 Ona talış olduğuna görə əlavə 3 il də verilə biləcək cəzanı dövlət ittihamçısı "güzəştə gedib"
Bu gün Bakı Ağır Cinayətlərə dair məhkəmənin açıq iclasında dövlət ittihamçısı Vüqar Quliyev Azərbaycan İslam Partiyasının lideri Mövsüm Səmədov, partiyanın təşkilati məsələlər üzrə sədr müavini Vaqif Abdullayev, Astara rayon təşkilatının sədri Rufulla Axundzadə, Mövsüm Səmədovun qayını Firdovsi Məmmədrzayev, əmisi oğlu Dəyanət Səmədov, Masallı ruhanisi Fəramiz Abbasov və ilahiyyatçı alim Zülfüqar Mikayılzadənin işi üzrə cinayət maddələri elan elədi.
Xatırladaq ki, təqsirləndirilən şəxslər Cinayət Məcəlləsinin 28, 214.2.1 (Qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən cinayətə hazırlıq); 214.2.3 (Odlu silahdan və silah qismində istifadə olunan predmetlərdən istifadə etməklə cinayətə hazırlıq); 228.3 (Qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə); 278-ci (Hakimiyyəti zorla ələ keçirmə və ya onu zorla saxlama) maddələri ilə ittiham olunur.
Vüqar Quliyev çıxışında Mövsüm Səmədov, Rufulla Axundzadə, Firdovsi Məmmədrzayev, Dəyanət Səmədov, Fəramiz Abbasov və Zülfüqar Mikayılzadənin işi üzrə olan hal-şahidlərinin, şahidlərin ifadələrini səsləndirdi.
İttihamda hətta yalançılığı məhkəmədə iştirak edənlər tərəfindən tam ifşa olunan 2 şahidin ifadəsi də qəbul edildi. Bunlardan biri Firdovsi Məmmədrzayevin əleyhinə şahidlik edən İlham Şərafətdinov idi. Xatırladaq ki, bu şəxs F.Məmmədrzayevin məscid qarşısında dəfələrlə çıxış etdiyini gördüyünü bildirsə də, onu tanımamış, əvəzinə Mövsüm Səmədovu göstərmişdi.
İkincisi isə protokolda Quba sakini Gülooğlanov Rasim kimi qeyd olunan, həyatda Xaçmaz sakini Piroğlanov Talehin verdiyi şahid ifadəsi də qəbul olundu. Buna əsas kimi məhkəmənin təşəbbüsü ilə dəvət olunmuş Mərdan Səmədovun dükanında və Dəyanət Səmədovun evində axtarış qrupuna rəhbərlik edən E.Sadətdinovun onun şəxsiyyətini təsdiq eləməsi göstərildi.
Təqsirləndirilən şəxslərdən Gəncə şəhər sakini Yusif Ələkbərovun ittihamına da toxunuldu: «Həmin şəxs qaçdığından indi də axtarışdadır. Onun barəsində ayrıca cinayət məhkəməsi keçiriləcək».
Vüqar Quliyev ötən məhkəmə iclasında könüllü surətdə şahidlik edən Namiq Piriyevin və Azad Ələkbərovun da verdiyi ifadələri barədə də danışdı. Xatırladaq ki, adları çəkilən şahidlər ilkin istintaq zamanı verdikləri ifadəni təkzib edərək bildirmişdilər ki, hüquqmühafizə orqanları onların savadsızlığından istifadə edib: «Bizə demişdilər ki, İranın «Səhər» kanalını bağlamaqdan ötrü protokola imza atmaq lazımdır. Biləndə ki, bizim üstümüzdə nahaqdan adam həbs ediblər, çox narahat olduq. Bu söz-söhbətə son qoymaq üçün bura gəlmişik».
Dövlət İttihamçısı verilən bu ifadələrin həqiqətəuyğun olmadığını, bu səbəbdən onların ilkin istintaqa verilən ifadələrinin qəbul olunmasının zəruriliyindən danışdı.
Bundan sonra təqsirləndirilən şəxslər barədə yüngülləşdirici və ağırlaşdırı məsələlərə də toxundu: «Mövsüm Səmədov əvvəllər ittiham olunmayıb, üzərində az yaşlı körpə var, Vaqif Abdullayev əvvəllər məhkum olmayıb,Fəramiz Abbasov əvvəllər məhkum olmayıb, üstündə iki azyaşlı uşaq var, Dəyanət Səmədov əvvəllər məhkum olmayıb, üstündə az yaşlı uşaq var, Firdovsi Məmmədrzayev əvvəllər məhkum olmayıb, üstündə bir az yaşlı övladı var, Zülfüqar Mikayılzadə əvvəllər məhkum olmayıb, üstündə 3 azyaşlı körpəsi var, Rufulla Axundovun üstündə 4 azyaşlı uşaq var. Əlbəttə bu yüngülləşdirici haldır. Lakin təqsirləndirilən şəxslərin ictimai təhlükə törətmələri barədə kifayət qədər çıxış etmişəm. Bu azadlıqdan məhrum etmə ilə nəticələnməlidir və bu onların hər birinin şəxsiyyətinə, xarakterinə, cinayət dərəcəsinə uyğun təsiri nəzərə alınmalıdır. Təqsirləndirilən şəxslərdən yalnız Zülfüqar Mikayılzadənin cavanlığı, şəxsiyyəti və 3 azyaşlı körpəsi olmasını nəzərə alaraq cəzasının şərti ilə əvəzlənməsi məqsədəuyğundur».
Dövlət itthamçısı Vüqar Quliyev ittihamı oxudu. Prokuror əvvəlcə bildirib ki, ittiham olunduğu maddələr üzrə cəzaları üst-üstə toplayanda Mövsüm Səmədova 22 il 6 ay müddətinə həbs cəzası düşür. Dövlət ittihamçısı deyib ki, Mövsüm Səmədova Cinayət Məcəlləsinin 28, 214.2.1 (Qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən cinayətə hazırlıq); 28, 214.2.3 (Odlu silahdan və silah qismində istifadə olunan predmetlərdən istifadə etməklə cinayətə hazırlıq) maddələri ilə əmlakı müsadirə olunmamaqla 7 il 6 ay, 228.3 maddə ilə (Qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) 5 il; 278-ci maddə ilə (Hakimiyyəti zorla ələ keçirmə və ya onu zorla saxlama) 10 il həbs verilməlidir.
Daha sonra prokuror Vüqar Quliyev Cinayət Məcəlləsinin 66.3-cü maddəsinə istinad edib və cəza müddətlərini həmin maddə ilə hesablayaraq Mövsüm Səmədovun cəzasını ciddi rejimli cəzaçəkmə müəssisəsində çəkməklə, əmlakının müsadirə olunmaması şərtilə 12 il müddətinə azadlıqdan məhrum edilməsini istəyib.
Vüqar Quliyev eyni cəzanı, eyni normalarla Vaqif Abdullayevə və Fəramiz Abbasova da istəyib.
Rufulla Axundzadəyə də eyni maddələrlə eyni cəza verilməsini təklif edən dövlət ittihamçısı xatırladıb ki, Axundzadə əlavə olaraq Cinayət Məcəlləsinin 283.1-ci (Milli, irqi, sosial və ya dini nifrət və düşmənçiliyin salınmasına, milli ləyaqətin alçaldılmasına, habelə milli, irqi və ya dini mənsubiyyətindən asılı olaraq vətəndaşların hüquqlarının məhdudlaşdırılmasına və ya üstünlüklərinin müəyyən edilməsinə yönələn hərəkətlər, aşkar surətdə və ya kütləvi informasiya vasitələrindən istifadə olunmaqla törədildikdə) maddəsi ilə də ittiham olunur. Bunu əsas gətirərək prokuror Vüqar Quliyev bildirib ki, Rufulla Axundzadəyə əlavə olaraq 3 il həbs də düşür. Ancaq dövlət ittihamçısı yenə Cinayət Məcəlləsinin 66.3-cü maddəsinə istinad edib və cəza müddətlərini bu maddə əsasında hesablamaqla Rufulla Axundzadəyə də 12 il həbs cəzası verilməsini təklif edib.
Dəyanət Səmədov və Firdovsi Məmmədrzayevin ittiham edildikləri maddələr (28, 214.2.1; 28, 214.2.3; 228.3) arasında 278-ci maddə olmadığına görə dövlət ittihamçısı onlara cəzalarını ciddi rejimli cəzaçəkmə müəssisəsində çəkməklə 11 il müddətinə həbs verilməsini istəyib.
Zülfüqar Mikayılova 278-ci maddə ilə 10 il, 283.1-ci maddəyə görə isə 2 il həbs müddəti düşdüyünü, üst-üstə hesablamaqla ona 11 il həbs cəza verilməsini məqsədəuyğun saydığını deyən prokuror bu cəzanın Mikayılova şərti verilməsi təklifini irəli sürüb. Zülfüqar Mikayılzadə hazırda ev dustaqlığındadır. Prokuror xahiş edib ki, 5 il sınaq müddəti tətbiq olunmaqla cəza müddəti şərti hesab olunsun. Vüqar Quliyev təqsirləndirilən şəxs barəsində seçilmiş ev dustaqlığı cəzasını başqa yerə getməmək qətimkan tədbiri ilə əvəz olunmasını da təklif edib.
TALISH.ORG
|
