 "Hesab edirik ki, bu, xalqımıza və dövlətçiliyimizə qarşı yönəlmiş təxribatdır”
Qafqaz Müsəlmanları İdarəsi Azərbaycan İslam Partiyasının sədrinin həbsi ilə bağlı bəyanat yayıb. "Qafqazinfo”nun məlumatına görə, QMİ-nin mətbuat xidmətinin yaydığı məlumatda bildirilir ki, son günlər yerli KİV-də yayımlanan və dindarların etirazına səbəb olan qeyri-leqal Azərbaycan İslam Partiyasının sədri Mövsüm Səmədovun məsuliyyətsiz çağırışları xalqımıza və dövlətçiliyimizə qarşı yönəlmiş təxribatdır və bunun məqsədi milli birliyimizi sarsıtmaq, sabitliyimizə xələl gətirmək, cəmiyyət daxilində qarşıdurma yaratmaqdır.
Bəyanatda deyilib ki, din-dövlət münasibətlərində yüksək səviyyənin təmini, milli-mənəvi dəyərlərə və tarixi-dini abidələrə dövlət qayğısı istər ulu öndər Heydər Əliyevin, istərsə də İlham Əliyevin prezidentlik dövrlərini səciyyələndirən cəhətlərdəndir: "Vətəndaş həmrəyliyinə xələl gətirmək niyyətində olanlar unutmamalıdırlar ki, demokratiya və vicdan azadlığı insan hüquqlarının qorunmasına xidmət edir və cəmiyyətdə zərərli meyillərə, parçalanma və qarşıdurma cəhdlərinə qətiyyən haqq qazandırmır", - bəyanatda vurğulanır.
Bəyanatda deyilir ki, dindarlar bütün mənalı ömrünü Azərbaycanın inkişafına həsr etmiş ulu öndərin, dövləti ən ali məqamlarda təmsil edən Prezident İlham Əliyevin xalqımız və dövlətimiz qarşısında xidmətlərini inkar edən çağırışları heç bir vəchlə qəbul etmir və buna öz qəti etirazını bildirir: "Hesab edirik ki, bu, xalqımıza və dövlətçiliyimizə qarşı yönəlmiş təxribatdır və bunda məqsəd milli birliyimizi sarsıtmaq, sabitliyimizə xələl gətirmək, cəmiyyət daxilində qarşıdurma yaratmaqdır. Bu, olduqca təhlükəli təzahürdür və biz çox təəssüf edirik ki, bu hal İslam adından sui-istifadə edən üzdəniraq təəssübkeşlər tərəfindən məqsədli şəkildə yaradılır. Başörtüyü məsələsinin gündəmə gətirilməsi belələri üçün bir bəhanədir. Dindarlarımız nəzərə almalıdırlar ki, başörtüyünə dövlət tərəfindən qadağa qoyulmayıb. Dini mərkəz olaraq Qafqaz Müsəlmanları İdarəsi başörtüyü ilə bağlı öz mövqeyini birmənalı şəkildə bildirib. İslamın müqəddəs dəyərlərini uca tutan şəxs heç bir zaman böhtan, iftira, təfriqə, təhqir kimi günahlara və zorakılığa çağırışa yol verməz. Dövlət başçısının ünvanına olmazın hədyanlar danışmaq, görülən böyük işləri, o cümlədən dinimizə ehtiram və qayğını nankorcasına danmaq İslami əxlaqımıza, milli dəyərlərimizə hörmətsizlikdir", - bəyanatda deyilir.
Müsəlman dindarlar dövlət mənafelərimizə, milli maraqlarımıza zidd olan bütün təhlükələrin qarşısının alınmasını olduqca vacib hesab edir, xalqımızı fitnələrə uymamağa, hər vəchlə vətəndaş həmrəyliyini qoruyub saxlamağa çağırır: "Bir daha bəyan edirik ki, Azərbaycan dindarları, inşallah, heç bir zaman fitnələrə uymayacaq və öz dövlətçiliyinin qorunması yolunda bütün maneələri dəf edəcəklər”.
qafqazinfo
|
