Dekabrın 17-də «Tolışi Sədo» qəzetinin mərhum baş redaktoru professor Novruzəli Məmmədova məxsus bəzi mal və əşyalar müsadirə olunub.
Əşyaları Yasamal rayon Məhkəmə icraçılarına N.Məmmədovun vəkili Ramiz Məmmədov və hüquq müdafiəçisi Hilal Məmmədov təqdim edib. Müsadirə barədə 1 həftə əvvəl Yasamal rayon Məhkəməsindən mərhumun vəkilinə xəbərdarlıq edilib.
Hüquq müdafiəçisi Hilal Məmmədovun sözlərinə görə 2008-ci il Ağır Cinayətlərə Dair İşlər üzrə Məhkəmənin hökmündə göstərildiyi ümumi dəyəri 600 manat hesablanan 1 kompyuter stolu, 1 stol, 5 stul, İranda toxunmuş 1 xalça, 1 televizor və 1 fotoaparat dövlətə təhvil verilməli barədə xəbərdarlıq edilib. "Bildirildi ki, əks təqdirdə Novruzəli Məmmədovun həyat yoldaşı axtarışa veriləcək. Bu xəbərdarlıqdan sonra onun Moskvada müalicə olunan 72 yaşlı yoldaşı bizə müraciət etdi ki, avadanlıqları ordan-buradan tapıb təhvil verək. Biz vaxtilə Novruzəli Məmmədovun İrandan 40 manata alıb gətirdiyi xalçanı, 4 köhnə, zədəli stulları və bir də kompyuter stolunu verdik. Amma stol, 1 stul, televizor və fotoaparatı tapa bilmədik».
2008-ci ildə çıxarılan məhkəmə hökmündə qeyd edilib ki, müsadirə olunan bu əşyaları N.Məmmədov güya İran xüsusi xidmət orqanlarının verdiyi vəsait hesabına alıb.
Hilal Məmmədov deyir ki, həmin hökmdən sonra bu məsələ indiyə qədər qaldırılmamışdı: «Bu adam həbsxanada vəfat edib. Bundan sonra onun iki oğlu vəfat edib. 72 yaşlı yoldaşı Məryəm Məmmədova BMT-yə müraciət edəndən sonra Rusiyaya köçüb və hazırda orda müalicə olunmaqdadır. Bu qədər müsibət, faciədən sonra 2 il əvvəl vəfat etmiş adamdan stol, stul, fotoaparat, xalça tələb etmək çox gülməli görünür».
Məmmədovlar ailəsinin faciəsinə - ailə başçısının və iki oğulun ölümünə baxmayaraq, 2010-cu ilin iyulunda hökm çıxarmış Ali Məhkəmənin hakimi Şakir Ələsgərov əmlakın müsadirə olunmasının vacibliyi barədə qərarı Yasamal məhkəməsinə göndərib.
BMT Ali Komissarlığının himayəsi ilə Moskvada olan N.Məmmədovun 72 yaşlı dul xanımını cinayət işinin açılması və barəsində axtarış elan olunması ilə hədələyiblər. Müsadirə prosesinə Yasamal rayon Məhkəmə İcraçıları şöbəsinin rəisi Zaur Abdullayev rehberlik edib. O, bildirib ki, əgər əmlak təhfil verilməsə Məryəm Məmmədova axtarışa veriləcək.
Hilal Məmmədovun sözlərinə görə, vaxtilə ailə məhkəmə orqanlarına müsadirəyə şamil edilən əşyaları götürməyi təklif edib, lakin onlar bunu etməyiblər. "Bu adamların hərəkətində insanlıq və sağlam düşüncə yoxdur. Onlar ərini və iki uşağını itirmiş yaşlı qadını rahat buraxmırlar”, - H.Məmmədov vurğulayıb.
Vəkil Ramiz Məmmədov məsələnin mənəvi tərəfini şərh etməyərək yalnız onu deyib ki, "görünür, dövlətin bu vəsaitə ehtiyacı var”.
Məsələnin hüquqi tərəfinə gəlincə, CM-in 306-cı maddəsinə görə, əgər məhkəmənin qərarı qəsdsiz yerinə yetirilmirsə, iş dayandırılmalıdır. İndiki hal məhz bu normaya uyğundur. Çünki N.Məmmədov özü vəfat edib, onun iki uşağı da ölüb, xəstə dul qadın isə xaricdədir. Vəkil həmçinin qeyd edib ki, N.Məmmədovun işi üzrə şikayət Strasburq məhkəməsinin icraatındadır. O hesab edir ki, N.Məmmədova qarşı Avropa İnsan Hüquqları Konvensiyasının 2,3,5, 6, 8,10 və 13-cü maddələri və onun birinci protokolunun 1-cı maddəsi pozulub.
«Talışi Sədo» qəzetinin baş redaktoru professor N.Məmmədov dövlətə xəyanət, milli, irqi və dini ayrı-seçkiliyi qızışdırmaqda ittiham olunaraq 10 il azadlıqdan məhrum edilmişdi.
O, 2009-cu ildə 68 yaşında Penitensiar Xidmətin müalicə müəssisəsində öldürülmüşdü.