 Keçən həftə Sumqayıtda şəhər şəhər günü keçirilirdi, ei dili ilə desək şəhərin ad günü idi. Gözünə döndüyüm icra başçısı Eldar Əzizov Sumqayıtda çoxlu talışın yaşadığını nəzərə alıb, Lənkərandan "Hovon” (tərcümədə "Bacılar” mənasını verir, amma nədənsə onları "Nənələr” kimi tərcümə edirlər) ansamblını da gətirtmişdi. Bilmirəm Eldar Əzizovun Gülər Əhmədova ilə konflikti var, ya yox, ancaq bu "Hovon” ansamblı nədənsə "Qaynana” mahnısını oxudu.....
Seçici kimdir?
Bu Elşad Abdullayev dinc oturmur ki, oturmur. ABU-nun eks-rektoru YouTube-də bir "klip” yerləşdirib, həmən "klip”də Milli Məclisin üzvü, guya ki, Əvəz Zeynallının "şantaj” etdiyi, məhkəmədən "məni qoruyun” xahişini edən "qaynana” təxəllüslü (deyilənlərə görə Milli Məclisdə hamının təxəllüsü var, mən demirəm ha....) Gülər Əhmədova Elşad Abdullayevlə "deputatxananın” bir kreslosunun bazarlığını edir. "Klip”ə diqqətlə baxanda görürsən ki, bu "qaynana” böyük söz sahibi imiş, hətta respublikanın tək "seçicisinin” qarşısındakı "seçki siyahısını” da dəyişdirmək iqtidarında imiş. Bunu anlamayan Elşad Abdullayev yarım milyonla "kreslo” almaq istəyib, yarım milyonu verib, sonra gedib başqa kanallar axtarmağa ki, birdən ucuz alınar. Ay-hay, sən yəni "qaynananı” tanımırsan? A kişi, "qaynana” öz ağzı ilə deyir ki, bu respublikada bütün "razborkaları” mən aparıram, mənim sözümün qabağına söz çıxardan oğul yoxdur, sən də başlamısan ki, ay nə bilim filankəs belə gəldi, bəhmənkəs belə getdi, yəni ki, "caymısan”! İndi mənə bir şey qaranlıqdır, bu boyda "qaynana” necə oldu ki, məhkəmədə məsum görkəm alıb, özünün Əvəz tərəfindən "qorunmasını” xahiş etdi? Vallah mənə elə gəlir ki, deputatxanaya seçim edərkən aktyorluq bacarığına da xüsusi qiymət verilir. Bəs necə, gərək aktyor olasan ki, 50 manat təqaüd alan anadangəlmə birinci qrup əlillərin, hansılarının ki, həmən pul kommunal ödənişlərinə ancaq çatır, ah-naləsini eşidə-eşidə "analoqu olmayan iqtisadi inkişafdan, əhalinin xoşbəxt yaşamından və gözəl rifahından” ağzı çullu-çullu danışasan. Gərək aktyor olasan ki, bu boyda yeyintini, bu boyda haqsızlığı görüb, haqqdan-ədalətdən danışasan. Nə isə, bunlar öz aktyorluqlarında olsunlar, mən sizə Elşaddan danışım, deyilənlərə görə Elşad Abdullayev "zor” oğlandır, hətta rektoru olduğu universitetdə ödənişi edə bilməyən "papalarının gül balaları” olan tələbələrə "güzəşt” də edirmiş, yəni ki, ödənişi özü edirmiş, hələm həmin tələbələrə "rance rover”ləri yolda qalmasın deyə benzin pulu da verirmiş, üstəlik hər gün də "papaya salam de” deməyi də unutmurmuş. Hətta deyirlər ki, o qədər yaxşı oğlan imiş ki, yuxuda bir neçə milyon manat görüb və ayılıb görüb ki, həmən pul seyfdədir, təmiz oğlanlara həmişə yetirən-yetirir! Amma sonrası bir az yaxşı olmayıb, kor şeytan onu yoldan çıxardıb, aparıb salıb "qaynananın” cənginə, "qaynana” da gözünə döndüyüm elə bil "novostroyka” satır, əvvəl, yəni fundament qoyulanda deyib 500, sonra görüb ki, "binanın” istifadəsinə, yəni ki, seçkiyə az qalıb, dirənib deyib: BİR! Vəssalam, burda nə var ki, bu boyda ajiotaj qopartmışıq? Vallah Əli Həsənov da, Siyavuş Novruzov da düz deyirlər, bu məsələdən siyasi şou düzəltmək lazım deyil, axı Elşad Abdullayev üçün bir milyon nəmənədir ki? Bir də yatar, yuxuda görər ki, bir neçə milyon avro var, ayılar və .... yenidən milyonçudur! İndi bir milyona görə aləmi bir-birinə qatmaq nəyə lazım? Bu yandan da bir şans vermisən Əvəzə, Əvəz hakimə xitabən deyib:
-Yoldaş hakim, gülürsüz, deyəsən video-rolikə baxmısız...
ƏVƏZin əvəzi?
ƏVƏZ təzə tutulanda internetdə çox hay-küy saldım, hamını onun müdafiəsinə səslədim, gördüm ki, hayıma hay verən yoxdur qəzetimizdə "Selcanın məmləkəti” (ƏVƏZin tez-tez müraciət etdiyi mövzu idi) adlı yazı yazdım, sonra ƏVƏZin ANAsının məlum müsahibəsinə baxdım, (həmən müsahibənin linkini mənə Hilal müəllim göndərmişdi), "ANALARIN ANASI” adlı bir yazı yazdım, sonra vicdan sabirin ƏVƏZin üzünə durmaq istəyində olduğunu eşitdim, "Vicdandan vicdana” yazısını yazdım və beləcə daima öz baş redaktorumu müdafiə edən yazılar yazdım, sonra zamana fırlandı, o birisi baş redaktorumu da şərlədilər, indi analoqsuz respublikada yeganə şəxsəm ki, iki baş redaktorum həbsdədir, (dəli şeytan deyir bir ginnesin rekordlar kitabına müraciət elə) heç birinin mənim müdafiəmə ehtiyacı yoxdur, amma mən mənən özümdə bir borc bilirəm ki, onları, heç olmasa yazılarımla müdafiə edim, işimin müşkül olduğunu görən yaradan bu Elşad faktorunu atdı gündəmə ki, ƏVƏZin şərlənməsini bir daha hamı anlasın, İnşaalah Hilal müəllimin də belə bir günü olacaq, əminəm ki, hər iki baş redaktorum tezliklə amanlıqda, öz ailələrinin yanlarında olacaqlar, çünki onları həbsxanada saxlamaq əslində bu iqtidara sərf eləməməlidir, onlar zindanda daha aktivdirlər, nəinki real həyatda, hərdən tarixə baxıram: Cənubi Afrika Respublikası Nelson Mandellanı həbsə saldı və o həbsxanadan NELSON MANDELLA kimi çıxdı, aparteidi (yaparteid kimi oxumayın ha...) devirdi, gəldi hakimiyyətə, İsrail fələstinlilərin gözünü qorxuzmaq üçün Yasir Ərafatı atdı zindana və o zindandan YASİR ƏRAFAT kimi çıxdı və Fələstin dövlətini qurdu! Onlarla belə misallar çəkmək olar, sözümün canı odur ki, nə qədər ki, Əvəz Zeynallı, Hilal Məmmədov, Nigar Yaqublu, Zaur Qurbanlı və onlarla digərləri zindanda ƏVƏZ ZEYNALLI, HİLAL MƏMMƏDOV, NİGAR YAQUBLU, ZAUR QURBANLIya çevrilməyiblər, onları dərhal buraxmaq lazımdır, 37-ci il deyil cənablar, ziyalıların cibinə narkotik atıb şərləməyin, etdiyiniz hər bir xəta yaddaşlarda həkk olunur, o dünyada sözsüz bunun bədəlini ödəyəcəksiz, amma atalarımız da "qisas qiyamətə qalmaz” deyiblər, etdiyiniz hər bir əməlin qarşılğı qabağınıza çıxacaq, necə ki, Gülər Əhmədovanın qabağına çıxdı...
İ.S. Dəli şeytan deyir Gülər Əhmədovaya dəstək olmaq üçün keç YAP-a, ancaq yox e, pis dillər danışır ki, indi yapda o bir mandatın bazarlığı gedir, başları yaman qarışıqdır, mənim hayımda deyillər, şeytan bazar versin...
Rafiq CƏLİLOV,
celilovrafiq@mail.ru,
"Tolışon Sədo” N:33(45), 05 oktyabr 2012
|
