“Lerik rayonu İcra Hakimiyyətinin başçısı Rövşən Bağırov insanlara xidmət və qayğı göstərmək əvəzinə, onlara sözün əsl mənasında qan uddurur”.
Bu sözlər Lerik rayonu, Cənginəvud kənd sakini Səfərov Mahmudəli Şirəli oğlunun övladları tərəfindən prezident İlham Əliyevə göndərilən şikayət məktubundandır.
AzToday.az Səfərovlar ailəsinin prezidentə etdiyi müraciəti olduğu kimi təqdim edir:
“Dünyanı bürüyən iqtisadi böhrandan ölkəmizin yüngül ziyanla çıxması yönündə atdığınız addımlar, o cümlədən 26 yanvar 2016-cı il tarixdə “İqtisadi İnkişaf Dövlət Proqramı” yekunlarına həsr olunmuş konfransda qeyd etdiyiniz: “İnsanları incitməməli, əksinə onlara xidmət və qayğı göstərilməlidir!” – kimi, qiymətli tövsiyyələriniz, eləcə də ölkəmizdə azad sahibkarlıq mühitinin yaxşılaşdırması üçün tərəfinizdən Apellyasiya Şurasının yaradılması bu müraciətimizi Sizə ünvanlanmaq zərurətini yaratdı.
Sosial-iqtisadi problemlərin həlli istiqamətində ədalətli fikirlərinizə rəğmən, təəssüf hissi ilə bildirmək istəyirəm ki, Lerik rayonu İcra Hakimiyyətinin başçısı Rövşən Bağırov insanlara xidmət və qayğı göstərmək əvəzinə, onlara sözün əsl mənasında qan uddurur. Onun dəfələrlə tərəfinizdən yürüdülən sosial-iqtisadi siyasətə antoqanist mövqe sərgiləməsinin şahidi olmuşuq. Bu xüsusda, Lerik rayonu Cənginəvud kənd sakini, 80 yaşlı ahıl atamız Səfərov Mahmudəli Şirəli oğlunun başına gətirilən müsibəti nümunə gətirmək olar. Belə ki, atamız hələ 2009-ci ildə Sizin “Regionlarda sahibkarlığın inkişafına Dövlət qayğısı” fərmanınızdan ruhlanaraq, ömrü boyu yığdığı 75 000 manat civarında maddi vəsaiti xərcləyərək, kənd bələdiyyəsindən 0,5 ha istifadəsiz torpaq sahəsi almışdır. O, həmin torpaq sahəsinə yol çəkmiş, çayın üstündə əsaslı körpü tikmiş və böyük ruh yüksəkliyi ilə, doğma kəndində heyvandarlığın səmərəli inkişafı üçün həmin ərazidə süd-yağ emalı sexinin tikintisinə başlamışdır.
Rövşən Bağırov Lerik rayon İcra Hakimiyyətinin başçısı kimi, ahıl atamızın az miqdarda da olsa, kənddə yeni iş yerlərinin açılması məqsədi ilə başladığı həmin tikintinin rəsmi sənədləşmə işlərinə kömək etməkdənsə, bu işə çox ciddi əngəllər yaratmışdır. R. Bağırov heç şübhəsiz ki, tamah məqsədi ilə, səlahiyyətlərindən sui-istifadə edərək, 80 yaşlı bu qoca kəndlinin tikintisini dağıtmışdır. Bununla da, xərclənən küllü miqdarda maddi vəsaiti yerlə yeksan etmişdir (?!).
Hörmətli Prezident!
Sizdən xahiş edirik ki, Lerik RİH başçısı Rövşən Bağırov tərəfindən 80 yaşlı Səfərov Mahmudəli Şirəli oğlunun pozulmuş hüquqlarının bərpasına yardımçı olasınız”.
aztoday.az