Şək ni ki ha ğeyrətmandə tolış bı sovoli cəvobədə bəvote ki, - "bəs boçiən nıbo oxo, məğəm lap ha ruj dərc bə kali co zıvoninə mətbuatonko ocizimon?!”.
Əmənən bı fikədəmon... Düzi, "Tolışi Sədo” qəzeti redaksiyədə ənnə materialon qırdə bən ki, lap ha rujən ım qəzeti nəşr karde bəbe, əmma... Əmma, ım "əmma” bə maliyyə problemi anqıl beən sırr ni. Imən boşməno həni oşkoye ki, bə çəmə qəzeti nə hükumət qıləy dəstək bədo, nəən çəmə kali ərbobə tolışon bımi hınə bəkan... Xıdo nıkə, şayəd, kənokoən (co məmləkətonko) 1 kopiq pül boy, həni ə kali milli təxribatə hazırlığə komtonədə da tominə istintaqə kon okarde bəznen ki, bəs, "ımon çı filon olkə casusin”...
Co tərəfo, əğəm konkret kionsə (məsələn, lap ısətnəki iqtidori hukumət ya gıləy ərbob) çəmə maliyyə problemon bəştə qiy peğətı, əmənən rə-di məcbur bəmendemon ki de çəvon "zəkəzinə həvo” raxs bıkəmon...
Ha, mandə iqləm, ən həlolə, bə Xıdoən ən xoşə omə ro – deştə kollektivə zəhməti zü ım qəzeti bekarde...Əve, əğəm ha ğeyrətmandə tolış bə Xıdo roədə nəzədə qətə ıştə nəziri i poə bə "Tolışi Sədo” beşe sərf bıkə, bəvədə əvi lap bə "harujnə qəzet”i peqordıne bəznemon, inşalla! Həmməən ico bə qəzeti sohib bebəşemon. İco şoy-voyəti, ico dardi-dıl bəkamon...
Çı zolımə işğalçion həxsız siyasəti nəticədə bə Azərbaycan-İroni maftilon dırozi dı poə paybaxş bə xəlği milli mədənyəti,tarıxi,zıvoni, adət-ənənon iən çəmə cənnəti-məkani problemon ico omutəmon, ico noğo və təbliğ bəkamon. Bə Urisyət, Avropa, Amerikə və i.a. ğəribə məmləkəton hicrət kardə tolışon dard-səronən ıco mızakirə bəkamon... Həni fik əkənimon ki çəmə nıvşıtəyon bə kiysə, bə kom davləti rejimi sohibonsə xoş bome ya ne, "Tolışi Sədo” deştə OZODƏTİ iən XOŞBƏXTƏTİ bə ve-veylə mətbuatonən nımonə bəbe, inşalla! Rəhməttiğ M.Ə.Rəsulzadə vıtəynə, "ə millət, ə məmləkət ozode ki, əçey mətbuatışən ozod və xoşbəxte!”.
Əlbəttə, şək ni ki çı "Tolışi Sədo” mütəmadi nəşriko və əçey bəpeədə qeyd bə məzmuninə cürəbəcürə marağinə nıvıştəyonko peş, ijən kali pıxə-bədxohə komiton ya insonon bəçəmə unvoni saqləm şər-behtonon bəğanden, əməni ijən niməroədə oğate cəhd bəkan, əmma, əmə deşmə zü ico HƏXə royko ğət bə dumo onibəqardemon inşalla! Xıdo roədə bardəbə ha koədəən ƏV ıştən bəmə peşt bəbe, inşalla!
Ğəzeti mıxtəlif ləhcən (dialekton) be həxədəən ve norohət be lozim ni, hələm ki sıvoy (ğərəz) texniki islahon, bə ənvışton nıvıştəyon dast əjənimon. Peştepuremon ki i ruj ıştə umumi ədəbi zıvoni ofəyə kardeko peş, ın problemən avtomatik formədə miynəko bebəşe. Bımiyo xəyli vaxt, səbr, deyəndı bə kompromis şe və i.a. nyuanson tələb bedən... Şəxsən az, bənə redaktori, boştə nıvıştəyono əsos ləhcə ıştə moədi - Ostoro rəyoni Tanqəru ləhcə ne, Lankoni dialekti əsas peğətdəm. Vaxtinə rəhməttığ Zülfüqar Əhmədzadəən ıştə nıvıştəyonədə Pensə (Tanqəru hamsuə) di ne, Lankoni ləhcə əsas peğətəşbe. Kakalos diko bə rəhməttığ Əhəd Muxtarən jəqo..Əlbəttə, sıxan ni ki, əvon ıştə nıvıştəyonədə Ostoroədə oko doəbə kali sıxanonən (məsələn, hırdən (əğil), tıle (vite), üyə (moğnə), bi (bib), külok (voş) və i.a.) və "ü” hərfiən paralel formədə istifodə kardəşone...
Əve ki, ey çəmə əzizə handəkəson, oyoən hiç norohət be lozim ni, qəzet – çəmə həmməyon şinə-şəkə ləhcon həm noğo və həmən mütəmadi şiklədə analiz bəka. İnşalla, i ruj ıştə umumi ədəbi zıvoni forməən ico qəbul bəkamon! Bə Xıdo dıvo bıkəmon ki, ım nezonədə "Tolışi Ənvışton İəti” təşkilati ofəyə bıkəmon və bıdə ım təşkilati iminə vəzifəən ım problemi muzakirə karde bıbo!
Xıdo bı mıbarəkə roədə bəşmə həmməyon komək bıbo!
Hilal Məmmədov, "Tolışi Sədo" qəzeti yolə redaktor
|