Salam olsun hüzuruna, ay əmi,
Gəlib deyən Lerikin də haqq dəmi!
Pis gündədir bu Lerikin görkəmi,
Gəl gör özün,bu anda gəl, bu anda,
Mehdi əmi, Zuvanda gəl, Zuvanda!

Sal yolunu Kələxana, Kəlvəzə,
Sevincindən quşlar verər səs-səsə,
Sözümüz var,eşitməyə gəl bizə,
Vəkil seçək səni doğma yuvanda,
Mehdi əmi, Zuvanda gəl, Zuvanda!

Yenə günəş bəxtimizə doğmadı,
Bizə rəhmət yağışları yağmadı,
Dırığ, Piran, yəqin bizdən doğmadı?!
Yol buz olur,burda sular donanda,
Mehdi əmi, Zuvanda gəl, Zuvanda!

Mehdi əmi, xəbərin var,qış gəlir,
Qışda bu el müsibətə tuş gəlir!
Peçdə yanan təzək iyi xoş gəlir;
Qara tüstü gör nə yazır tavanda,
Mehdi əmi, Zuvanda gəl, Zuvanda!

Gəl,gur olsun ocaqların alovi,
Gör neyliyir əhli - Nisli, Nazovi,
İmkan olsa,gəl seyr elə Razqovi,
Biz də olaq sənin xeyir-duvanda,
Mehdi əmi, Zuvanda gəl, Zuvanda!

Qəm-qüssədən ürəyimiz dağlıdır,
Bütün yollar üzümüzə bağlıdır,
Bu güzaran, vallah bizi ağladır,
Ömrümüz də keçir ancaq gümanda,
Mehdi əmi, Zuvanda gəl, Zuvanda!

Vətən eşqin bir sahılsiz dənizdir,
Bu yurd sənin ürəyinlə əkizdir!
Mən bilirəm,hamı sənə əzizdir,
Gözləyirik,çox yubanma Piranda,
Mehdi əmi, Zuvanda gəl, Zuvanda!

Zərdüşt ruhu bu torpaqda dolaşır,
Bulaqlar da burda bəzən alışır!
Vicdanımız dözmür bizlə dalaşır,
Abidələr itir – batır məkanda, 
Mehdi əmi, Zuvanda gəl, Zuvanda!

Vaxt var idi, yüz ildən çox yaşardıq,
Yüz əllini hətta bəzən aşardıq,
Yüz yaşlıya” bala” deyib çaşardıq;
Bir qocadır indi sanki cavan da,
Mehdi əmi, Zuvanda gəl, Zuvanda!

Kartofumuz adlı idi bir zaman,
Pendirimiz yağlı idi bir zaman,
Çörəyimiz dadlı idi bir zaman,
İndi olsa, lap yeyərdik yavan da,
Mehdi əmi, Zuvanda gəl, Zuvanda!

Ölüm – qalım bir-biriylə davada,
Gəlmiş idin bir çiskinli havada,
Halımız tək məxşuş idi hava da,
Sanki birdən gün açıldı boranda,
Mehdi əmi, Zuvanda gəl, Zuvanda!

Dırığlılar yollar boyu qaldılar,
Səni görcək sevinc payı aldılar,
Qollarını boynuna da saldılar,
Yolun salıb ordan getdin Oranda,
Mehdi əmi, Zuvanda gəl, Zuvanda!

Zuvand dağın zirvəsində qar oldu,
Amma bizim ruzgarımız zar oldu,
Ata yurdu nədən bizə dar oldu,
Çoxlarımız indi olur Muğanda,
Mehdi əmi, Zuvanda gəl, Zuvanda!

Allahın da gəlmir bizə yazığı,
At da batır, keçə bilmir palçığı
Dünən geydim babam geymiş çarığı
Lehmə olur yollar yağış yağanda,
Mehdi əmi, Zuvanda gəl, Zuvanda!

Necə olar pulsuz bizim günümüz,
Alan yoxdur, çardaxdadır yunumuz,
Neçə gündür, qurtarıbdır unumuz,
Bir dükan var, qalıb çaydan o yanda,
Mehdi əmi, Zuvanda gəl, Zuvanda!

Yollar boyu əzgil, armud yeyərsən,
İtburnunun budağını əyərsən,
“Bələdçimiz harda qaldı”, deyərsən,
Onda sənə əl uzadar İlvan da,
Mehdi əmi, Zuvanda gəl, Zuvanda!

Gəl özün gör, nə yamandır halımız,
Dəymiş qalıb, tökülübdür kalımız!
Pesok dadır bizim şanlı balımız,
Yetir özün belə çətin zamanda,
Mehdi əmi, Zuvanda gəl, Zuvanda!

Kələxandan sən Kəlvəzə keçərsən,
Yurd dərdinə məlhəm otu biçərsən,
Hərdən enib bulaq suyu içərsən,
Qırğı onda qırqovulu qovanda,
Mehdi əmi, Zuvanda gəl, Zuvanda!

Niyyətinə ellər hamı sevinər,
Cavanlar da evlərinə tez dönər,
Bütün Lerik bahar donu geyinər, 
Zuvand dağı kədərlidir dumanda,
Mehdi əmi, Zuvanda gəl, Zuvanda!

Arzumuz var, bu yerlərdə yol olsun,
Çay əkərik, dağ döşündə kol olsun!
Əriyimiz, əncirimiz bol olsun,
Gəl səninlə biz yaşayaq amanda,
Mehdi əmi, Zuvanda gəl, Zuvanda!

Həyat budur, kim sevərsə elini,
O gələndə ellər sıxar əlini!
Qoy eşidək doğma ana dilini,
Gözləyirik, hətta olsan Aranda,
Mehdi əmi, Zuvanda gəl, Zuvanda!

Beko mande beroş kardə əmənış,
Nıştemoni yarəş kardə əmənış,
Cılməy nuni təroş kardə əmənış,
Gəl yetiş sən, yurdu verək “xıvanda”,
Mehdi əmi, Zuvanda gəl, Zuvanda!

Qonaq gətir bizə Əli Nasiri,
Yanında da neçə cavan şairi.
Ruşinin də nə vaxt bitər şeyiri,
Çağır onu, son misranı yazanda,
Mehdi əmi, Zuvanda gəl, Zuvanda! 

Əli NASİR

Bəxtiyar RUŞİN