Omə sori Yezid
Lankonədə bineyi-ğədimiku ha sor Aşura mərasim vey xışmin davardedə. Çı mərasimi navi ateistə soveti hukumətən səy nəzni. Hətto çə zəmonə milisonən, partiya yolonən bı mərasimi pəl nəjənin, çumçiko çəvonən dılədə qıləy İmam Hüseyni məhəbbət, bə xəlği etiqadi hurmət hestbe. Əlğərəz, qıləy Aşurada Kərbəlo mısibəti bə səhnə noydən. Çənnə ehandedən hiç xonəxo çı Yezidi mutrufəti karde pidəşni. Oxoədə bə puli hisob Lankonədə jiyə qıləy orıs-Kolya bı mutrufəti rozi bedə. Aşura şəvi canqə, daveyə səhnon nümayiş bedən, Bə İmam Hüseyni nom mərsiyon vote bedən, sinə jəydən. In zəmon "Yezid", yəne orıs Kolya, sıyə xələtədə, aspi peştədə bə məydon vardə bedə. İnsonon ha səmto bəy nıfin iyən tu kardedən. Bə tanə-töhməti, bə həxtu diyə nıkardə Kolya, ıştə "Yezid"ə mutrifəti dəvomədə de aspi məydonədə qərdiş kardedə. İmomi iyən əçəy səhəbon şəhadəti səhnəku bə peşt bə "Yezid”i ğəddorati etirozon ve bedən, camaat cum kardedə "Yezid"i səpe. Bə Kolyə ənnə mışt, ləğə jəydən ki, əv sı xuni dılədə bedə, əy çı aspo eğandedən, zəminədəən de ləğə bəy rəsedən. Kolya vindedə ki, jıqo bışo camaat əy bəkışte, dezzü zikkə jəydə: "Ay camaat, mıni boçi kıştedəşon? Omə sori bəşmə Yezid lozim əbıni?
Çoli biyə baste
Lankonədə i xonəxo ıştə soədə ovə çol kandedə. Bı vaxti hamsuyə omedə, xəyli xəy-dıvo doydə, peşo bə şəkə votedə ki, çol hozı be, bəçəy dılə 2-3 qılə vəzəx şodə. Kəsoyb bə hamsiyə "boçi?” parsi doydə, əv ijənən bə şəkə votedə: "Vəzəxon ovi hejo sardon obəqəten”
Maştənəy hamsiyə vindedə ki, çol kandə merd dastonədə vedrə mandə çoli sədə. Nez bedə, parsedə:
- Yo boçi mandəş?
Merd de zəndi bəştə hamsuyə diyə kardedə, votedə:
- Zinə bəmı nıvote bə çol 2-3 qılə vəzəx şodə, bıdə çoli ov sardon bındıno? Azən bənə məvindəki 10 qılə vəzəxım şodoy, çoli ov biyə bastəşe.
Viyənədə səbəkılo onibəqəte
1986-minə sor, Soveti şımşi tijə vaxtonin. Viyəniku se xonəxo şedən bə Quba, i QAZ-53 maşini porti puri sıə sef vardedən bə Lankon ki, Nəvuzə idəvədə bəhvaton. SSRİ hukumətən de savdı kardəkəson bə mubarizəbe, kon savdıqiri əqətin 3sor, 5 sor ko ədəyn. Lankoni milison çı sefə maşiniku xəbə zınedən, maşin bıromi qətedən. Maşin bıromi həbsiku dı saat dəvardedə milisə maşin ijənən omedə bə Viyən, i xonəxoən bardedə. Milisə maşin 3-minə kərə bə di dəşyədə Viyəni siprişonədə qıləyni bə qırdəbə Viyənıjon votedə:
- Zə, kiku çiç heste, qırdəkəmon, bışəmon bıdəmon bə sıpon, ə sıpəzoə çəvon dasto bıroxnəmon, məvuji peş ha silli əv i xonəxo nomi bədo, dessə maştə Viyənədə səbəkılo əndınni
Dəvuş
"Tolışon Sədo” N: 57
26 noyabr 2013
