnərdən,
Bakı dolcağ, əyalətdə gördük ki kər-kər işdərlər,
Bu qırsaqqız həyasızlar mahalı dər-dər işdərlər.

İranlı parça qoltuqda, gətirdi örtməyə tirmə,
Dalınca gəldi Çin əhli, nə varsa əsli, geydirmə,
Pakistandan gələnnən heç soruşma, malı dindirmə, 
Yəhudilər gəlib teyxa qızılçı-zərgər işdərlər,
Osmanlıdan gələnlər də dönərçi, bərbər işdərlər.

Fransızlar ətirbazdır, oxxay, o xoş ətir bizdə,
O neft adlı ətir ki var ona qiymət qədir bizdə,
İngilis neft sevən zatdır, ona hörmət xətir bizdə,
Fərasətnən gəlib şirkət qurarlar fər-fər işdərlər,
Abırnan iş görüb biznən, ətirli əsmər işdərlər. 

Bu gün forən təbim gəlmiş qələmnən dəftər işdərlər,
Deyim bir-bir bu vilada nə qayda kimlər işdərlər. 

Dəxi bizdən açım bəhsi nədir indi şuğul bizdə,
Bilirsiz qulbazarı var nə çoxdur indi qul bizdə,
Vurub qaz dolduran kəslər deyirlər çoxdu pul bizdə,
Rayondan gəlmələr cibdə siçanla “Tom-Cər” işdərlər,
Ya nazir ya ticarinin bağında qənbər işdərlər. 

Qarabağdan gələn cümlə muğama dəst diraz eylər,
Şəmkir, Şirvan, Qazax,Tovuz, Göyçay avazi-vaz eylər,
Göycə gəl üstə Borçalı döşbasdı sazı saz eylər, 
Aşıqlar girdi maydanə eşərlər peysər işdərlər,
Sağdan sola, soldan sağa, meymənü-meysər işdərlər.

Talışdar ki sovet bitdi, çay oldu zay, kələm getdi,
Nətər derlər: Dədə balasi- “yurd qaldi o lələm getdi”,
Olan-qalan nə vardıysa bu faiz, o sələm getdi,
Odur ki eyləyib tövbə be name məhşər işdərlər,
Sərasər xətmi-Qurani edərlər əzbər işdərlər.

Hər işnən baş qatır indi şimalda ləzgi qardaşlar,
Papaq başda, bığ üstündə, önündə güzgü qardaşlar,
Cızır bağ-bağça elmində bir ayrı cizgi qardaşlar,
Olar, “can ğərdeş” bilirlər nə lazım, həncər işdərlər,
Yımağ var, rəqs üçün beldə gümüşdən xəncər işdərlər. 

Görək indi Aran əhli nə noyi ruzigar eylər,
Yemiş-qarpız şükür vardır aranı bir digar eylər,
Sevər hər kimsə torpağı, torpaq o şəxsi var eylər,
Əkinçi səmti- mərzində girərlər vər-vər işdərlər,
Davarçı mal, toyuqçu quş bu ho, o kişdər, işdərlər. 

Bilirsiz ki bir aləm var bizimkindən tamam ayrı,
O aləmdə şəkil ayrı, nizam ayrı, hamam ayrı,
İsmayıllı-Lahıc əhli bu kəlmə orda tam ayrı,
Yağ dağıldı-palaz batdı, olar zindan çəkişdərlər,
Nə olsa həkk edib söylər: -Tarixdü.- misgər işdərlər. 

Nə qaldı, indi bəs kimlər siyasət elmi riştərlər,
Vəzifə istəyən özgə kim olsa nağdı kişdərlər,
Lap paslı mıx tək kəlləsin itirməkçin çəkişdərlər,
Tifillər də bilir kimdir bu əqli, çeşmi nəşdərlər,
Naxçıvan əhlidir da, bə, təmamən rəhbər işdərlər. 

Bir iddə yurdu xırd etdi, bir iddə xəlqi ovladi,
Fırıldaqlar çoxun bir-bir fır-fır fırratdı,tovladi, 
Xəzərdə yaxtalar xəlvət, çəkər kef zəngin övladi,
Kayutda lümbələm dəm-dəm muğənni-əxtər işdərlər,
Kasıb övladı xidmətdə sərhəddə səngər işdərlər. 

Baxarlar ki çeri çerdən seçirmi özləri çerlər,
Əlaltılar əlüstü, tez açarlar “xəlvəti yerlər”,
Satarlar namusu-arı, alan da xarici serlər,
Gedib evdə deyərlər kim olar da ər-ər işdərlər, 

Girib iblislə sazişə əlaltdan şər-şər işdərlər.
Şənagül biz sevən xalqığ, nə çoxdur qəzyə bizlərdə,
Nə çoxdur can satan canan, üzü üz görmüş üzlərdə,
Boşandı tapdı bir səhnə, qığılcım yandı gözlərdə,
Açarlar sinə meydanə olarlar əxtər işdərlər. 

Bu quşlar lap qanadsız da uçarlar pər-pər, işdərlər.
Ağalar istəməzsə gər nə həddi tüklənə bir pər,
Əgər söylərlərsə “lo pər”, hamı xornan deyər “lo pər”,
Baxıb bic-bic, gülüb şit-şit, deyərlər yox, deyin “qo pər”.
O saət eyləyib hurrey deyərlər: “qo pər”, işdərlər,
Qərəz ağalar istərsə qalannar nokər işdərlər. 

Şərafətli bu dünyada yaşar ömrü şərafətnən,
Bir can alan-bir can verən, bir mübtəla-bir afətnən,
Nəhayət, ey Əli Nasir, bitir nəzmi zərafətnən,
De aclıq olsa bizlərdə gedib hər işdə işdərlər,
Un olsun qeyri heç bir şey, olsun, əriştə işdərlər.

İzah:
Lo pər- Qarğa uçur.
Qo pər-İnək uçur.