 Və ya YAP (Yalançı Azərbaycan Partriyası) xalqa müharibə elan edibmi?
Artıq illər keçir, insanlar dəyişir, fikirlər donur, laqeydlər çoxalır... əcaib hala salınmaqda olan cəmiyyətimizi, qarnından uzağı görməməyə sövq edən hakim YAP 17 ildir ki, fərqinə varmadan millətindən, irqindən, cinsindən asılı olmayaraq, olmazın işgəncə, şantaz, təhdid, təhqir, aclıq, səfalət, hicrət və vətəndaşların bütün hüquqlarından məhrum edilməklə Azərbaycanı Misir, Liviya və yaxşı halda Bəhreyn olaylarına bənzər bir inqilaba təhrik etməkdədir.
Bir qədər də konkret ifadə azadlığına əsaslanaraq deyə bilərəm ki, hər kəsin gözü önündə olan, iqtidarın tərif və tərənnüm etdiyi Azərbaycandakı insan haqları və ifadə azadlığına diqqət etsək, görürük ki, mərhum jurnalist Elmar Hüseynov və Novruzəli Məmmədov kimi insanlar hakimiyyət tərəfindən qətlə yetirilir, azad sözə görə jurnalist Eynulla Fətullayev məhbəsdə çürüdülür.
"Ziyalı” təbəqəsinin susması bəlkə də başa düşüləndir. "Ziya”mız danışdı axı, xüsusi amansızlıqla susduruldu, xalqın ziyası söndürüldü...
Naməlum səbəblərdən general Rail hakimiyyətin gülləsinə tuş gəldi...
Daxili İşlər Nazirliyinin sabiq idarə rəisi Hacı Məmmədov Qarabulaqda bir qəbiristanlıq düzənlədi...
DİN təmsilçiləri isə ölkədə vətəndaşlıq hüquqlarından ağızdolusu bəyanətlər verirlər. Düşünürəm ki, hakimiyyət hər dəfə qətllər törətməklə xalqı inqilaba təhrik edir ki, səsini qaldıranları kütləvi qırğına məruz qoysun, lap elə M. Qəddafi kimi. Qoy daha bir iyirmi il özünün telekanallarına ("Lider”dəki "Sitatın sonu” verilişinin aparıcısı Etibar Hüseynov kimilərə) mövzu verərək gecə-gündüz xalqa sabitlik dərsi keçsinlər. Hakimiyyət təmsilçiləri məst-xumar olaraq camaatı "yumurta” kimi soymağında davam etsinlər, yalnız yumurtanın qiymətini 2 qəpik endirməklə öyünsünlər.
Bu nə deməkdir?
On yeddi ildir ki, Azərbaycanın təhsili, səhiyyəsi, hüququ, kənd təsərrüfatı, mədəniyyəti, incəsənəti məhv edilir. Rüşvət və korrupsiya o həddə "çiçəklənib” ki, günümüzün tələbinə çevrilib. Bu o deməkdir ki, ey xalq, etiraz edib mitinqlərə çıxıb söz desən, mənim hərbi sənaye kompleksim də var, başını əzərəm!
Nə çoxdur, Nizami Cəfərov kimi professor deputatlarımız, Az TV-yə çıxıb deyəcəklər ki, "ağılları olaydı, başlarına dubinka, yaxiud güllə vurdurmayaydılar.”
Düşünürəm ki, hakimiyyət xalqı öz qanunsuz və insanlığa yad olan əməlləri ilə bezdirir, dağıdıcı üsyana çəkir.
Atalardan belə bir söz qalıb ki, "aciz adam kəmfürsət olar”! Baxın bu hakimiyyət nə dərəcədə zəifdir ki, savadlı intelekti ilə seçilən, növrəstə bir gəncin- Bəxtiyar Hacıyevin qabağına ordu çıxarır. Kimlərinsə qınağına tuş gəlməmək üçün onun həbsinə qərar verir.
Deyirəm, vallah, bu hakimiyyət "dibil” olub gedir. Düşüncəli, cəsarətli bir iqtidar nümayəndəsi adını xalq şairi, ziyalı hesab edən yoxdurmu ki, desin: "Ay qardaşlar, bu Bəxtiyarı, tutaq ki, göndərdik orduya, bir il döşəmə yudu, kartof soydu, lap çətin halda səngərdə xidmət etdi, siz ağaların qazancı nə olacaq?
Mən deyərdim ki, o, zəkası ilə Azərbaycana daha çox fayda verə bilər. Əgər doğrudan da, ordumuzda xidmət keçmək üçün çağırışçı problemi varsa, hərbi komissarlıqlar "komissavatetmə” əməliyyatına son qoysunlar. Yaxud ərazi nümayəndələrinin qanunsuz olaraq ordudan yayındırdıqları yüzlərlə çağırışçılardan yararlansalar, Bəxtiyar kimi elmli gənclərə xalq öz qəlbində yer ayıracaq.
Bir qədər də "atəşkəs” deyilən, "rusun bişirdiyi kaşadan” söz aşmaq yerinə düşər. Qarabağla ilgili hər kəsə bəlli olanları qələmə alsaq, bu "Atət-Matət” Minsk qrupu-filan boş-boş nağıllardır. Atəşkəs fonunda YAP hakimiyyət mənsublarının özlərinin "telekanalizasiyalarında” qürurla nümayiş etdirdikləri "Müdafiə kompleksi”, ordudan, müharibədən ağız dolusu danışılması heç də erməni daşnaklarına qarşı, torpaqlarımızın azad edilməsinə qarşı yönəlik deyil.
Bütün güc strukturları rüşvətə, korrupsiyaya və digər cinayətlərə elə bulaşdırılmışlar ki, onlar yalnız öz xalqıını əzmək təlimatını icra etmək iqtidarındadırlar.
Xalqımız sivil yollar arayıb Azərbaycandakı aboragen xalqların həmrəyliyi ilə yollar arayıb mübarizə aparmalıdır, təkcə türkçülük azarına tutulanların əllərindən bir şey gəlməz!
Heç bir provakasiyaya getməməliyik. Hamı dərk etməlidir ki, YAP hakimiyyəti xalqı dağıdıcı inqilaba təhrik edir!...
Mətləb DADAŞİ,
Azərbaycan Jurnalistlər Birliyinin üzvü,
Xüsusi olaraq TALISH.ORG üçün
|
