Главная » 2013 » Март » 26 » Məryəm Məmmədova Bakı Ağır Cinayətlər Məhkəməsinə müraciət etdi
23:00
Məryəm Məmmədova Bakı Ağır Cinayətlər Məhkəməsinə müraciət etdi
Hilal Məmmədovun məhkəmə işini aparan Bakı Ağır Cinayətlər Məhkəməsinin hakimlərinə,
surəti Bakı Ağır Cinayətlər Məhkəməsinin sədri Mahmud Nəbiyevə
Müraciət
Mən 2009-cu ilin avqust ayında Azərbaycan Respublikası Ədliyyə Nazirliyinin penitensiar xidmətinin xəstəxanasında faciəli şəkildə dünyasını dəyişən mərhum alim-filoloq Novruzəli Məmmədovun həyat yoldaşıyam. Ümid edirəm ki, Azərbaycan cəmiyyəti Novruzəli Məmmədovun dəhşətli şəkildə öldürülməsi və ailəmin üzləşdiyi fəlakətlə az da olsa məlumatlıdır.
Təəssüf ki, Azərbaycanda səlahiyyətli dövlət orqanları məsuliyyət hissini itirib. Nəticə çıxarmaq, başıma gətirilən fəlakətlərə bir sonuc vermək yerinə hər gün vətəndaşlarımızın başına gətirilən yeni-yeni müsibətlərin şahidi oluruq. Bu kontekstdə "Tolışi Sədo” qəzetinin hazırkı redaktoru, hüquq müdafiəçisi, alim Hilal Məmmədovun Bakı Agir Cinayətlər üzrə məhkəməsində mühakiməsi prosesini Azərbaycan hakimiyyəti tərəfindən ailəmizə qarşı açılan cəbhənin davamı kimi qiymətləndirirəm. Belə olmasaydı mənim mərhum həyat yoldaşımın ruhu heç olmasa rahat buraxılar, dünyasını dəyişmiş bir insana atılan böhtan və iftiralar əsasında bu proses qurulmazdı.
Məhkəmə prosesində Elman Guliyev adli alcaq ve simasız bir məxluq kimlərinsə istəyi ilə qəsdən, özündən iftiralar uydurur, mərhum həyat yoldaşım Novruzəli Məmmədovun adını hallandırır. Elman Quliyev beş il əvvəl həyat yoldaşımın əleyhinə verdiyi ifadələri tutuquşu kimi bu gün Hilal Məmmədovun əleyhinə verir. Normal sivil cəmiyyətlərdə dünyada olmayan insana istinad etməklə verilən ifadələri subut kimi qəbul etmirlər. Əksinə E.Quliyevin özünün dediyi kimi "nifrət etdiyi adam”ı belə çirkin vasitələrlə cinayət törətməkdə ittiham etməsi cinayət əməli hesab edilir, yəni böhtançı iftiralarına görə məculiyyətə cəlb edilir. Elman Quliyev isə arxayındır. Həyat yoldaşımın prosesində müşahidə etdiyim kimi onun arxasında səlahiyyətli hakimiyyət orqanı durur və bundan irəli gələrək də o, öz cirkin əməlləri ilə fəxr edir.
Əgər E.Quliyev müstəqil psixatrik ekspertizaya təqdim edilsə, şübhə etmirəm ki, onun beyninin normal inkişafdan qalması və robotsayağı əlamətlərin daşıdığı nəticəsinə gəlinəcəkdir. Belə adamları başqaları idarə edir və onlardan müxtəlif məqsədlərə görə istifadə edirlər. İndi başa düşürəm ki, o, bizim ailəmizə məqsədli şəkildə göndərilmiş, aldığı yazıq görkəminə görə yoldaşım tərəfindən işə götürülmüşdür.
E.Quliyev bu gün səlahiyyətlilərlə bir tərəfdə dayanıb və onu idarə edənlər də onlardır. Onun dünyada olmayan insana istinad etməklə iftiralar uydurması isə nəinki hüquq, heç adi əxlaq normasına belə sığmır. Bu mənada mən bir daha bu gün E.Quliyevi idarə edənləri vicdana, haqqa çağırmaqla, onlara Allahdan qorxun deyirəm.
Hilal Məmmədov həyat yoldaşımın hüquqlarının müdafiəçisi olub və buna görə onun həbsini təsadüfi hesab etmirəm, ailəmin başına gətirilən dəhşətli faciəsinin davamı kimi qiymətləndirirəm.
İnanın ki, kimlərinsə özünə yaraşdırdığı belə oyunlar Azərbaycana başı ucalığı gətirmir, kimin hansı yuvanın quşu olduğu çoxdan hamıya məlumdur. Siz Novruzəli Məmmədovun başına gətirdiklərini bu gün əlinizdə əsir olan Hilal Məmmədova qarşı da görə bilərsiniz. Amma cəzanızın HAQQ qarşısında daha ağır olmasına da şübhə etməyin.
Mən qətiyyətlə Azərbaycan hökümətindən, Hilal Məmmədovun məhkəmə prosesində iştirak edən ittihamçılardan, prosesi aparan hakimlərdən tələb edirəm: Mərhum həyat yoldaşım Novruzəli Məmmədovun adının mənəviyyatdan, normal əxlaqdan uzaq olan, heç bir subuta söykənməyən oyunlarınızda hallandırmağı dayandırın. Heç olmasa onun ruhunu rahat buraxın!
Məryəm Məmmədova, siyasi mühacir, Nederland Krallığı