Lənkərandan Milli Məclisə deputat kimi təyin edilən, öz sözlərinə görə əslən Ərdəbil türklərindən olan və Talış zonasında yaşadığına görə özünü talış hesab edən, yəni məntiqlə Əliyev rejimi tərəfindən talış olmağı icazələndirilən Hadı Rəcəbli yeni təsis edilən, adında "talış" sözü olan təşkilatın - Azərbaycan Dövlətçiliyi Naminə Demokratik Talış Birliyinin yaradılmasına münasibət bildirib.
Sözü gedən təşkilatın ancaq adını eşidən, məqsəd, mahiyyət, vəzifə və funksiyalarından heç bir xəbəri olmayan Hadı yoldaş (O, 1991-ci ilə qədər bərk gedən yoldaşlardan biri idi) təşkilatın adındakı "talış" sözündən o ki var əndişələnib. Hadı bəy (O, 1992-1993-cü illərdə "bəy" olmuşdu) iddia edir ki, bir təşkilatda ki, "talış" sözü tələffüz edilir, o yaxşı ola bilməz. Hadı müəllim (1993-cü ildən bəri Hadı müəllim talışın hər vəclə assimilasiyasına çalışan və bu barədə hətta açıq tekstlə "talışlar asimilə olub qurtarmışlar" bəyanatını verənlərdən biridir) yanakı da olsa etiraf edir ki, "talış" sözü "separatçı" sözü ilə sinonimdir. Heç bir talış talış olaraq Azərbaycan vətəndaşı ola bilməz, belə talışın Azərbaycan dövlətçiliyi üçün çalışması qeyri-mümkündür. Əgər talış bərabərhüquqlu Azərbaycan vətəndaşı olmaq istəyirsə, o, assimilyasiya olunmasını boynuna almalıdır. Əgər hansısa talış Azərbaycan dövlətçiliyi keşiyində dayanmaq istəyirsə, və yaxud belə bir fikrə düşübsə, yalnız Hadı Rəcəbli kimi YAP-çı olmalıdır.
Rəcəbli müəllim qabaqdan gəlmişlik edir, özünü ağsaqqal kimi cəmiyyətə sirimaq istəyir və heç bir mənəvi haqqı olmadan bütün reqion adından danışır. Onun danışdıqlarını olduğu kimi oxucularımızın nəzərinə çatdırırıq:
"Belə bir təşkilatın yaradılması səhv, yanlış addımdır. Bunu edənlər düz mövqedə deyillər”. Azərbaycan Dövlətçiliyi Naminə Demokratik Talış Birliyinin yaradılmasına münasibət bildirən 74 saylı Lənkəran seçki dairəsindən deputat, Milli Məclisin sosial siyasət komitəsinin sədri Hadi Rəcəbli "Media forum” saytına açıqlamasında belə deyib.
Komitə sədri qeyd edib ki, vahid Azərbaycan xalqı var və ölkəni regionlara, şəhərlərə, kəndlərə, məhəllələrə bölmək doğru deyil: "Dünyada gedən proseslərə, mövcud olan problemlərə baxmaq lazımdır. Cibində Azərbaycan pasportu daşıyan, amma fəaliyyətində etnik amili əsas götürən, bu istiqamətdə çalışan hər kəs bütövlükdə dövlətçiliyə ziyan vurur. Bu gün Azərbaycanda bütün etnik qruplara hörmət, xoş münasibət var. Etnik qrupların hüquqları qorunur, onlara hər cür şərait yaradılıb, nümayəndələri hakimiyyətdə təmsil olunurlar, normal fəaliyyət göstərirlər. Ona görə də etnik amili özünə bayraq edən bir təşkilat heç nəyə nail ola bilməz. Əvvəla, bu o demək deyil ki, onlar xalqı təmsil edir, yaxud xalq onları dəstəkləyir. İkincisi, cənub bölgəsi tam olaraq Azərbaycana inteqrasiya olunub, millətlər, xalqlar bir-birinə qarışıb. Bütün bunlara görə deyirəm ki, həmin adamlar səhv yoldadırlar. Mən bunları pisləyirəm”.
Hadi Rəcəbli hesab edir ki, 1990-cı ilin əvvəllərində cənub bölgəsində baş qaldıran, Ələkrəm Hümbətovun rəhbərlik etdiyi separatçılığın talış camaatına heç bir aidiyyəti olmayıb: "Guya bunu talış camaatı yaratmışdı. Amma bunu edənlər separatçı qruplar, onlara dəstək verənlər idi. Bunların hamısı dövlətçiliyə ziyan vuran, Azərbaycançılıq əleyhinə olan addımlardır və məqsədli formada qızışdırılır. Hazırda dünyada konflikt yaratmaq üçün bir qayda olaraq milli azlıqlardan, dini və təriqət ayrılıqlarından istifadə edilir. Lənkəran və Astara bir bölgədədir. Biri deyir sünniyəm, digəri deyir şiəyəm. Bunlar hamısı gülünc və qarışıqlıq salmaq üçün istifadə edilən vasitələrdir”.
Ölkənin cənub bölgəsində tez-tez olduğunu, insanlarla görüşdüyünü bildirən Hadi Rəcəblinin sözlərinə görə, orada yaşayanların etnik ayrı-seçkiliyə məruz qalmaları haqda heç bir şikayətləri yoxdur: "Mən camaatın içindəyəm. İnsanlar hamısı razıdır. O bölgədə belə bir söz-söhbət yoxdur. Rayonlar, kəndlər tikilib qurulur. Bütün bölgələrdə gedən proseslər orada da var. Gəncədə, Beyləqanda, Sumqayıtda olan nöqsanlardan Lənkəranda, Lerikdə, Astarada da var. Ona görə də bunlar hamısı boş söhbətlərdir və kökündə Azərbaycanı istəməmək durur. Talışlara heç bir təzyiq yoxdur. Mən buna bariz nümunəyəm, Milli Məclisdə oturmuşam. O bölgədən başqa deputatlar da var. Mənim dediklərim ağsaqqal sözüdür, siyasətçi fikridir, bu məsələləri, problemləri bilən insanın mövqeyidir. Azərbaycanda separatçılıq etmək, ölkəni məhəllələrə bölmək mümkün deyil”.
Bu məsələdə xarici qüvvələrin əlinin olmasını istisna etməyən Hadi Rəcəbli qeyd edib ki, bəzi qüvvələr harada qarışıqlıq salmaq istəyirlərsə, etnik və dini amilləri qabardırlar: "Suriyanı sünni-şiə məsələsinə görə bir-birinə qırdırırlar. Bunlar Azərbaycanda sabitlik olmasını istəməyən, Azərbaycanın inkişafını gözü götürməyən adamların cəhdləri ola bilər. Bunlar da uğursuzluğa düçar olacaq. Çünki insanlar İrana gedib-gəlirlər və orada insanların necə yaşadığını, Azərbaycanda isə vəziyyətin necə olduğunu yaxşı bilirlər. Heç cənub bölgəsində təbliğata da ehtiyac yoxdur”.
|