Hurmətinə duston, xosə tolışon!
Iştə fiki həzo-həlbət bə Şımə nəzə rosnero, ıştən 5 - 6 sor çımi bə nav şoyd bəm, qıləy hadisə barədə qəp jəy pidəme.
Ruji rujğoni xotım ve piyə ovo-alvodonədə "Həsənxan" nomədə qıləy riyaziyyat muəllim pepo be ki; "az şedəm bə Məkkə, bə Kəbə ziyarət. Iştə pə deştə jeniən bardəm bə hac!"
Votem: - "lap çok! Sağ-səlomət bışən, boən! Xıdo ğabulkə Şımə ziyarəti..."
Ha.., "Həsənxan" muəllimi bo ha i kəsi 3000 ABŞ dollariku, cəmi 9000 ABŞ dollar miğdarədə pulış dəvone bə Şeyxi idarə. İ qılə mande xumsi məsələ... Şeyxi idarədə bə "Həsənxan" muəllimi votəjonbe ki; "bəpe bo ha odəmiro 2500 ABŞ dollari miğdarədə xums bıdəjon! Iştənən, həmonə xumsi biən, bıdən bəmə! Əmənən, əy bərosnemon bə fılon vırədə jiyə, fılon nomədə qıləy səydi..."
Bo məsləhəti xotı mı bə "Həsənxan" muəllimi votme: - "Muəllim, Şımə fılon nomədə qıləy "səğırdoə", nezə alvodə jen çımi-çəy kədə kirənışte! Ğasti, Şımə həmonə xumsi bəy bıdəjon. Bıdə əv boştə zəmin bıstəno, çaşməy kə bıkə! Həm Şımə səvob ğəzənc bıkən, həmən, çəy ko duz bıbu!"
"Həsənxan" muəllim sı-porta be çımı səpe! Vote: - "Tə bəqəm, muşteyidonsə vej zındə?"
Mı, həni bə "Həsənxan" muəllimi hiç çi nıznəme vote...
"Həsənxan" muəllim xezonumjənə şen bə hac, oməyn! Isə əvon çan sor heste ki, həcin...
Çəy nezə alvodə jenən, hələ çımi-çəy kədə kirənışte...
Bəmı məsırən, xosə duston! Çımı zınəy, həci "Həsənxani" bəvədə çı Əli kıloş bə Vəli sə eloxtınije!?
Şımə san ve dojne pidənime! Əlğərəz, oməym, rəsəym, bə "Tolışi zıvonədə qəp jəy" məsələ...
Bovə bıkən! Çoko, fılonə səydi bə "Həsənxan" muəllimi doə xumsi hiç edociş nıbe... - jəqoən, ımruj, urusi de tırki "çı tolışon de i-yəndı çəvon zıvonədə qəp jəyro" - hiç edocijon ni! Duze, odəm çanə ve zıvon bızıno, ənə çəy səbarziye!
İntasi, odəm ıştə doğma, azizə, şinə moə zıvoni oqəto, deştə xeyzoni, ovo-alvodi, tay-tuşi co zıvonədə ğart-ğurt bıkə, - ım, ve yolə qınoye!
Tolışon! Imruj, hiç milləti bəmə edoji nije, ğərəz Tolışi!
Imruj, çəmə ıştə kanədə çəvon zıvonədə qəp jəyro - hiç milləti edoci nije, ğərəz Tolışi! Nije, nije, nije!...
Boən, Əli kılo bə Vəli sə mənəmon! Çəvon ulqion duz əvonin! Bıdə, Vəli ıştə kılo səkə, Əliən ıştə kılo!
Bəvədə, har çiən xos bəbe...
Bə Şımə de ve yolə hurməti,
Şımə boli, Mehdi bəq
