Dünən (6 oktyabr 2011-ci il tarixində) Ali Məhkəmədə hakim Tatyana Aleksandrovna Qoldmanın sədrliyi ilə Azərbarcan Respublikası CM-nin 274 ("Dövlətə Xəyanət”) maddəsi ilə məhkum edilmiş Respublika Talış Mədəniyyət Mərkəzinin rəhbəri və "Tolışi Sədo"(”Talışın səsi”) qəzetinin baş redaktoru olmuş AMEA Dilçilik İnstitutunun Roman-German dilləri sektorunun mərhum müdiri prof. Novruzəli Məmmədovun həyat yoldaşı Məryəm Məmmədovanın Bakı Apellyasiya Məhkəməsinin 29 aprel 2011-ci il tarixli qərarından verdiyi kassasiya şikayətinə baxılmışdır.
Ali Məhkəmə Məryəm Məmmədovanın və oğlu mərhum Emil Məmmədovun N.Məmmədovun ölümü ilə bağlı Ədliyyə Nazirliyinin Penitensiar Xidmətinə, Tibb Baş İdarəsinə, 15 saylı cəzaçəkmə müəssəsinə, Penitensiar Xidmətinin müalicə müəssəsinə və Maliyyə Nazirliyinə qarşı qaldırdıqları iddia üzrə Bakı Appelyasiya Məhkəməsinin qərarını qüvvədə saxlayaraq, onların kassasiya şıkayətini təmin etmədi.
Qeyd edək ki mərhumun ailəsi bu ərizələrində Novruzəli Məmmədovun müayinə və müalicə olunması vəzifələrinin icra olunmamasını (hərəkətsizliyi) səbəbindən onun yaşamaq hüququnun pozuntusu kimi qanunsuz hesab edilməsi, həmçinin cavabdehlərin hərəkətsizliyi nəticəsində onlara dəymiş mənəvi ziyana görə 3.000.000 (3 milyon) manat məbləğində təzminat ödənilməsi barədə iddia qaldırmışdılar.
Məhkəmədə İddia tərəfinin vəkili Ramiz Məmmədov çıxış edərək bildirdi ki, N.Məmmədovun 1 saylı istintaq təcridxanasından 15 saylı Cəza çəkmə müəssisəsinə köçürüldüyü ilk gündə - 14 yanvar 2009-cü il tarixində, ağır xəstə olmasına baxmayaraq, heç bir əsas olmadan 15 sutka müddətinə soyuq və rütubətli karserə salınıb, hər gün səhər saat 5-00-dən axşam 22-00-cən ayaq üstündə, qalan müddətdə isə soyuq döşəmədə yatirtmaları ilə məhkuma ağır işgəncə vermişlər.
Karser işgəncəsiylə bağlı olaraq onun Nizami Rayon Məhkəməsinə şikayəti həmin məhkəmənin 6 mart 2009-cu il qərarı ilə qismən təmin olunaraq, N.Məmmədovun müayinə və müalicə olunmusanı 15 saylı cəzaçəkmə müəssəsinin üzərinə qoyulsa da, o, nəinki heç bir ciddi müalicə almamış, əksinə, 20 iyun 2009-cu il tarixində ona vurulan müəmmalı iynədən sonra bədəni tədricən iflic olmuşdur. Nəhayət, 28 iyul 2009-cu ildə, Novruzəli Məmmədov son dərəcə ağır vəziyyətdə Penitensiar Xidmətinin Müalicə Müəssəsinə köçürülsə də, orada da ona heç bir tibbi və insani münasibət göstərilmədiyindən, o, növbəti ağır işgəncəyə məruz qalaraq 17 avgustda vəfat etmişdir.
Vəkil N.Məmmədovun son dərəcə ağır vəziyyəti ilə bağlı olaraq bütün büynəlxalq təşkilatların müraciətlərinə də ölkə rəsmiləri tərəfindən heç bir məhəl qoyulmadığı bildrildi. O, daha sonra əlavə etdi ki, hətta 30 iyul 2009-cu il tarixində Ombudsman Aparatının rəhbəri Elmira Süleymanova əməkdaşları ilə birgə Ədliyyə Nazirliyi Penitensiar Xidmətinin Müalicə müəssisəsində Novruzəli Məmmədovla görüşündən sonra yaydıqları rəsmi məlumatlarında "N.Məmmədovun səhhətinin yaxşı olmadığını, bir neçə ay əvvəl xəstələndiyini və bundan sonra bədənində kəskin ağrıların başladığını, ...N.Məmmədov müalicə müəssisəsində ona lazımi tibbi yardım göstərilməməsindən və buradakı şəraitdən narazı olduğunu” söyləmişdir.
Məhkəmədə cavabdeh qismində çıxış edən Ədliyyə Nazirliyinin Penitensiar Xidmətinin nümayəndəsi Elşən Həsənov N.Məmmədovla bağlı bütün müvafiq müalicə və müayinələrin vaxtlı-vaxtında keçirildiyinı, Hüquq Müdafiəçilərinin və Elmira Süleymanovanın dediklərinin isə heç bir hüquqi əsası olmadığını bildirdi.
Bir neçə dəqiqəlik məşvərətdən sonra hakımlər Bakı Appelyasiya Məhkəməsinin qərarını qüvvədə saxlayaraq N.Məmmədovun ailəsinin şikayətini təmin etməmişlər.
Məhkəmə zalında hüquq müdafiəçiləri - Azadlığın və Sülhün Müdafiəsi beynəlxalq hüquq təşkilatının sədri Mətləb Mütəllimli və N.Məmmədovun hüquqlarının müdafiə Komitəsinin sədri Hilal Məmmədov da iştirak etmişlər.
Qeyd edək ki, N.Məmmədovun işi üzrə Avropa Məhkəməsi Konvensiyanın 2,3,5,6,8,10,13,14, 1 saylı Protokolun 1-ci maddəsinin pozulduğu ilə bağlı materiallar artıq bu Məhkəmə tərəfindən qeydiyyata alınmış və bu son respublika məhkəmə prosesindən sonra yekun materiallarlar da N.Məmmədovla bağlı növbəti əlavə iş kimi ora təqdim ediləcəkdir.
TALISH.ORG
|