 Azərbaycan iqtidarı son dövrdə təlaş içindədir. Analitiklər Ərəb baharının Azərbaycana yaxınlaşmasını proqnozlaşdırır. Azərbaycanın təbii sərvətlərindən gələn gəlirlərin mənimsənilməsi hesabına təpədən-dırnağa qədər harınlaşmış İlham Əliyev başda olmaqla iqtidar mənsubları vəziyyətdən çıxış yolu arayır. Rejim MTN, DİN, prokurorluq, ordu, ədliyyə, habelə büdcədən maliyələşən orqanlar vasitəsilə Azərbaycan xalqı üzərində total nəzarətini son həddə qədər gücləndirib. İqtidar mənsubları ölkə daxilində saxladığı analitik proqnoz verənlərlə kifayətlənməyərək, situasiyaya nəzarət etmək üçün xaricdən belə insanları dəvət edir.
Məmləkət sosial partlayış həddindədir. Rejim jurnalistləri qondarma ittihamla həbs edir, ölkədə söz, birləşmək, kütləvi tədbirlər keçirmək kimi demokratik cəmiyyətə xas olan elementar azadlıqlar təqib edilir, bütün seçkilər total şəkildə saxtalaşdırılır, vicdan azadlığına görünməmiş həddə sipər çəkilib, məmləkətin əzəli köklü xalqların tanınmasından imtina edilib, iqtisadiyyat tam inhisarlaşdırılıb, dövlətin idarəçilik forması olan respublika üsül-idarəsinin əsaslarına zərbə endirilib, bir sözlə cəmiyyət sosial partlayışa məhkum edilib.
Cəmiyyəti sosial partlayışa məhkum edən rejim öz ömrünü uzatmaq üçün ağla gələn və gəlməyən, insanlığa yaraşan və yaraşmayan ixtiyarında olan bütün daxili və xarici imkanları hərəkətə gətirib. Onun üçün müqəddəs heç nə qalmayıb. Hər şey hakimiyyətdə qalmaq və onu əldən verməmək naminə səfərbər edilib. Hətta Azərbaycanın ən ağrılı problemi olan və azad edilməsi heç bir vaxt rejimin marağında olmayan Qarabağ faktoru, Azərbaycan əhalisinin əksəriyyətinin sitayiş etdiyi islam dini, ölkə ərazisində yaşayan köklü xalqların taleyi hərraca çıxarılıb.
Ağlı başında olan hər kəs çox gözəl dərk edir ki, rejimin mahiyyətində parçala və hökm sür prinsipi durur. İstər rejimin banisi Heydər Əliyevin hakimiyyətə gəlişi, istər hakimiyyətin varisə ötürülməsi və indiyə qədər saxlanılmasının kökündə duran bu prinsipin əsasını traybalizim, regionçuluq, çoxmillətli məmləkətin xalqlarının qarşı-qarşıya qoyulması təşkil edir.
Bütün bunlara rəğmən bu ərəfədə Ermənistanın paytaxtı Yerevan şəhərində Talışşünaslıq Konfransının keçirilməsinin planlaşdırılmasını biz təsadüfi hesab etmirik. Təkzibedilməzdir ki, başda prezident administrasiyasının rəhbəri Ramiz Mehdiyev olmaqla iqtidar mənsublarını Ermənistan höküməti və ermənilərlə hətta qohumluq əlaqələri də daxil olmaqla dərin tellər birləşdirir. Onların maliyə, iqtisadi, tarixi bağlılığı vardır. O da şübhəsizdir ki, rejimin Azərbaycanda ömür sürməsində ən çox marağı olan qüvvənin özü də rejim mənsublarından sonra Ermənistan hakimiyyətidir. Belə bir konfransın Əliyev iqtidarı üçün daxili və xarici vəziyyətin çətin olduğu indiki şəraitdə keçirilməsini təsadüfi hesab etmirik. Buna ilk növbədə rejimin əlinə ölkədə ictimai fikri pis halda yayındırmağa, yaxşı halda özünə tərəf dəyişdirməkdə yalnız ağılsızlar şübhə edə bilər. Ən maraqlısı isə odur ki, rejimin və onun xəfiyyə sisteminin dutkası ilə işləyən olaylar.az, oxucu.info kimi saytlarla yanaşı özünü demokrat kimi qələmə verən bir sıra ünsürlər vətənşüvənlik qaldıraraq Azərbaycanın əzəli xalqı olan talışdan düşmən düzəltmək işinə girişiblər. 18 ildir "separatçı” yarlığı yapışdırılan xalq bu gün pia.az kimi üzdəniraq mətbu vərəqələrin gözündə "iran agenti” kimi görsənir.
Məhz zindanda faciəli şəkildə qətlə yetirilmiş "Tolışi Sədo” qəzetinin baş redaktoru mərhum prof. Novruzəli Məmmədovu və hədsiz təqib-təzyiqlərə məruz qalmış yüzlərlə digər talış ziyalılarını İrana işləməkdə, son günlərdə isə (nahaq yerə 11 il 6 ay azadlıqdan məhrum edilmiş) astaralı dindar Ruhulla Axundzadəni İran TV-yə talışların haqqının tapdalanması barədə yanlış məlumat verməkdə suçlamaq və i.a. halları buna misal gətirmək olar...
Əgər tarixi, mədəni, etnik, milli və sair əsaslara görə İran torpağına sevgi şpionluqdursa, onda analoji hissləri Turkiyəyə qarşı biruzə verən turk qardaşlarımızın hərəkətləri nədir?!
Məlumdur ki, talışlar hətta İranla bütün gediş-gəlişini kəsən Sovet imperiyasının ən qızğın vaxtlarında belə dinlərinə xilaf çıxmayiblar. Necə deyərlər stalin rejimi dinimizi əlimizdən ala bilmədi. Stalin və onun qurduğu diktatura məhv oldu, dinimizi isə yaşatdıq. Bu gün qonşuluqda İrandır deyə dinimizdən imtina etməliyikmi? Bu gun dinimizi əlimizdən almaq istəyənlərin məhvə məhkumluğu mutləqdir. Heç kəs unutmasın ki, talışların Azərbaycanın ərazi bütövlüyü uğrunda verdiyi şəhidlər ata-babalarımızın illər ərzində daşıdığı islam əxlaqı ilə formalaşmışdılar.
Özlərinin milli şovonizminə söykənən maraqlarından çıxış edərək kimin nə deməsindən asılı olmayaraq bu gün talış xalqının öz Vətənində ciddi problemləri vardır. Aydın başa düşüləndir ki, bu problemlərin bir qismini dövlətimizin titul xalqı olan türk qardaşlarımız bu gün bizimlə bölüşür. Eyni zamanda sırf bizim milli mənsubiyyətimizlə bağlı olan problemlər movcüddür ki, bunu özünə demokrat adını qoyan hər bir şəxs tanımağa borcludur.
Bu gün biz bir mənalı olaraq dərk edirik ki, problemlərimzin həlli Azərbaycanın demokratikləşməsində, Azərbaycanda demokratik cəmiyyət quruculuğundan keçir. Elə isə qoy ölkə demokratları düşünsünlər. Bizləri özündən itələməklə onlar hansı həddə demokrat ola bilərlər.
Musa Qurbanov,
Rusiya Əhlibeyt Cəmiyyətinin sədri
|
