Главная » 2012 » Март » 19 » Novruz bayramı, Novruz müəmması: Şıxəli Qurbanov, Vəli Axundov, Heydər Əliyev və Əbdürrəhman Vəzirov

---

21:22 Novruz bayramı, Novruz müəmması: Şıxəli Qurbanov, Vəli Axundov, Heydər Əliyev və Əbdürrəhman Vəzirov

Novruzun üç min il yaşı var. Üç min illik bir bayramın Azərbaycanda 22 illik keşməkeşli tarixi var, müəmmalı. 11-ci ordunun süngüləri üstündə Azərbaycana sovet hakimiyyəti gətiriləndən sonra bir çox bayramlar kimi Novruz da represiyaya məruz qaldı. Rəsmi bayram olmasa da, bəzən qadağan edilsə də, bəzi hallarda qorxulu olsa da, xalq Novruzu qeyd edirdi. 1960-cı illərdə Azərbaycan kommunist partiyası mərkəzi komitəsinin katibi Şıxəli Qurbanov Novruz bayramına „bəraət" verilməsi, Novruzun rəsmi bayram kimi qeyd edilməsi üçün mübarizəyə başladı. Təhlükəli təşəbbüs idi. Mərkəzi Komitənin 1-ci katibi Vəli Axundov da Şıxəli Qurbanovu təhlükəli iş gördüyü barədə xəbərdarlıq etdi, amma o, geri çəkilmədi. 1967-ci ildə Novruz ilk dəfə rəsmi bayram kimi dövlət səviyyəsində qeyd edildi: "1967-ci ilin Novruz tonqalları yalnız küçələri, meydanları yox, həm də ən başlıcası illərin dözülməz ağırlığı altında sıxılan, boğulan, mühitin qaranlıqlarına bürünən ürəkləri, beyinləri işığa qərq etdi."... 1967-ci ilin may ayının 24-də Şıxəli Qurbanov dişlərini müalicə etdirmək üçün həkimə getdi və elə oradaca müəmmalı şəkildə vəfat etdi. Bəzi iddialara görə „1967-ci ilin iyun ayında Azərbaycan Kommunist Partiyası Mərkəzi Komitəsinin (KP MK) növbədənkənar plenumu keçirilməli və Şıxəli Qurbanov Mərkəzi Komitənin birinci katibi seçilməli idi. Amma... Mayın 24-də onu aradan götürdülər...».   İki il sonra, 1969-cu ildə Mərkəzi Komitənin plenumu keçirildi və Moskvanın əmri ilə Vəli Axundov vəzifəsindən azad edildi, onun yerini 1967-ci ildə dövlət təhlükəsizliyi komitəsinin sədri təyin olunan Heydər Əliyev tutdu. Bəs Novruz bayramı? Novruzun dövlət səviyyəsində keçirilməsini yavaş-yavaş yığışdırdılar və „Bahar bayramı" ilə əvəz etdilər.   Qəribədir. Heydər Əliyevi ulu öndər sayanların yüzlərlə bərbəzəkli kitabı çıxıb. Onların hamısında „ümummilli" liderin 1969-cu ildən sonra, 13 il ərzində Azərbaycanı hərtərəfli inkişaf etdirdiyi, milli ənənələri bərpa etdiyi, milli şüurun inkişafı üçün qəhrəmancasına mübarizə apardığı dönə-dönə qeyd edilir. Çox maraqlıdır. Əgər elədirsə, nə üçün Heydər Əliyev 13 il ərzində xalqın bayramını, Novruzu kommunistlərin qadağa siyahısından çıxartmadı və rəsmi səviyyədə onun bayram edilməsinə imkan vermədi? Çətin sualdır. Axtarmayın. Yüzlərlə bərbəzəkli kitabda bu sualın cavabını tapmaq mümkün olmayacaq.   Unutmayaq, Şıxəli Qurbanovun vəfatından 22 il sonra, 1989-cu ildə Mərkəzi Komitənin birinci katibi Əbdürrəhman Vəzirovun sərəncamı ilə Novruz yenə dövlət səviyyəsində rəsmi bayram kimi qeyd edilməyə başladı.   Novruz bayramınız mübarək olsun, əziz həmyerlilər!   Mirzə Xəzər 19.03.2012 http://mirzexezerinsesi.net

1 2 3 4 5 Категория: Azərbaycan | Просмотров: 2610 | Добавил: admin | Рейтинг: 5.0/2

Всего комментариев: 0