Müttəhimlər kürsüsündə İslam Partiyasının Astara rayon təşkilatının sədri Ruhulla Axundzadədir
Dövlət ittihamçısı: Sizin çıxışlarınızda "Talışlara qarşı zülm olunur", "talışlar repressiya olunur" ifadələri olubmu?
Ruhulla Axundzadə: Mən ancaq haqqı müdafiə etmişəm
"1937-ci il repressiyasında Azərbaycanın qeyrətli oğulları Mikayıl Müşfiq, Ruhulla Axundov repressiyaya məruz qaldılar. Bunlardan əlavə adını bildiyimiz və bilmədiyimiz minlərlə ruhani Nargin adasında güllələndi. Lakin üstündən illər keçməsinə baxmayaraq, tarix onları qiymətləndirdi. O zaman Azərbaycanın bu qiymətli oğullarının həlak olmasında yuxarıda oturan ermənilərin barmağı var idi. Bəs indi nə olub?" - Bu sözləri 19 avgustda Ağır Cinayətlərə Dair İşlər Üzrə Məhkəmədə keçirilən prossesdə İslam Partiyasının Astara rayon təşkilatının sədri Ruhulla Axundzadə deyib.
Astarada baş verən özbaşınalıqdan danışan Ruhulla Axundzadə, qanunsuzluqlarla daim mübarizədə olduğundan da söhbət açmışdır: «Rayonumuzda təhsil, xəstəxana, hüquq orqanları hamısı korrupsiyaya uğrayıb."
Hakim Eldar İsmayılovun "İttihamın mahiyyəti üzrə danışın" xəbərdarlığına cavabda Ruhulla Axundzadə demişdir: "Elə bu mübarizə apardığım şəxslər məni şərləyiblər. Başa düşmürəm, korrupsiyaya yox deyən, məni necə ittiham edə bilərlər. Artıq 15 ildir ki, onlar məni susdurmaq, ya da ölkədən çıxartmağa çalışıblar. Heç bir kanal mənim fikirlərimi vermədiyindən, «Səhər» kanalına müsahibə vermişəm. Mənim üçün sərhəd yoxdur. Mən müstəqil adamam və hər yerdə də fikirlərimi deyəcəyəm. Qeyd edim ki, DİN dəfələrlə mənə əməkdaşlıq təklif eləmişdi. Mən də demişəm ki, elə belə rüşvətxorluğu deməklə, sizinlə əməkdaşlıq edirəm də. İndi həmin adamlar heç öz işlərini belə düz görmürlər. Mənimlə qonşunun həyətini səhv salıb, silahları ora atırlar. Silah çıxanda dedim ki, həyət mənim deyil, şofer Şamil Sultanova məxsusdur. Onlar da bir-birlərinə baxdılar."
Ruhulla Axundzadə əlavə edib: "Mən inqilabçı, mərd, qorxmaz, dövlətini, Vətənini, xalqını çox sevən bir insan kimi hərəkatın ilk günlərində fəaliyyət göstərmiş bir insanam. Cavanlıqda mənim silahım ancaq kəllə, yumruq və məntiq olub. Ümumiyyətlə, biz müsəlmanların yeganə ən böyük silahı duadır. İndi məni etnik təfriqəçilikdə günahlandırırlar. Soruşan lazımdır, axı mənim anam türk, atam talış, həyat yoldaşım da şafeidir. Mən necə təfriqəçi ola bilərəm."
Dövlət ittihamçısının "Sizin çıxışlarınızda belə ifadələr olubmu: «Talışlara qarşı zülm olunur», «talışlar repressiya olunur»?" sualının cavabında da Ruhulla Axundzadə vurğulamışdır: "Yenə deyirəm, anam türkdü, atam talış. Ancaq Novruzəli Məmmədov öləndə bəlkə bir az hissiyata qapılmışam. Mənim əsas söhbətlərim rayonda olan qanunsuzluqlarla bağlıdır. Astarada əkin sahələri əkilmir. Kanallar yoxdur. Olanları da 15 ildir təmizlənmədiyindən pis vəziyyətdədir. İbrahim Quliyev kimilər camaatımızı soyub. Camaat yaşayışlarını təmin eləmək üçün boyun-boğazlarındakı qızılları satıb. Mən bu barədə danışmışam. Yenə deyirəm, haqsızlıq bütün respublika üçün olub, ləzgisi üçün də, talışı üçün də, türkü üçün də. Məzlum yenə xalqdır."
Dövlət ittihamçısının "Deyirsiniz ki, çıxışlarınızda millətini, xalqını sevən bir insan kimi dərdinizi deyirsiniz. Bəs başqa ölkənin telekanalına danışmaq heç vətənpərvərlikdirmi?" sualını isə məntiqsiz sayan Ruhulla Axundzadə demişdir : "Heç gör məntiqi sualdı? Heç bir kanal mənə şərait yaratmır. Niyə qoyursan «Səhər» kanalına müraciət eləyim. Şərait yarat, ora müraciət etməyim də. Öz kanallarımıza o qədər müraciət etmişəm ki. Heç biri yaxın qoymur. Mən ancaq haqqı müdafiə etmişəm. Mən Astara xalqının ştatdankənar deputatıyam." Beləiklə hörmətli oxucularımız, mürtəce rejimin məhkəmə hakiminin suallarından gördüyünüz kimi, Azərbaycan məhkəməsi zorla xalqın səsini boğmaq üçün milli məsələni ortaya qatmaq istəyir və bununla işarə edir ki, talişlarin öz talelərini bir xalq kimi, bir millet kimi tələb etməyə haqqi yoxdur. Elə bil talişlar Azərbaycanda vətəndaş yox, hüquqsuz köledirler, lap quldarlıq dövründəki kimi...
TALISH.ORG
|