Главная » 2012»Июль»3 » Hilal Məmmədovun evində axtarış aparılması qanun pozuntuları ilə müşayiət olunub (yenilənib)
15:37
Hilal Məmmədovun evində axtarış aparılması qanun pozuntuları ilə müşayiət olunub (yenilənib)
"Tolışi sado” qəzetinin baş redaktoru Hilal Məmmədovun həbsi hüquq-mühafizə orqanlarının görünməmiş özbaşınalığıdır. Bu gün Reportyorların Azadlıq və Təhlükəsizlik İnstitutunun (RAT) Media Mərkəzində keçirilən mətbuat konfransının leytmotivi belə olub.
Onun həyat yoldaşı Bahar Məmmədova bildirib ki, axtarış aparanların vəhşiliyindən və özbaşınalığından şoka düşüb.
Onun sözlərinə görə, 25 nəfər mənzilə daxil olaraq H.Məmmədovun 80 yaşlı atası da daxil olmaqla, hamını bir otağa yığıblar. Onlar mənzilin altını üstünə çeviriblər. Sonra bildiriblər ki, H.Məmmədovun pencəyinin cibindən içində narkotik maddə olan bükülü tapılıb.
"Səhər mən ərzaq almaq üçün pul götürəndə pencəyin cibinə baxmışdım. Bu barədə axtarış aparanlara bildirəndə onlardan biri dedi: "Nə olsun, biz özümüz qoya bilmərik bəyəm?” Mən onların bu cür həyasızlığından şoka düşmüşdüm”, - Məmmədova bildirib. Axtarış sanksiya təqdim olunmadan aparılıb.
Talış Mədəniyyət Mərkəzinin rəhbərinin müavini Rafiq Cəlilov hesab edir ki, H.Məmmədovun həbsinə hazırlıq 2 ay əvvəldən başlanıb. Onun sözlərinə görə, mayın 25 və 26-da "Gündəm xəbər” qəzetində dərc edilən məqalədə bildirilib ki, "Tolışi sado” separatizmlə məşğul olur.
"Əslində qəzet bir ildən artıqdır ki, çıxmır. Mən "Gündəm xəbər” qəzetinin redaksiyasında oldum, bundan sonra yazıların dərci dayandırıldı”, - R.Cəlilov bildirib.
Onun sözlərinə görə, iyunun 9-da Talış Mədəniyyət Mərkəzinin Masallı rayonunun Mahmudavar kəndində keçirdiyi toplantı Məmmədovun həbsini sürətləndirib. Belə ki, toplantıda "Tolışi sado” qəzetinin bərpası qərara alınıb.
R.Cəlilovun fikrincə, H.Məmmədovun həbsinə onun yerləşdirdiyi "Tı kto takoy, davay do svidaniya” klipi səbəb ola bilər. O, istisna etmir ki, bu klipin Azərbaycana "Eurovision”dan daha çox şöhrət gətirməsi barədə H.Məmmədovun dedikləri prezidentin xanımı Mehriban Əliyevanın acığına gəlib və bu da fəalın təqib edilməsinə səbəb olub.
H.Məmmədovun hüquqlarını Müdafiə Komitəsi prezident İlham Əliyevə müraciət edərək fəalın həbsinə münasibət bildirməsini xahiş edib. Müraciət müəllifləri 40-dan çox tanınmış siyasətçi, alim, ictimai xadim, ziyalı, jurnalistlərdir.
H.Məmmədovun hüquqlarını Müdafiə Komitəsinin üzvü, Ziyalılar Birliyinin rəhbəri Eldəniz Quliyev bildirib ki, dindarlara və vətəndaş cəmiyyəti fəallarına qarşı narkotik maddə, silah saxlamaq kimi uydurma ittihamlar gülüncdür, vətəndaşların fəallığının qarşısının alınmasına yönəlib.
H.Məmmədov özü də hesab edir ki, onun həbsinə sözügedən klip səbəb olub. O, öz müraciətində bildirib ki, həbsindən dərhal sonra ona işarə ediblər ki, facebook-da hakimiyyəti tənqid etdiyinə və ictimai fəaliyyətinə görə cəzalandırılır.
H.Məmmədov qeyd edib ki, İnternetdə yerləşdirdiyi bu klip Rusiya KİV-də böyük maraq doğurub, NTV-nin çəkiliş qrupu onun yanına gəlib. O, qrupu iyunun 13-də Astarada talış folklor gecəsinə dəvət edib. Yerli hakimiyyət gecəni pozmağa çalışsa da, tədbir baş tutub. Həmin gecədə H.Məmmədov deyib ki, "əgər hakimiyyət Azərbaycanı dünyaya tanıtmaq üçün 1 mlrd. dollara yaxın pul xərcləyibsə, biz 1 qəpik belə xərcləmədən Azərbaycanı və onun ayrılmaz hissəsi olan Talışı bütün dünyaya göstərdik”.
Vəkil Ramiz Məmmədov bildirib ki, indiyədək H.Məmmədovdan qan və sidik analizi götürülməyib. Eyni zamanda istintaq tələsik olaraq "aşkar edilmiş” maddənin kimyəvi ekspertizasını aparıb və onun heroin olduğunu müəyyən edib.
O həmçinin bildirib ki, H.Məmmədov saxlanılarkən fiziki təzyiqlərə məruz qalıb. Onun bədənində zorakılıq izləri var. Nizami Rayon Prokurorluğu istintaq aparır.
Komitə həm Azərbaycanda, həm də xaricdə H.Məmmədovun hüquqlarının müdafiəsi ilə bağlı kampaniyanı davam etdirmək niyyətindədir. Çərşənbə axşamı saat 15.00-da Azərbaycanın Rusiyadakı səfirliyinin qarşısında etiraz aksiyası təyin edilib. * H.Məmmədov iyunun 21-də qanunsuz narkotik maddə saxlamaqda ittiham olunaraq həbs edilib. Günahı sübuta yetirilərsə, onu 12 ilədək həbs cəzası gözləyir.
