Niderlandda fəaliyyət göstərən "Azərbaycanda Demokratiya Uğrunda” Komitə və Demokratik Azərbaycan Cəbhəsi təşkilatları martın 10-da Azərbaycanın Haaqa şəhərindəki səfirliyi önündə aksiya keçiriblər.
Aksiyada qeyd olunub ki, ölkədə demokratiya istəyən gənclər repressiya ilə üz-üzə qalıb, onlar oğurlanır, döyülür, təhqir edilir, şəxsiyyəti alçaldılır, digər qeyri-insani hərəkətlərə məruz qalır, zindanlara atılırlar.
Aksiyada Azərbaycanda repressiyalara son qoyulması, sərbəst toplaşmaq azadlığına təminat verilməsi, dinc aksiya iştirakçılarına zor tətbiq edənlərin məsuliyyətə cəlb olunması, həbsdəki gənc siyasi fəalların dərhal azadlığa buraxılması tələb edilib.
Aksiyada aşağıdakı məzmunda qətnamə qəbul edilib:
Azərbaycanda XXI əsrə yaraşmayan bir rejim hökm sürür. Ölkədə bütün hakimiyyəti bir əldə çəmləşdirən mütləqiyyət mövcüddür. Konstitusiya ilə seçkili hesab olunan parlamentdə seçkilərin nəticələrinin saxtalaşdırılması yolu ilə dövlət başçısının məsləhət bildiyi adamlar oturub. Məhkəmə hakimiyyəti icra hakimiyyətinin əlavəsinə çevirilib, onun göstərişlərini müticəsinə yerinə yetirir. Prezidentə tabe olan Nazirlər Kabinetinin mütləq əksəriyyəti vəzifələrində ikinci onilliyini qeyd etməkdədir. Onların hamısı eyni zamanda biznesmendir. Bəziləri beynəlxalq səviyyəli oliqarx statusundadır.
Azərbaycan xalqının 90 faizi həyatın zirzəmisində səfalət içində yaşayır. Əhalinin əksəriyyəti çörək pulu qazanmaqdan ötrü xaricə üz tutmağa məhkum edilib.
Ölkə hərbi-polis rejimi və bu rejimin elan olunmayan qanunları ilə idarə olunur. Korrupsiya, rüşvətxorluq, məmur özbaşnalığı vətəndaşların gündəlik həyat normasıdır. Beynəlxalq hüquq normaları ilə təminatı verilən əsas insan hüquq və azadlıqları, xüsusən birləşmək azadlığı, vicdan azadlığı, soz azadlığı təqib olunur.
Sabahkı günə inamını itirmiş xalq Şimali Afrikada başlanan demokratiyaya doğru dəyişiliklərə son ümid nöqtəsi kimi baxır. Bundan ruhlanan gənclər demokratiya tələbi ilə səslərini qaldırmaq istərkən dövlətin ağır represiyası ilə üzləşiblər, onlar oğurlanır, döyülür, təhqir edilir, şəxsiyyəti alçaldılır, digər qeyri-insani hərəkətlərə məruz qalır, zindanlara atılır.
Biz bütün bunlara qəti etirazımızı bildirməklə tələb edirik:
1. Azərbaycan Respublikasında represiyalara son qoyulsun; 2. Ölkədə sərbəst toplaşmaq azadlığına təminat verilsin; 3. Dinc aksiya iştirakçılarına zor tətbiq edənlər məsuliyyətə cəlb edilsin; 4. Gənc siyasi fəallar: Cabbar Savalanlı, Bəxtiyar Hacıyev, Dəyanət Babayev, Səxavət Soltanlı, Rəşadət Axundov, vicdan azadlığı ilə bağlı həbs olunanlar: Mövsüm Səmədov, Zülfüqar Mikayılzadə və digəriləri, jurnalist Eynulla Fətullayev, o cümlədən bütün siyasi məhbuslar dərhal azadlığa buraxılsın.
Azərbaycan xalqı qul deyil, onun da demokratik cəmiyyətdə yaşamağa haqqı var!
Tjeerd Bandringa Azərbaycanda Demokratiya uğrunda Komitə
Əli Hacılı Demokratik Azərbaycan Cəbhəsi
TALISH.ORG
|