Zıvoni barədə
1. Ay çımı bıyon, bəşmə məlume ki, əmə – miəllimon dəvardəninimon həniyən qıləy yolə mıhokiməo! Əve, hərəkət bıkən, bıdə şıməhon veyni miəllim nıbun.
2. Çumçıko əmə həmməy vey dəlvırdiyeydəmon. Deştə sıxanon dənılvırdiyə qıləy xonəxo, cəmi andomış bə nıxtə jə bıə kamil qıləy insone.
3. Bəmə itoət bıkən votəynə, ləğom dənoydəmon bəştə aspon qəvi, jıqonə qordıneydəmon çəvon cəmdəki.
4. Bunən, qəmiyonən çanən yol bıbun, vavaz əvoni çune bıpiyoşe bıboən, roməvoni dıli çune piyeydəşbu, de qıləy qədə sukoni koməqi qardeydə bəvrə.
5. Zıvonən jəqoye, andomi qıləy qədə orqane, əmma ıştəni vey pekırneydə. Diyəkən, qıləy qədə zik suteydə qıləy yolə vişə!
6. Zıvonən otəşe. Zıvon çəmə andomi orqanon dılədə nohəxəti dınyoye. Əv ləkə jəydə bəçəmə cəmi andomi, jıbızın de cəhənnımi otəşi koməqi vəş noydə çəmə jimoni həmə şemoni.
7. Çumçıko pidə çe həyvonon, pidə çe pərəndon, pidə luzəfırs kardə həyvonon, pidən çe dıyo məxloğon har qılə cins de bəşəri nəsli dasti həmul kardə beydə iyən həmul kardə bıə.
8. Əmma zıvoni hiç kəs həmul karde zıneydəni. Zıvon qıləy bəloye ki, hiçki qəte zıneydəni çəy navi. Zıvon pure de kıştə zəhə.
9. Deştə zıvoni əmə dıvo kardeydəmon bo Xıdo. Deştə zıvoniyən lənət voteydəmon bə Xıdo simoədə ofəyə bıə odəmon.
10. Həm əhsən, həmən lənət eyni qəvo beşeydən. Çımı bıyon, ım jıqo bıənin ni.
11. Eyni honi çəşməo bebəşe yəne suyə iyən şinə ov?
12. Çımı bıyon, inciyə do zeytun, anqıə rəz esə boyinci perosniye bəzıne? Jəqoən suyə honiyo şinə ov ome əzıni.
Həğiğiyə mıdrikəti
13. Şıməhon dılədə hestin mıdrikə iyən dərrokəynə odəmon? Bıdə əv deştə çokə jimoni tərzi, de ıştə mıdrikətiku ofəyə həliməti nişo bıdə ıştə çokə əməlon.
14. Intasi şımə dılonədə hestebu telə rıvınəti, xudbinə ehtiros, peməkırnən ıştəni iyən bə həşə məjənən həğiğəti.
15. Jıqo mıdrikəti peyo omə mıdrikəti ni, əncəx çı dınyo, ğeyri-ruhaniyə iyən şəytonə mıdrikətiye.
16. Çumçıko konco rıvınəti iyən xudbinə ehtiros hestebu, har curə hərkihərki iyən yavə əməl heste əyo.
17. Əmma peyo omə mıdrikəti, əvvəlo, sofe, çəyoən sulhpərvəre, mıloyime, itoətkore iyən pure de xəymandə bəhron, beğərəze, beriyaye. 18 Sulhi ofəyəkəson kaştə sulhi tumonku perəseydə salehəti bəhrə.
Kalomi peqordıniyə kəs:
İradə Məlikova
