Ə.Həsənov İranın "dinini də, ruhaniyyətin də saxta" hesab edir
QHT-lərə Dövlət Dəstəyi Şurası (DDŞ) cümə axşamı Beynəlxalq Mətbuat Mərkəzində (BMM) "Vətəndaş cəmiyyətinin inkişafında QHT-lərin rolu” adlı konfrans keçirib.
Amma Prezident Administrasiyası ictimai-siyasi şöbəsinin müdiri Əli Həsənovun konfransdakı çıxışı mövzudan çox kənara çıxaraq, Azərbaycan iqtidarına tənqidi mövqe tutan bütün şərq və qərb istiqamətindəki beynəlxalq qurumlara, dövlətlərə qarşı yönəlib.
Bu da son 3-4 ayda beynəlxalq qurumların və bir sıra Qərb dövlətlərinin Azərbaycanı kəskin tənqidə məruz qoyması ilə bağlıdır. Bu tənqidlərin kökündə rəsmi Bakının beynəlxalq təşkilatlar önündə götürdüyü öhdəlikləri yerinə yetirməsi tələbi durur.
Ə.Həsənov Azərbaycanda QHT-lərin inkişafı, iqtidar-QHT münasibətlərindən danışıb. QHT-lərə DDŞ-nin yaradılması ölkə QHT-lərinin xarici donorlardan asılılığının aradan qaldırılması adlandırılıb. Beynəlxalq donorlar ölkə QHT-lərini Azərbaycanın maraqlarına cavab verməyən layihələrə yönləndirməkdə ittiham ediliblər.
Ə.Həsənov ilk tənqid hədəfi kimi "Amnesty İnternational”, "Fredoom House”, "Human Rights Watch” kimi təşkilatları seçib. "Bu təşkilatlar elə bilir ki, Azərbaycana gələn kimi onların qulluğunda durmalıyıq, onlar bizi Afrika dövləti sayırlar”, - deyə bu qurumları Azərbaycanı aşağılamaq istəyində ittiham edib. Bu tənqidin arxasınca Azərbaycanda mədəniyyət olanda Avropada mədəniyyət olmaması kimi "dahiyanə tezis” səsləndirib.
Qərb mətbuatının, transmilli teleşirkətlərin rəsmi Bakını kəskin tənqidə məruz qoymasını ağrılı qarşılayan Ə.Həsənov bu telekanallara 20 il ərzində Qarabağ problemi haqqında danışmamaları iradı tutub. Böyük Britaniyanın "The İndependent” qəzetini xüsusi tənqidə məruz qoyan Ə.Həsənov qəzeti Azərbaycanın Qarabağ problemindən yox, jurnalistin döyülməsindən, müxalifətin sıxışdırılmasından yazmaqda ittiham edib. "Dünyanın heç bir yerində müxalifət bu qədər azad deyil”, - deyə Ə.Həsənov ən azı sensasiya sayıla biləcək bəyanat səsləndirib.
Ə.Həsənova görə, Avropa Parlamentinin Azərbaycanla bağlı qətnaməsi qərəzdən doğub. "Biz onlara sərf edəndə tərəfdaş oluruq, sərf etməyəndə düşmən”, - deyə Ə.Həsənov Azərbaycan-Avropa münasibətləri haqda rəy verib. "Baxın, görün Avropa özü nə gündədir, Şərqi Avropa böhran içindədir”, -deyə şöbə müdiri Avropadan nümunə götürəcək bir şey olmadığına inandırmağa çalışıb.
Ərəb ölkələrində baş verən inqilabları transmilli teleşirkətlərin fəaliyyəti sayan Ə.Həsənov onları pisləyib. "50 il idi Hüsnü Mübarək sizə sərf edirdi, indi pis oldu, Misir dövlətçiliyi nə günə qaldı?”, - deyə Ə.Həsənov ərəb ölkələrindəki proseslərdə Avropanın roluna dəyər verib.
Azərbaycanın müxalifət qüvvələri də tənqiddən kənarda qalmayıb. "Radikal müxalifət” antiazərbaycançılıq, rəzillik, düşmənçilik, antimilli olmaq ittihamına məruz qoyulub. "Eurovision” müsabiqəsi çərçivəsində ölkəyə gələn xarici jurnalistlərə paytaxtın təmtəraqdan uzaq kənar yerlərinin göstərilməsi Ə.Həsənovun qəzəbinə səbəb olub. Onun fikrincə, xalq belə müxalifətə səs verməz və belə müxalifət hakimiyyətə gələ bilməz, xalqın etimadını qazana bilməz. "Bu necə xalq gəzintisidir, dəstə ilə gəlib xarici jurnalistlərə açıqlama verirlər”, - deyə şöbə müdiri müxalifətin 25 may xalq gəzintisi aksiyasını tənqid edib. Ə.Həsənov İctimai televiziya önündəki aksiyada iştirak edən xanımları aşağılamaqdan da çəkinməyib. "Dilim də gəlmir onlara xanım deyim, özlərini bilə-bilə yerə çırpırlar ki, polis "ora-buralarından” tutsun və televiziyalar çəksin”, - deyə Ə.Həsənov aksiyadakı xanımlara təhqiramiz münasibət ifadə edib. Ə.Həsənov "Eurovision” müsabiqəsi günlərində müxalifətin keçirdiyi aksiyaları ölkənin mənfi imicini formalaşdırmaq kimi dəyərləndirib.
Ölkənin dinin fundamentalizmə qarşı mübarizə aparmasına toxunan Ə.Həsənov bu müstəvidə İran-Azərbaycan münasibətləri haqda danışıb. "Sənin dinin də saxtadır, ruhaniyyətin də saxtadır”, - deyə Ə.Həsənov İranın Azərbaycana mənfi mövqeyinə münasibət bildirib.
Müzakirələr zamanı natiqlər Ə.Həsənovun "tezisləri”ni inkişaf etdiriblər. Yekun olaraq, Avropa Parlamentinin Azərbaycanla bağlı tənqidi qətnaməsi əleyhinə bəyanat qəbul edilib. Bəyanatda Avropa Parlamentinin qətnaməsi əsassız sayılır. Avropa Parlamentinin Azərbaycanda nüfuzunu bərpa etmək üçün bundan sonra "düşünülmüş siyasət” yürüdəcəyinə ümid ifadə olunur.
|