Bu gün, 16 mart 2014-cü il tarixində Bakı şəhərində Azərbaycan Respublika Talış Mədəniyyət Mərkəzinin Bakı şöbəsinin növbəti hesabat-seçki kofransı keçirilmişdir. Konfransda 28 nəfər nümayəndə və 3 nəfər qonaq qismində iştirak edirdi.
Konfrans işini heç bir günahı sübuta yetirilmədən həbs olunaraq, həbsxanada şəhid olmuş professor Novruzəli Məmmədovun ruhuna dualar oxunub, onu yad etməklə başladı və gündəliyə aşağıdakı məsələlər salındı:
2012 – 2014-cü illər ərzində RTMM-nin Bakı şöbəsinin fəaliyyəti barəsində müzakirələr dinlənilmişdir. Bu barədə Mərkəzin Bakı şöbəsinin sədri Mehdibəy Səfərov məruzə etmişdir. O, bu iki il müddətində həm Bakı şöbəsinin, həm də ümumilikdə RTMM-nin fəaliyyətini qeyri-qənaətbəxş hesab etmişdir: - "Uzun illərdir ki, RTMM-nin fəaliyyəti demək olar ki, iflic vəziyyətinə düşmüşdür! Bunun bir səbəbi RTMM-nin sədri, professor Novruzəli Məmmədovun günahsız həbs olunaraq, zindanda şəhid olması, eləcə də Azərbaycan dövlətinin azsaylı xalqların dil və mədəniyyətlərinə sayğısızlığdırsa, digər səbəi isə, özümüzün öz milli-mental və mənəvi dəyərlər sistemimizə diqqətsizliyimiz, biganə münasibətlərimizdən qaynaqlanır”-deyərək, fəaliyyətini tənqid etmişdir. Ağsaqqal alim Hacı Cahangir Suvarov söz alaraq, RTMM-nin Bakı şöbəsinin Azəri – Talış İctimai Birliyi ilə birgə keçirtdiyi rəngarəng tədbirlərdən söhbət açmışdır. Tarixçi-müəllim Ulduz Həşimov həm Bakı şöbəsinin, həm də RTMM-nin ümumi fəaliyyətindən narazı olduğunu bildirmişdir.
Konfransda Təşkilati məsələyə də baxmışdır. Mehdibəy Səfərov digər ictimai işlərinin çoxluğundan konfrans iştirakçılarından onun təkrar RTMM-nin Bakı şöbəsinin sədrliyinə namizədliyini irəli sürməməyi xahiş etmişdir. Bunu nəzərə alaraq, Mərkəzin Bakı şöbəsinə 4 nəfərin – Seyran Rəfiyevin, Ulduz Haşımovun, Mirfəyaz Likməkaninin və Ceyhun Heydərin namizədliyi irəli sürülmüşdür. Hər üç namizəd Ulduz Həşimovun xeyrinə öz namizədliklərini geri götürmüşlər. Açıq səsvermə yolu ilə tarixçi-müəllim Ulduz Haşımov RTMM-nin Bakı şöbəsinin sədri, Mirfəyaz Likməkani və Azər Xəlili isə onun müavinləri seçilmişdir.
Gündəliyə salınan üçüncü məsələ RTMM-nin növbədənkənar ümumrespublika konfransının çağırılması və həmin konfransın işini təşkil etmək məqsədi ilə Təşkilat Komitəsinin yaradılması oldu. Bu barədə geniş nitq ilə Talış xalqının mənəvi dühası, ağsaqqalı, şair Əli Nasir danışdı. O, RTMM-nin fəaliyyətinin bu sayaq iflic vəziyyətə düşməyinin əsil səbəbləri barəsində konfrans iştirakçılarına müfəssəl məlumatlar verdi. Şair Əli Nasir talışların da Azərbaycana ləyaqətli vətəndaş olmalarından, dövlətçiliyimizə və ərazizi bütövlüyümüzə sədaqətlə xidmət etmələrindən söhbət açdı. O bildirdi ki, Azərbaycan Dövlətinin borcudur ki, Talış xalqının da dil və mədəniyyətinin inkişafına həm mənəvi, həm də maddi köməkliklər göstərsin! Axı, Azərbaycan dövləti həm də talışlara məxsusdur! Sonra isə, Seyran Dadaşov (sədr), Əli Nasir, Mehdibəy Səfərov, Ulduz Haşımov, Seyran Rəfiyev və Mirfəyaz Likməkani daxil olmaqla 6 nəfərdən ibarət RTMM-nin ümumrespublika konfransının Təşkilat Komitəsinə üzv seçildilər! RTMM-nin ümumrespublika konfransının aprel ayının son həftəsində keçirilməyi məsləhət bilindi. Konfrans iştirakçıları TK-nə tövsiyə etdilər ki, RTMM-nin Astara, Lənkəran, Lerik, Masallı, Sumqayıt şöbələri məlumatlandırılsınlar ki, aprel ayının 20-nə kimi yerli şöbələrin hesabat-seçki konfranslarını keçirdib, ümumrespublika konfransına nümayəndələr seçsinlər.
Konfransda təklif olunan cari məsələr – RTMM-nin yenidən qeydiyyatdan keçirilməsi və itirilmiş sənədlərin bərpa olunması barəsində Mərkəzin hüquqşünası Seyran Rəfiyev məlumat verdi. O qeyd etdi ki, hazırda RTMM-nin heç bir rəsmi sənədi yoxdur. Belə ki, rəhmətlik professor Novruzəli Məmmədov həbs və RTMM-nin əmlakı konfisikasiya olunanda Mərkəzin bütün sənədləri it-bat olmuşdur. Artıq 6 aya yaxındır ki, biz bununla mütəmadi məşğul olsaq da, hələ də heç bir irəliləyişə nail ola bilməmişik. AR Ədliyə Nazirliyi isə, bizi get-gələ salmaqla məşğuldur. S. Dadaşov qeyd etdi ki, biz RTMM-nin bütün strukturlarını yenidən qanuna uyğun, rəsmi protokollar əsasında qurub, yenidən ƏN-nə müraciət etsək, onda hər hansı nailiyyət əldə edə bilərik. Əks halda heç bir şeyə nail ola bilmərik.
Bununla da, RTMM-nin Bakı şöbəsi konfransın işini yekunlaşdırdı.
Ulduz Haşımov
RTMM-nin Bakı şöbəsinin sədri