Vəkil həbs edilən redaktorla görüşə buraxılmadı
ŞƏNBƏ, 23 İYUN 2012 10:38
Font Ölçüsü
Anar Qasımlı: “Polis bölməsində orderimi göstərsəm də, Hilal Məmmədovla görüşə imkan verilmədi"

“Bütün səylərimizə baxmayaraq, vəkili olduğum Hilal Məmmədovla mənə görüş üçün icazə verilməyib”, - vəkil Anar Qasımlı “Turan”a bildirib.
O qeyd edib ki, iyunun 21-də axşam saat 22.00 radələrində H.Məmmədovun saxlandığı Nizami rayonundakı 37 saylı polis bölməsinə gəlib. Vəkil olaraq orderini göstərsə də hüquqlarını müdafiə etdiyi şəxslə görüşə imkan verilməyib. Vəkil H.Məmmədovun saxlanmasına dair sənədləri tələb etsə də bu sənədlər vəkilə təqdim olunmayıb. A.Qasımlı polisin bu hərəkətini vəkilin və müdafiə etdiyi şəxsin hüquqlarının kobud şəkildə pozulması kimi dəyərləndirib. A.Qasımlı H.Məmmədovun iyunun 22-də səhər Nizami Rayon Polis Idarəsinə gətirildiyini deyib. Vəkil H.Məmmədovun saxlanılan zaman fiziki zorakılığa məruz qalması ilə bağlı ekspertizaya aparıldığını bildirib. A.Qasımlı H.Məmmədova qarşı Cinayət Məcəlləsinin 234-cü (külli miqdarda narkotika) maddəsilə cinayət işi başlandığını qeyd edib və bu gün məhkəmə qarşısına çıxarılaraq barəsində həbs qətimkan tədbirinin seçilə biləcəyini söyləyib.
A.Qasımlı ittihama əsasən H.Məmmədovun üzərindən 5 qram heroin tapıldığını, evindən də heroin tapıldığını amma miqdarının hələ müəyyn olunmadığını bildirib.
H.Məmmədov əslən talışdır, Bakıda yaşayır. Iki il öncə MTN-in təcridxanasında müəmmalı şəkildə vəfat edən edən “Tolişi sədo” qəzetinin redaktoru Novruzəli Məmmədovun hüquqlarını müdafiə komitəsinin sədri idi. N.Məmmədovun vəfatından sonra “Taolişi sədo” qəzetinin baş redaktorudur.

http://azadliq.info/index.p....mid=550