İyunun 5-də Bakı Ağır Cinayətlər Məhkəməsində hakim Azər Orucovun sədrliyi ilə "Tolışı sədo” qəzetinin baş redaktoru, hüquq müdafiəçisi Hilal Məmmədovun işi üzrə açıq məhkəmə prosesi davam etdirilib.
Qeyd edək ki, açıq məhkəmə prosesində H.Məmmədova qarşı Cinayət Məcəlləsinin 234.4.3-cü (böyük miqdarda narkotik maddənin qanunsuz saxlanması və satışı) maddəsi üzrə ittihama baxılırdı. H.Məmmədova qraşı irəli sürülən Cinayət Məcəlləsinin 274-cü (dövlətə xəyanət) və 283-cü (milli, irqi, sosial və ya dini nifrət və düşmənçiliyin salınması) maddələri üzrə işə isə qapalı məhkəmə prosesində baxılıb.
Prosesdə Hilal Məmmədov və onun hüquqlarını müdafiə edən vəkilləri Xalid Bağırov və Anar Qasımlı, eləcə də dövlət ittihamçısı iştirak edirdilər.
Proses başlayan kimi H. Məmmədovun vəsatət verərək daxili işlər naziri Ramil Usubov və baş prokuror Zakir Qaralovun şahid qismində məhkəməyə çağırılıb, dindirilməsini istəyib. Qısa sürən müşavirədən sonra hakim bu vəsatətin təmin edilmədiyini elan edib. Daha sonra H.Məmmədov dövlət ittihamçısının suallarını cavablandırıb. Dövlət ittihamçısı ona saxlanılan günü onun üzərində aşkar olunan narkotik vasitənin mənbəyini, bu barədə protokolda məlumatın qeyd edilib-edilməməsi, mənzilində axtarış aparılarkən, hal şahidinin orada olub-olmaması barədə suallar ünvanlayıb. Dövlət ittihamçısından sonra H. Məmmədov müdafiə vəkillərinin də suallarını cavablandırıb.
Proses sonra iş üzrə şahid olan Daxili İşlər Nazirliyinin Baş Narkotiklərlə Mübarizə İdarəsinin şöbə rəisi, polis polkovnik-leytenantı Ələkbər Xələfovun ifadə verməsi ilə davam edib. Ə.Xələfov H. Məmmədovun uzun müddət bu işlə məşğul olması barədə idarəyə məlumatın daxil olmasından sonra H.Məmmədovun yaşadığı Nizami rayon ərazisində saxlanılaraq, Baş Narkotiklə Mübarizə İdarəsinə gətirildiyini bildirib. Ə.Xələfov ifadəsində H. Məmmədovun üzərində narkotik aşkarladıqlarını və bundan sonra onun izahat verməkdən imtina etdiyini deyib. O həmçinin, H. Məmmədovun iddia etdiyi kimi idarədə ona fiziki xəsarət yetirilmədiyini bildirib.
Şahidin ifadəsindən sonra H.Məmmədovun vəkilləri ona suallar verməyə başlayıb. Lakin hakim A. Orucov vəkillərin şahidə verdikləri suallara müdaxilə edərək, cavablandırmasına imkan verməyib. Bu zaman məhkəmə prosesində gərginlik yaranıb. Əvvəlki məhkəmə proseslərində olduğu kimi bu dəfədə hakim səsinin tonunu qaldıraraq vəkillərin şahidi dindirməsinə şərait yaratmayıb. Bunun nəticəsində proses iştirakçıları məhkəməyə narazılıqlarını ifadə ediblər.
Hakim A. Orucov növbəti prosesi 13 iyun saat 14:00-a təyin etdiyini bildirib.
Xatırladaq ki, Hilal Məmmədov Cinayət Məcəlləsinin 234.4.3-cü (Qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama), 274-cü (dövlətə xəyanət) və 283-cü (milli, irqi, sosial və ya dini nifrət və düşmənçiliyin salınması) maddələri ilə ittiham edilir.
H.Məmmədov ona qarşı irəli sürülən ittihamları qəbul etmir, həbsini jurnalist və hüquq müdafiəçiliyi fəaliyyəti ilə bağlı olduğunu və siyasi sifarişlə həbs edildiyini bildirir.
Yerli və beynəlxalq hüquq-müdafiə təşkilatları H.Məmmədovu siyasi məhbus sayırlar.
