 Yeni yaradılan Azərbaycan Dövlətçiliyi Naminə Demokratik Talış Birliyinə müxtəlif münasibətlər mövcuddur.
Lənkəran Dövlət Universitetinin keçmiş rektoru, istiqlalçı deputat Hacıbaba Əzimov Teleqrafa açıqlamasında yeni təşkilatın Rusiya və İranın müəyyən qüvvələrinin sifarişilə Əlikram Hümbətovun adamları tərəfindən yaradıldığını bildirib.
Dünya Azərbaycanlıları Konqresinin (DAK) həmsədri, millət vəkili Sabir Rüstəmxanlı hesab edir ki, Azərbaycanda yaşayan talışlar türklərlə daim mehriban olublar: «İran və Rusiyadan qızışdırılan separatizm yaxın keçmişimizdən də gördüyümüz kimi effekt verməyib. Talış Muğan Respublikasının yaradılması süni şəkildə ortaya atılmış məsələ idi. Bu məsələdə iştirak etmiş şəxslərin aqibətini hər kəs gördü. Talışlar Azərbaycan xalqının bir hissəsidir. Onların mədəniyyətləri, folkloru həm də Azərbaycanın mədəniyyətinin bir hissəsidir. Azərbaycan gül dəstəsidir. O dəstədə bir-birindən gözəl güllər var, birləşib Gülüstan yaradırlar. Talışlar Gülüstanın ən gözəl güllərindən biridir. Onun mədəniyyətinin, folklourunun, halayının qorunması vacibdir. Zənginlik müxtəlifliyin qorunmasındadır. Əgər yeni yaradılan təşkilat mədəni məqsəd güdürsə, onda heç bir qəbahət görmürəm».
S.Rüstəmxanlı onu da bildirdi ki, Rusiya həmişə qonşuları ilə hərbə-zorba dili ilə danışıb: «İlk dəfə deyil ki, Kreml Azərbaycana qarşı bu cür münasibət göstərir. Əvvəllər də olub. Bu ölkə etnik qarşıdurma, torpaq münaqişəsi yaratmaq imkanlarından hər zaman yararlanıb. Amma bu dəfə cəhdləri baş tutmayacaq. Azərbaycanda avarlar, ləzgilər, talışlar bir ailə kimidirlər. Tarixi birlik bu gün xalqların doğmalaşmasına, qohumlaşmasına səbəb olub. Azərbaycanda separatizm olsa, faciə yaşanar. Görürsüz, bu gün dünyada supergüclər müsəlman dünyasında təfriqələr yaradırlar, müharibələr törədirlər. Azərbaycanda separatizm meylləri güclənsə, bu, bütün tərəflər üçün acınacaqlı sonluqla bitə bilər».
Sabiq millət vəkili, professor Cəmil Həsənli hesab edir ki, kimlərsə Azərbaycanda qəsdən, süni şəkildə etnik qarşıdurma yaratmaq istəyirlər: «Etnik qarşıdurmaya səbəb olacaq faktorlar yoxdur. O təşkilat da yeni yaradıb. Hələ bir fəaliyyət göstərsinlər, ondan sonra qiymət verərik. Mən yeni təşkilatdan Eldəniz Quliyevi tanıyıram, onunla gözəl münasibətimiz var».
Konstitusiya Araşdırmalar Fondunun prezidenti Əliməmməd Nuriyevə görə, bu gün Azərbaycanda etnik azlıqların mədəni hüquqlarını müdafiə etmək kimi bir problemləri yoxdur: «Hər hansı milli, dini və etnik cəhətlərinə görə ayrı-seçkilik yoxdur və olmayıb. Azlıqlara hər zaman tolerant olmuşuq. Talışlar və azərbaycanlılar arasında münasibət həmişə yüksək olub. Ölkədə bəlkə də yeganə olaraq talışlardı ki, Azərbaycan türklərilə inteqrasiya olunublar. Eyni dini, tarixi, taleyi paylaşırlar. Problemlər süni xarakterli olub. Erməni saytları Azərbaycanda etnik, dini qarşıdurmaların olduğunu yazırlar. Təbii ki, bu onlara böyük qardaşları tərəfindən verilən sifarişdir. Azərbaycanda vətəndaşların hüquqları pozlursa, bu insanların dini, etnik baxışlarına görə olmur. Hansısa məmur qanunları düzgün tətbiq etmir, fərdi maraqları üstün tuturlar və s. Bu üzdən də vətəndaşların hüquqları pozulur. Burada mənsubiyyətindən asılı olmayaraq, fərdlərin hüquqları pozulur. Etnik azlıqlar hakimiyyətdə təmsil olunurlar. Bir sıra hallarda nisbətdə götürdükdə etnik xalqların hakimiyyətdəki çəkisi türklərin çəkisindən böyükdür».
Ə.Nuriyevə görə, Azərbaycan dövləti xalqların mədəni hüquqlarının qorunması məsələsinə ciddi yanaşıb: «Azərbaycanda vətəndaş cəmiyyətinin qurulmasında burada yaşayan bütün xalqlar yaxından iştirak etməlidilər. Azərbaycanın ərazi bütövlüyü ayrılmazdır. Hər bir kəs bu ölkədə firəvan yaşamalıdır. Kimsə xarici qüvvələrin sifarişilə ölkədə etnik zəmində qarşıdurma yaratmaq istəyəcəksə, arzusu ürəyində qalacaq. Belə niyyətdə olanların heç Azərbaycanda yaşamaq haqqı yoxdur. Azərbaycanda yeni yaradılan təşkilatın təsisçilərindən olan Eldəniz Quliyevi tanıyıram. O, dövlətçiliyə bağlı insandır. Onun xarici ölkənin sifarişini yerinə yetirən insan olduğuna inanmıram».
talısh.org
|
