 Şirəliyev Maqsud Məsti zoə moəo bıə 05.12.1972- nə sori Masalli rayoni Xanalion diyədə. Tam miyonə təhsil səşe Sığdaşti məktəbədə.
Maqsud həm Masalli, həm Lankoni xalq teatr kollektivon navdəbışıə uzvonədə qıləye. Çəy ifadə bə kino kəşə bıə Tolışi Şəbani obraz bənome.
2005- 2007-nə soronədə de Xanəli, Nicati ssenari, rejissorəti silsilə bə tolışi kəşə bıə tolışə kino serialonədə Şirəli Maqsud Məsti şirkət kardəşe bənə kinoaktyori. "Dıvo”, "Tolış, bıvot, bısır dəmə” (1-3) filmon bə dınyo pevılo bıən.
Maqsud Məsti zoə ıştənən kino kəşəşe bə tolışi: "Cıni həmlə”, ssenari, rejissorəti, operatorəti həmmə çəye. Maqsud təbiəti aşığe. Xanalionədə "Xanahi” nomədə qıləy seyrənqo (rohətə mərənqo) soxtəşe, aləm bəçəy təmşo mandə.
Maqsud həmən istedadinə şaire. Hestışe bə tırki- bə tolışi nıvıştə xəyli əsəron.
Allahverdi BAYRAMİ
RƏHMƏT BIBU
Qıləy boğçə- boğım kaşdə, Çəy ətrofo vişəm haşdə. İmruj hestim, nıbum maştə, Bıdə bomı rəhmət bıbu.
İyo heste ambu, tıtım, Çımı yolon kardə qətım. Bıçın bəhə, bıdə bətım Imən qıləy hurmət bıbu.
İyo çandə odəm omə, Haco kəşdən çovrə nomə. Orzim bənə ovrə bəmə, Qıləy yolə şohrət bıbu.
Donzə soron lum ekardə, Kıl-kımot bə vəyşt oqardə. Çı dınyoku ki çiç bardə? Saqlə dəvə, sərvət bıbu.
Çe toniku ru davardə, De ATV iyo vardə. Bəyji bəbe i ruj mardə, Çe Xıdoku ğodrət bıbu.
Diə kardedəm az bə boğe, Tov hardəme bə vey doğe. Çandə çımı ın con səğe, Əpinime ğeybət bıbu.
Tolışi di xosə Mədo, Bahandoş "Toloşon sədo” Çiçı bıpio Xıdo bədo, De nomoji sohbət bıbu. 15.05.2012
HƏYO BIKƏ
Votdən dınyo volo bəbe, Həşi umur məqər səbe? Mardəbəpeşt tanqə ğəbe, Həyo bıkə çı Xıdoku.
Beyət məkə bə Fironi, Diyə bıkə bə Ğıroni. Həxi bəpeşt heco ro ni. Həyo bıkə çı Xıdoku.
Ki çanədə ordə səşe, Quşəy zevıl, dıqlə məşe. Im çı hole, çı hay dəşe, Həyo bıkə çı Xıdoku.
Əqəm bəbe məhol toyki, Boçi səydəş don bo suki? Çoknə bahaş "şoki-moki”? Həyo bıkə çı Xıdoku.
Çandə heste sır çı Xıdo, Beməkə ha ımi yodo. Xıdo bətı insof bıdo, Həyo bıkə çı Xıdoku.
Kəynə bıbo oxorzəmon, Ko ədəni qıləy dəmon. Bəpio əqəm bəyku əmon, Həyo bıkə çı Xıdoku.
Jimonımon bə çı Xosi, Pəno məbə tı bə "TOSİ” Dıl kardedə tosi-vosi, Həyo bıkə çı Xıdoku.
15.12.2013. |
