 Hərdən jıqo zındəm ki, çımı çiçımsə rəsdəni. Kədə, bədə qıyəvəno kardəm, peşo bəştə sıvol doydəm-çımı çiç rəsedəni? Çokə kom heste? Heste! Kəm heste? Heste! Kəyxıvandonım heste? Heste! Jıqo dyə kardedəm har şeyım heste, əncəx ijənən hiss kardəm ki, çiçimsə rəsdəni, bo ın çiçi qırdoıştə ha nəvedəm, ha boəyro qıyəvəno kardedəm, əy pəydo karde zındənim ki, zındənim. Məvuji iberdəmədə çımı qıləy hamsiyə bəmı votşe ki, şımə ve harabaxta millətişon, şımə nom heste, bəşmə müraciət kardeədə şımə nomi qətedən, əncəx bəmə bı dırozə soronədə nom nındınəy, noəşone. Ga tatar votşone, ga tırk votşone, ga azərbaycanlı votşone, ısətən mandəmon dıqlə nomi aradə, bə vəziyyəti dyə kardedəmon, lozim beədə bəştə tırk votedəmon, lozim beədə azərbaycanlı.
Hamsiyə çı qəpiku tikəy bə fam şem, tikəy fikim kay, bə sə dəşem ın çandə rüji bo çiçi nəvedəbim, məvot az bı çandə rüji ıştə kədə boştə gin bə, nyon bə zıvoni nəvedəbim! İberdəmədə ıştən bəştə votme- Az kim? Çımı bobon, çımı tobyə kiye? Oxo boçi Az ıştə nomiku, ıştə zıvoniku xəcolət kəşedəm? Boçi çımı əğlon, çımı kəxıvandon çımı zıvonədə, çımı moə zıvonədə, çımı yolə nənon, yolə bobon zıvonədə qəp jəy, sıxan karde zındənin? Məqəm ın zıvon çəvonən nənə, bobo zıvon ni? Bəs boçi əmə, çəmə kəxıvandon ın xosə zıvoni zındənimon? Çimi qıno kikuye? Kam mande ın sıvolon dılədə ıştə səən gin bıkəm, dyəm kay bəştə jiə umri, vindme ki, çimi qınon həmmə mıkun. Az bəştə Az vote zınəm ni.. Çımı kəxıvandonən bəmışon dyə kardə, bəştə Az vote zınəşon ni. Ki mıni məcbur kardedəbe ki, Az deştə kəxıvandon co zıvonədə qəp bıjənom, sıxan bıkəm? Hiçki, əncəx Az fikim kardəme ki, çımı əğlon bıdə ın tırkə zıvoni omuton ki, maştə koədə, bədə puçə holədə, axməxə vəziyyətədə nındınon. Əncəx bə sə dənışim ki, çımı kəxıvandon ıştə moə zıvoniku dyəro be-be, mıkuən dyəro bedən. Hejo de fikiyən dyəm kay bəştə hamsiyə, ə hamsiyə çımı çaşadə dınyo ən hərabaxtə odəm çiyəy, votme:
-Ne, xosə hamsiyə, əmə hərəbaxt nimon, hərabaxt şımənişon, düze əməni dyəçəmə nomi hele (vanq, sədo) kardedən, əncəx əmə bı nomi loyiq nimon, əmə ıştə zıvonədə qəp jəy zındənimon, əncəx bəşmə çı nomən bınən, şımə hejo ıştə zıvonədə qəp jəydəşon.....
De fikiyən oməym bə kə, çımı çandə sori ro həmro, çımı ailə deştə adəti beşe bəçımı nav, mınış fikin vindəsati mıku tırki zıvonədə xəbəş səy ki, "a merd, ijənən çiç bə?” Az bəy dyəm kay, hiçim nıvotme, dəvardim bəştə çaşmə, olaxtme ıştə vırədə, ijənən şem bə fik: "bəpe boçi çımı kəxıvandon çəmə zıvoni nıznon? In səhvi bəpe düzkəm”. İminnə ıştə həmrom vanqım kay, bəy Tolışi zıvonədə votme: "xosə jen, həni çımı kədə hiçki tırki qəp nıjəno, həni orəxəy, boy demınən, de əğlonən, de nəvonən Tolışi qəp bıjən, bə sə dəşeş?” Jen de təəcübinə çaşon bəmış dyəş kay, bə tırki votşe ki, "ıştı sə bı pyəmerdə vaxtədə xərob bə? Zə tı çiç votedəş, bə sə dəşedəş? Iştı Tolışi zıvon konco heste? Zə Likədə, Lankonədə, Masallıədə, Ostoroədə ki Tolışi sıxan kardedəki, əmənən Bokuədə Tolışi qəp bıjənəmon? Tı çiçe, pidə çəmə əğlon karyera məhf bıkəy? İjənən umjən beş bə ...... Tolışon? Çəmə kədə çənnə çımı nəfəs şedə-omedə, hiçki Tolışi qəp jəy əzıni. Əğlon səən xərob məkə, zınəy?” Dyəm kay bəştə jeni, dyəm kay bəştə davarda rüjon, votme: Ey dili-ğafil, boçi bımi ənnə imkanım doəme ki, ısət bəmı votedə ki, kədə hiç kəs Tolışi qəp ni bəje? Boçi vaxtədə demi Tolışi sıxanım nıkay ki, ısət əvən ıştə zıvoni bəqəm kardedəni. Ha, xosə handəkəson, ısət az ıştə kədə ginim kardə zıvonirom nəvedəm, pəydo kay zındənim ki, zındənim. Jıqo ki şedə, peş çımı mardə çımı nəsl-tobyə hiç bəştə Tolışən əvotnin, bəvoten ki, əmə çı tırkə Atabala nəslədəmon...
Isət xosə Tolışon, az hiççi votdənim, şımənən hələm i kərə bəştə kə dyəkən, qasbu şımənən ji şey ginon kardənbu....
Atabala BABAYEV,
Boku,
"Tolışon Sədo” nöm: 11(23), 31 mart 2012
|
