Şox – baməro dı tərəfəjon beka!
Qıləy şox hejo "tolış” kəlmə məsə sati, çə tərəfo pekkudə bə çəmə kəmi. In şox həm dıroze, həmən tije! Zındəjon çə şoxi soybon kin? In şox çə odəmone ki, əvon çığın-çəğın bə çəmə vətən bə ekspedisiyə omən bo xəlxon arə jəy! Əvon hejo pidəşone ruşnə ovi lil bıkən, çəğın vəy moy bıqəton! Yəne, tolış ıştə nomi qətə sati, bəy ğəsto qıləy şox pekkudən, əy kardən "separatçi”! "Separatçi” damğə jə bə peşt əy kardən lol! Lol bə peştən inson bedə muti! Mılxəs, ımiən zındəjon ki, muti bə kəsonən idarə kay ve hostone! Çı şoxi soybon kon xəlxi odəmonədən, zıne bedəni? Əvon çokə maskəjon jə bəştə dimi, dəşən bə çəmə tırkə bolion dılə, pidəjone de çəvon nomi bəmə şox pekkun. Əmma, ne.., çəvon koy nıqəte! Bı nezono bə həmonə ekspedisiyə dılə qıləy yolə vəlvələ eqne! Çı tırkə bolion mudrik, alicənob qıləy yolə zoə - Eldəniz Quliyev əşte səpo, sinəş doy bə nav! Bəyonış karde ki, tolışon tarixən de azəri tırkon bo bən! Bəvon peraşə kəs, hejo bəməne peraşdə! Çəvon çı milli-mənəvi, mədəni problemjon heste, hisob kardəm ki, ımrujnəku bəmə peştpur bənen be! Həmonə problemon həll kardero, əmənən deəvonim! Imruj həm çı tırkon, həmən çı tolışon yolə zoəye Eldəniz Quliyev! Ha..., yo beədəbəti xıyo be dı miçə..! Çə məkrinə xonəxon şoxon bənə lızbinə ropi şoxon qədə-qədə dəşdən bə çəvon luz! Çı dırozə şoxon eda təri omdəmon.
Şox, ın soxə şoxe ki, çı nezə tərəfo dəkkudən bə çəmə kəmi! Ho-ho-ho..! "Nomxıdo, həzo nomxıdo, yamana şoxe!” Bı şoxiku ve tarsdəmon! Im kırte, əmma çəy tık bənə şımşiye! Bə dırozə şoxiku veən tarsdənimon, əmma ın kırtə şoxi əmənış jə bə yəvoni! Boçi? Çumçıko, ə şox dıroze, odəm deəroco vində. In şox ısə boy kırte, ımi hiç curə vinde bedəni. İ kərən vindəmon dəşə, çəmə ləvəj ka vırti-vılo! Şinə bon, ın şox çı tolışon şoxe,! Iştə mon əvino kardə tolışon kırtə şoxe, ın şox! Əmə otdəmon "inə”, "inə zıvon”, "inə lay-lay” - əvon bamə şox bekardən! Boçi? Im çı bəloye, Xıdo dıçu ka bəçəmə coni? Qınomon çiçe? Zındənimon! Da-ponzə kəsi ıştə ko-sənət şıdoə, conjon noə tolışi roysə, de tarsi-larzi bə hərəkətin baçəy mənəvi jiyemoni. Hejo kali tolışiən şox beka, bo çəvon qədə jəy?! Yəvonəti əve ki, ımruj çı tolışi ən yolə dışmen hejo kali tolışe! Imruj kali dəmərəsə tolış bəy çoki kardəkəsi peqətdə bə şoxəpitkə! Imruj kali tolış bənə Çingiz Aytmatovi nıvıştə Jolamani pidəşe ıştə moə bıkışto! İlahi, ım çı yolə xətoye, dəy dimbədim mandəmon!? IŞTI zəifə bəndəmon, bəmə komək bıbi, YA RƏBB !
Imruj Milli Məclisədə və ya co yolə vəzifədə nıştə kali tolışon ijənən bə sə dəşe bedə! Əvon bəştə cifi qorə ıştə mənəviyyotjon noə bə kəno. Bo puliro bəmə şoxə pitkə pekkudən, qırəpoşnə jəydən! Çəvon nomə qətdənim, çumçıko əvoni həməkəs zındə.
Dard əve ki, kali tolışon bo ləvəy nuniro şəv-ruj bə çanpoçən, əvonən bamə şox beka!
Əvoni bə sə dəşe bedəni? Əvon çiçe pidə? Çəvon ozo kon kəmədəy? Zındənimon!!!
Bəçəy qorış, həm bı tərəfi, həmən bə tərəfi oşqo otdəm: - Bamə hədərə vırədə şox beməkən! Imi bıznən! Rə-di şımə şoxon barışdemon! Oxi ın vətən çəmə İnəye, tolışi zıvonən çəmə İnə lay-laye! In vətən - Azərbaycane, əv çəmə cone, bamə azize! Əy bəpe dıli-sıxto nığo bıdəmon! Çumçıko, çəmə co vətənmon ni! Çəmə həxe vətənədə ıştə Moə zıvonədə qəp jəy! Çəmə həxe ıştə vətənədə Pə nəsihəton məse! Çəmə həxe ıştə vətənədə deştə hırdənon nənə zıvonədə qəp jəy! Ne, əqəm deştə əğlon nənə zıvonədə qəp əjənimon, bəbemon be son! Bedəmon "b e v a r i s”! Yurd omardə şox soybon, pidəne tolışi kiə ikərəti okışiyo!?
Dınyoədə bo insoniro hiç şey Moə zıvonisə bılınd, şərafətin ni! Az ıştə fiki bı həxədə de mudrikə odəmon kəlomon sə kardəm.
Çı Azərbaycani ve ruşinfikə ziyali, kinodramaturq Eldəniz Quliyev otdə: - "Əqəm bıznom ki, çımı moə zıvon maştə bəmarde, az ımrujnəku bo marde hozım!”
Çı qurcion yolə filosof-nıvıştəkəs İlya Çavçavadze: - "Iştə vətəni, moə zıvoni, dini nıpiəkəs inson ni!” nıvıştedə.
Çı uruson mutəfəkkir nıvıştəkəs Konstantin Paustovskiy ısə boy, "Ə inson ki, bəştə moə zıvoni per diə kardə, əv divine!” hisob kardə!
Mehdibəy Səfərov,
Azərbaycani Dövlətəti Nominə Demokratik Tolışə İbeymoni sədr
|
