Ocəğ
Muxtar miəllim şedə bə katibi ğəbul. Vindedə iyo qıləy piyəjenən omə bə şikat. Hejo ğəbuli zalədə çəy dardiku holi bedə, dılış dəjedə. Votedə:
-Nənə, pidə katib ıştı xahişi bıməsı, quş bıdə bəçımı votəy. Hejo bə katibi kabinet dəşiş, bə zonə bınışt, daston dıroz bıkə bə Lenini şikli, bıvot: "Ha ocəği soyb, tı bəmı koməq bıkə!”
Tikəy davardedə, piyəjeni vanq kardedən bə dılə. Muxtar miəllimi umutəyon həmməy kardedə piyəjen. Katib Baxışov bedə. Rəyrə xəbə səydə:
-Hələ bunum Muxtar miəllim ğəbuli zalədəy, ya ne.
Votedən:
- Əyoy.
Əmr doydə:
- Əy vakənən bə dılə. Muxtar miəllim omedə.
Katib votedə:
-Muxtar miəllim, ım çı sıxane omutə bə piyəjeni? Ivrə ocəğe?
Muxtar miəllimən Muxtar miəllimən bə ha! Sıxani jinton mandəkəs nıbe, votedə:
-Həmro katib, ıvrə ocəğeyəni, əncəx çe partiyə ocəğe...
Roy səpe çokə kərtof bəbe
Muxtar miəllim bə ko şeədə vindedə ki, çəy xalə zoə Siyab parçini fırsınedə çe soy tərəfo bə roy tərəf, sərost kardedə. "Xıdo ğıvvət bıdə!” votedə, davardedə. Koo omeyədən Siyabi həmon vırədə koy səpe vindedə. Maştə muxtar miəllim ujən Siyabi həmon vırədə de parçini əlləyəkədə vindeədə, həni səbr kardedəni, votedə bə Siyabi:
-Siyab, xaləzoə, ə parçini pojon ikərədə biyə bıjən roy bın tərəfi. Zındəş oyo çoknə kərtof bəbe? Sığinə zəmini kərtof sə əbıni. Xəcolət məkəş, roy dənə bə soy dılə...
Im qədə butkə zandə...
Sıftə qıləy qədə butkədə bedəbe çə diy dukon. Dukondor, çoknə bəvotən, deştə ım butkə "ğaz jəydebə, ğəzən pur kardedəbe.” Xıdo bəçəy xəşi ğısmət bıkə, dı-se sori dılədə boştə rost kardəşbe qıləy imorət ki, odəmi pidəşbe dıqlə çəşən ğarz bıkə bəçəy tımşo mandeyro.
I ruj Muxtar miəllim məktəbo bə kə oqardeədə omedə mandedə çe butkə paliyo. Xəyli diyə kardedə bə butkə ujən bə dukondori kəy, de təəccubi iştən-bəştə votedə:
-Əxxəy! Tı bı qədə butkə zuy diyəkə ha! Im qədə butkə bı dıjdi imorətış zande ha!...
Muçək bəsə loşisə bənışte
I ruj Muxtar miəllim şedə bə rəykomi ğəbul. Diyə kardedə iyo xeyli odəm nıştə. əvən nubə qətedə, nıştedə qıləy kıçədə. Rəykom omedə. Çe odəmon arədə davardeədə votedə:
-Əxxəy, iyo çı veyə muçək heste.
Muxtar miəllim ım sıxanon məseədə əştedə səpo, bərkədə votedə:
-Həmro rəykom, muçək təmizə vırədə bedəni ki, əv bəsə mardə loşisə nıştedə.
Rəykom damə bedəni, ranqi doydə, ranqi səydə, iminə Muxtari ğəbul kardedə...
Tolışon Sədo, №08, 02.12.2011
