 Çəmə mısohib Respublikə Tolışə Mədəniyyəti Mərkəzi (RTMM) sədr şair Əli Nasiri. Dı sairi RTMM-i umrujnə vəziyyəti iyən co məsəlon barədə bə sohbəti Bəşmə nəzə rosnedəmon.
- Əli Boyli, zəhməte, RTTM-i ımrujnə vəziyyəti barədə bə çəmə handəkəson tikəy məlumat bıdənən.
- Əvvəla, az ım imkoniku istifadə bıkəm, bə şımə handəkəson çı Xıdoku xəşəconi orzu bıkəm. Əv ki, mande çəmə Mədəniyyət Mərkəzi ımrujnə vəziyyəti, vote bəbe ki, Azərboyconədə milli məsələ ısət ən lanqə məsələye. Nafqo ujənən hiç nıbu AR Prezident Aparatədə iqlə dı koy məşğul bə orqan hestbe (formalən bıbu). Isət əvışonən ləğv kardə. Isət tirki votənəy: "Başlı başın saxlasıne”. Imruj Azərboyconi hukumət ın olkə bə dınyo bənə tırkə devləti təqdim kardə. Co milləton hiç bə hisobən say kardəni. Ha milləti ğıryət heste, hınəş heste ıştəni bı ərəfədə çı məhv beyku oqəto. Umumi peqətiyədə Azərboyconədə cəmi milləton Mədəniyyət Mərkəzon iflic vəziyyətədən. Hejo bə cumlədən çəmə Mərkəz. Xıdo ıştən rəhm bıko.
- Tolışi Mədəniyyəti Mərkəz haliyədə, ısət de çiçi məşğule?
- Votımone ki, ha mılləti hınəş heste ıştəni oqəto. In devr bı olkə millətonro iqlə imtəhanə devre. Vey odəmon qırəy kardən ki, Mədəniyyət Mərkəzi fəaliyyət zəife. Azən rozi. Əmmo bı olkədə jiyə co milləton vəziyyəti diyə kardeədə əmə bəpe şukr bıkəmon. Çı Tolışi movcudiyətiku jıqo (əlbətki Tolışi Zərdusti zəmonə istisnae) nıvıştəbə ədəbiyyotış dastədə ni. Həmişə ın-əv milləton tarıxənıvışton əçəy barədə məlumatışon doə. Əçəy ıştən alimon, ruşinfikronən bə co milləton nıvıştəbə ədəbiyoti xıdmətışon kardə. Isət kam-kam ıştə moə zıvonədəşonən nıvıştəbu əvonən məydonədə ni. Əmo boy ısət əmə ıştə moə şinə zıvonədə fundamental ədəbiyot ofəyedəmon. Isət çı Tolışi 20-30 həzo kitobiku ibarət kitobonış heste. Çı kom milləti nıvıştəbə ədəbiyotış heste bəyro məhv be çı arəku şe tars ni.
- Şair, Mədəniyyət Mərkəzi fəaliyyəti rost kardero çiç karde lozime?
- Ğeydım karde ki, hiç kəsiku - nə hukumətiku, nəən beynəlxalq təşkilatonku bəmə hay ni. Tolışi həxon bərpo kardero 6-7 manq çimi bə nav bə Respublika Prezidentiən de 1000 imza muraciətımon karde, əmo desə ısət hiç qılə cəvob ni. Imon bə cəhəndım, oxo çəmə milləti ıştə hırdənonkuən bəmə hay ədə ni. Bıvotım ki Tolışi imkoninə zoonış ni, əv du bəbe. Tolışi nəhənqə zoonış veye, intasi ya əvon hələ tam dərəsmon bənin, yaan ki, əmə ıştə sədo bəvon rosniye zındənimon. Bı jıqo məsəlonədə bəpe həməyəvo ivrədə zu bıjəniy, ko bıkəy.
- Mədəniyyət Mərkəzi fəaliyət bəs əyalətondə çı curəe?
- Çəmə Tolışə cəmaati jimon çı vəziyətədəe ıştən yəğın zındon. Mənəvi inkişaf dı maddi inkişafi vəhdətədə bedə. Im aksyomae ki, maddi kosib bə kəs tənbəle, mənən kosib bə kəs bədbəxt (Vay bə ruji kom millətsə mənən kosib bıbu). Çəmə camaat ısət nımardbıji vəziyətədəy. Bə vəziyətədəən inson əncəx məşğule dı harujnə jimoni tələbati fikri karde. Əmo də çətinə jimoni ujənən şukr bə Xıdo Tolışi şairon, ədəbiyotşunason nıvıştən, sati votıme ıştə hırdənon xırtəku bıriyedən, moə zıvonədə kitobon çap kardedən. Bı proseson şeədə xususən yolə zəhmətışon heste Allahverdi Bayrami, Rabil Abdinovi. Çəvon fədakarəti ğeyd nıkarde beinsofəti bəbe.
- Əli Boyli, bə Tolış xəlği çı muraciət karde əpiy?
- Çənədə imkon eqniyə bə dast, az çığıno ladəy ğeydım kardə bə həmonə imkoninə Tolışə balon muraciət kardəm: Əzizə boon, Tolışədə hiç vaxt piəçın bəni, əbıniən. Əmə bə co milləton hiç vaxt bo maddi koməqiro qıy şat nibəkamon. Iştə xırtəku bəbıremon ıştə piyəy bəkamon. Çəmə milləti əzizə avlodon, boən çimi bə peştən bə ico milləti mənəviyyati məsələ ivrədə fik bıdəmon, çəmə milləti jiye həxi ivrədə mudafiə bıkəmon. Hələ ki di ni!
Bəşmə həmə çı Xıdoku xəşə coni, maddi və mənəvi dəvlətin be orzu kardəm.
Mısobibə peğətəkəs: Çarbədar
|
